Porapa nangkambelai bimba to naronto
15
1 Nadea to peduhu paja pade tauna to nadoha, naharora narata hi Yesus nangepe-'I nopatudu. 2 Nampahilo lauria, nangkaranguhira to Farisi hante to nataualu buku Taurat, iulira, “Hia ei nantarima tauna to nadoha pade nangkoni dohera.”3 Naupawee, Yesus nangulikara hante porapa iwei, 4 “Ane maria hadua tauna mangkami hatu maa bimba, pade maronto hamaa, natantu amimi kana napalahi to hahio mpulu hahio maa ee i tongo mpada, pade rau'i mampali to naronto ee duuna narata. 5 Ane nahumapi bimba ee, magoe mpuu'i pade napona'i manculi. 6 Karatana i hou, naoka bale-balena bo tongki-tongkina, naulikara, ‘Maita magoe-goe, apa bimbaku to naronto laihumakumi.’ 7 Aji, Ku'ulika komi, wee moto mui malaeka-malaeka Alatala i huruga. Magoe mpuura habana hadua to nadoha nancoro. Kagoera ee mai neliupi lako kagoe habana hahio mpulu hahio tauna to nanoro ingkura to moma iparaluura mancoro.”
Porapa nangkambelai doi halaka to naronto
8 “Rapana mui, maria hadua bangkele to naria hampulu mpeka doi halakanaa, pade maronto hampeka. Natantu amimi natutuni poindo pade nahai houna mampali doina duuna nahuma. 9 Ane nahumadimi, nakio ema-emana pade tongki-tongkina, naulikara, ‘Maita magoe-goe, apa doiku to naronto laihumakumi.’ 10 Wee moto mui malaeka-malaeka Alatala i huruga. Magoe mpuura ane hadua to nadoha nancoro lako dohana.”
Porapa nangkambelai ngana to naronto
11 Laiuli-Na mui Yesus, “Naria hadua tauna, anana rodua, balailo pura. 12 To kahudu nangulika tuamana, ‘Papa, waika'amo gagu to mawali bagiaku.’ Lauparia, tuamana nobagi gaguna hi rodua anana ee. 13 Bahangkua eo lako hee, ngana to kahudu nobalu humawee bagiana pade neongko'imi rau i ngata to na'awa. I ria'i nampakapu mara doina hante katuwua to moma natimotoa.
14 Hangka napupi humawee doina, nadupami oro mpai i ngata ee mai, hampena hia mui nopamulami naoro. 15 Alaana, rau'i nobago hi hadua tauna i ngata ee mai. Tauna ee nantudu'i rau pampana mopakoni wawu-wawuna.b 16 Mingki'i mampakaronto oro taina hante konia wawu-wawu ee, apa moma naria tauna nampawaika'i konia.
17 Alaana, laipekirinami kadoyoana, pade iulina rara bongona, ‘Nadeadamo tauna to nampobagoka tuamaku to namparata konia nelabi-labi, molelau aku hei para'amo mamate maoro! 18 Meongko'amo lako hei, manculi rau hi tuamaku pade ku'ulika'i, “Papa, nadoha'amo hi Alatala pade hi iko. 19 Moma'amo mahipato mupoana. Palele'amo mawali batuamu.” ’ 20 Napu ee neongko'imi rau hi tuamana.
Na'awadipi, nenaami tuamana. Nehuwumi ahi rara tuamana, pade nokumenomi rau nampotomu'i, nangkapui'i pade nampaeki'i. 21 Lauparia nojaritami ngana ee hi tuamana, ‘Papa, nadoha'amo hi Alatala pade hi iko. Moma'amo mahipato rauli anamu.’
22 Naupawee, tuamana nangulika batua-batuana, ‘Keni mahomi tumai waru to nelabi kabelona, pade warui'i. Pahuaka'i hingki i karawena pade hapatu i paana. 23 Pade ala hamaa ana japi to narudu, hamalekata takoni magoe-goe, 24 habana anaku ei ewa namatemi, naupawee natuwu nculi! Narontomi, naupawee lairata nculimi!’ Napu ee nopamularamo nohuha.
25 Hamali ee, anana to ulumbua tempona nobago i bone. Panculina pade lau mamohu hounapi, laiepena moni tulali pade uliara to poence. 26 Lauparia laikiona hadua batua pade pekunena napa batuana humawee lauria.
27 Batua ee mai nampahonoi'i, ‘Tuaimu nanculimi pade tuamamu nohamale hamaa ana japi to narudu, apa lairatana nculimi anana hante nahalama.’
28 Pangepena humawee lauria, ngana to ulumbua ee nawali nahodo, pade nalohe'i nehua rara hou. Lauparia, tuamana narata nampalanai'i bona madota'i mehua rara hou. 29 Nehono ngana ee hi tuamana, ‘Hilo, mpaena'a nampobagokako ewa batua pade poma'a naria hangkania nampaewa pebahaimu. Naupawee, poma'a naria laiwaikamu hamaa ana kebe bona mamala'a magoe-goe hante dohe-doheku. 30 Molelau panculina anamu to nampakapu kahugiamu hante bangkele-bangkele to nobalu wotora, laihamalekamu'i ana japi to narudu!’