Kalete bangkele to nabalu to nakahiahi
21
1 Tempo Yesus i Hou Alatala, laipenoto-Na belora to nahugi nopahua kalete i rara peti pokaletea. 2 Laihilo-Na mui hadua bangkele to nabalu to nakahiahi, nopahua rompeka doi see to nakodi i rara peti ee mai. 3 Napu ee Yesus nanguli, “Ku'ulika komi, kakonona nadeapi doi to laipopewai bangkele to nabalu to nakahiahi mairia lako humawee tau ntanina, 4 apa humaweera nampopewai hodi aga lako kahugiara. Naupawee bangkele to nabalu mairia newai lako kakuraana. Humawee to lairatana nopaelo popewaina purami.”Hou Alatala rapakaropo
5 Bahangkua dua ana guru Yesus nampotutura nangkambelai Hou Alatala to lairambai hante watu to nahuli olina, parewa lako bulawa pade parewa ntanina to nelabi kabelona, to laipopewai hi Alatala. Iuli-Na Yesus, 6 “Maria mei tempona, humawee to lainaami ei kana ragerohi. Moma maria hangua watu to rapopetoro i lolo watu ntanina. Humaweena rapakaropo.”
Kahehaa to madupa kapoma Yesus marata nculi
7 Lauparia nepekuneramo ana guru-Na, “Guru, bulauma Hou Alatala rapakaropo? Pade napa tandana ane temponapi madupa?”
8 Nehono Yesus, “Maingahawo bona nemo maria tauna to mampakahalatara komi. Apa madea mei tauna marata mampake hanga-Ku pade manguli, ‘Akumi Magau to Pepakahalama to laitipa Alatala!’ Raulira mui, ‘Eo kahudua dunia namohumi!’ Naupawee, nemo komi madota mawali to pantukura. 9 Pade ane maria miepe to pohiwali pade pogehoa, nemo komi makonce, apa humawee lauria kana madupa, naupawee etu mai poma'i kahudua dunia.”
10 Napu ee iuli-Na mui Yesus, “Ngata-ngata mei mome'ewa pade kamagaua mome'ewa hante kamagaua. 11 Maria mei linu to neliu mpuu kabohena, oro mpai, haki to nepaekai motolele i rima-rima. Maria mui kajadia-kajadia pade tanda-tanda to mepaekai i langi. 12 Kapomana humawee lauria madupa, komi mei rahoko pade raduahi. Rakeni komi mei rabotuhi i hou-hou pepuea pade rapahua i rara tarungku. Komi mui mei rakeni i tingoora magau pade to poparenta ntanina bona rabotuhira komi, habana hanga-Ku. 13 Etumi mei logami mangulikara nangkambelai hema-'A.
14 Aji, pakatantu rarami, nemo mipahadia ami napa to miuli mampotolawai wotomi, 15 apa Aku moto mei mampawai komi noto mojarita to natopa, bona humawee tauna to nampaewa komi momara mamala mampaewa bo mampabili komi. 16 Tempo ee, komi mei rapopewaira tina pade tuamami, ompi-ompimi, pade bale-balemi moto hi bali-balimi. Maria komi mei to rapatehira bali-balimi. 17 Komi mei rapodaa humawee tauna, habana neparahaya hi Aku. 18 Naupawee, komi mei Napakahalama Alatala. Nau hangkau wulua i woomi moma'i mawuka.a 19 Ane maroho moto peparahayami, mirata mei katuwua to moma maria kahuduana.”
Karopoa Yerusalem
20 “Ane mihilo mei ngata Yerusalem rapatikuhira tantara, mincanimi ane eo karopoana namohumi. 21 Tempo ee mei tau-tauna to i Yudea kana malai rau i buluna. Hira to i rara ngata Yerusalem kana rapari-parira mehuwu, pade hira to i hawaliku Yerusalem, nemora mehua rara ngata, 22 apa tempo ee mai eo pebalahia mopaganai humawee to laitulihi rara Buku to Nagaha. 23 Metoweiramo bangkele to bulara notiana pade to tina to bulara nopahuhu anara tempo ee, apa maria mei kahehaa bohe matiku ngata ee mai. Alatala mampopehuwu hodo-Na hi ngata ee mai. 24 Mariara mei to rapatehi hante tono lampa pade maria muira to rakeni ratawani i ngata-ngata ntanina i hawaliku Israel. Pade Yerusalem raparentara tauna to moma Yahudi hante hekera duu kaganaa eora to laipakatantu Alatala.”
Tanda karata nculi Ana Manuhia
25 “Maria mui mei tanda i eo, wula pade betue-betue. Pade i dunia ei mai humawee tauna maeka mpuu pade maingu mangepe moni balumba tahi to narimboho. 26 Mariara mei tauna malimpu keni ekara habana humawee to madupa i dunia ei mai, apa baraka-baraka langi to nampaewa Alatala mokalengka. 27 Tempo ee mei humawee tauna mampahilo Ana Manuhia marata rara gawu hante roho pade baa baraka to nabohe. 28 Ane mopamula madupapi humawee lauria, kahadiamo pade parahayami apa momami mahae Alatala mampakahalama komi.”
Porapa nangkambelai kau ara
29 Yesus nantuturakara porapa ei mai, “Hilomi puu kau ara bo kau ntanina to nowua. 30 Ane motawe ngurapi kau, mincanimi ane parami marata tempo eo ngkara. 31 Wee mui komi ane mihilo humawee kajadia to laiulika-Ku komi madupami, etu tanda ane namohumi tempona Alatala moparenta halaku Magau. 32 Mpuu-mpuu Ku'ulika komi, tau-tauna to natuwu tempo ei pomara mamate kapomana humawee lauria madupa. 33 Langi bo dunia mei maria kahuduana, naupawee lolita-Ku moma'i maria kahuduana.”
Patudu bona mainga
34 “Maingahawo, nemo pampekirimi wule mampohulia kagoea dunia ei, malangu-langu, pade mamere rara hante katuwumi. Ane wee, moma komi mahadia ane Ana Manuhia marata ncanora ewa kapoti pamenta. 35 Habana eo ee mai kana marata hi humawee tauna to natuwu i dunia. 36 Etumo, mainga moto oahawo pade mohambaya, bona maroho komi mantingohi humawee to madupa pade mibuku mokangkore i tingoo Ana Manuhia.”