Yesus nampahuro hampulu rodua ana guru-Na
9
1 Poma nahae lako ee, Yesus nangkio hampulu rodua ana guru-Na. Laiwaika-Na roho pade baraka bona mamalara mampopalai anudaa to nampehuai tauna pade mampakaurira to nohaki. 2 Lauparia, laihuro-Naramo rau mangkarebai bewa Alatala noparenta halaku Magau pade rau mampakauri tauna to nohaki. 3 Iulika-Nara, “Nemo mangkeni napa-napa i rara pomakoami. Nemo mangkeni lua ba boku, roti ba doi, ba rontau waru. 4 Rima hou to mantarima komi, katidamo komi i ria duumi meongko lako ngata ee. 5 Hema-hema to moma mantarima komi, palahimi ngata ee, tontahi awu lako paami mampalingaira ane hira mei Nahuku Alatala.”6 Napu ee, neongko mpuuramo rau i ngata-ngata, nangkarebai Kareba Belo pade nampakauri tauna to nadua i rima karauara.
Herodes mingki mampotomuka Yesus
7 Pangepena Herodes, magau Galilea, humawee to nadupa lauria, nokalihe'i, apa bahangkua dua tauna nanguli ane Yohanes laipakatuwu nculi lako kamatea. 8 To ntanina nanguli, Elia narata nculimi. Bo to ntanina mui nanguli ane hadua lako nabi-nabi owi natuwu nculi. 9 Iulina Herodes, “Woo Yohanes laipudukumi. Hema kakonona Tauna to iepeku nobabei humawee lauria?” Lauparia Herodes nampehimukui bona mamala'i mampotomuka Yesus.
Yesus nopakoni nelabi alima ncobu dua tauna
10 Panculira rasul ee, tuturakarami hi Yesus humawee to laibabeira. Napu ee, laikeni-Naramo rau nopatani i hangu ngata to laikahangai Betsaida. 11 Naupawee todea nangincani karauara, pade laitukura-'I. Karatara todea ee mai, Yesus nampotomura pade laipatudu-Nara bewa Alatala noparenta halaku Magau. Yesus mui nampakaurira to nohaki.
12 Lau maholopi eo, narataramo hampulu rodua ana guru-Na hi Yesus pade iulira, “Ane mamala, tuduramo todea etu mai rau i ngata-ngata bo i hou-hou tauna to namohu harei, bona mampali po'ohaa hante pangkonira, habana kita ei mai i kalinoana.”
13 Naupawee iuli-Na Yesus, “Komi to kana mopakonira.”
Nehonora, “To naria hi kami ei, wuwu alima ongu roti pade romaa bau aga. Aji, kana rau kami mangoli pangkonira humawee tauna ei?” 14 Apa maria alima ncobu amira balailo to nahiromu i hee.
Lauparia Yesus nangulikara ana guru-Na, “Tuduramo todea etu moncuna, ba hore alima mpulu duara hampodohea.” 15 Ana-ana guru-Na nobabei ewa to laituduka-Nara pade nantudura humawee tauna noncuna.
16 Napu ee iala-Na Yesus alima ongu roti pade romaa bau ee, laitingara-Na langi, pade nohambaya-'I nosukuru hi Alatala. Napu ee roti bo bau ee laitubi-tubi-Na pade laiwaika-Na hi ana-ana guru-Na bona ratirakara hi todea ee mai. 17 Humawee tauna nangkoni duura nabohu. Napu ee, ana-ana guru Yesus nopalimpuru labi to laikonira, hampulu ropangkoloapi kadeana.
Pangakua Petrus ane Yesus ee Ana Alatala
18 Hangkani tempo, Yesus nohambaya hadudua-Na. Narataramo ana guru-Na nampodohe-'I. Napu nohambaya, laipekune-Nara Yesus, “Panguli todea, hema-'A Aku ei?”
19 Nehonora ana guru-Na, “Yohanes to Pediu. Naria muira to nanguli Elia, pade to ntanina muipi nanguli hadua lako nabi-nabi owi to natuwu nculi.”
20 Lauparia, nepekuneki Yesus hi ana-ana guru-Na, iuli-Na, “Ane komi, hema kakonona Aku ei mai?”
Nehono Petrus, “Ikomi Magau to Pepakahalama to laitipa Alatala.” 21 Lauparia, Yesus nantagi mpuura bona nemo rakewora hi hema-hema ane Hiami Magau to Pepakahalama to laitipa Alatala.
Pangkewo Yesus to pamulana nangkambelai bewa-'I mei mamate
22 Iuli-Na muimi Yesus, “Ana Manuhia kana mangkolo madea kahehaa, pade moma-'I ratarimara totua-totua ngata to Yahudi, imam-imam to i matana pade to nataualu buku Taurat. Napu ee mei rapatehi-'I. Naupawee, eo katoluna rapakatuwu nculi-'I lako kamatea-Na.”
23 Pade iulika-Nara humawee tauna to i hee, “Butu tauna to mingki mantuku-'A, hia kana mampehapuka wotona moto, mangkolo kahehaa butu eona pade mantuku Aku.a 24 Apa hema-hema to mampomaihi tuwuna moto, moma mei narata katuwua to moma maria kahuduana. Pade hema-hema to moma mampomaihi tuwuna habana nantuku-'A, hia mei mamparata katuwua to moma maria kahuduana. 25 Moma naria bununa hadua tauna mamparata humawee ihi dunia, ane wule mampakaronto bo mampakahilaka wotona moto. 26 Hema maea habana Aku bo patudu-Ku, Ana Manuhia mui mei maea mampangaku'i ane marata-'I rara baa baraka-Na pade baa baraka Tuama bo malaeka-malaeka to nagaha.
27 Ku'ulika komi, maria mei bahangkua dua tauna to naria i hei to poma mamate kapomana rahilora mopamulami Alatala moparenta halaku Magau.”
Yesus laipemabohe i lolo bulu
28 Ba maria walu eo lako pepatudu Yesus lauria, laikeni-Nami Petrus, Yohanes pade Yakobus laipodohe-Na nanake bulu rau mohambaya. 29 Bula-Na nohambaya, nobalimi lence-Na, pade waruna nawali nabula neringkila. 30 Ngkali naria rodua tauna nampojaritaka Yesus. Hira ee mai, Musa pade Elia. 31 Hira nerawa hante baa baraka pade nampojaritaka Yesus nangkambelai kamate-Na i Yerusalem ewa liwo Alatala.
32 Tempo ee, Petrus pade dohe-dohena notururamo. Pematara, lainaara Yesus i rara baa baraka-Na pade rodua tauna nokangkore dohe-Na. 33 Lau meongkorapa to rodua ee mampalahi Yesus, Petrus nangulika Yesus, “Guru, nagoe mpuu kami i hei. Nabelo ane kibabei tolu bamaru, hangu hi Iko, hangu hi Musa, pade hangu hi Elia.” Moma incanina Petrus napa to iulina lauria.
34 Bula Petrus nanguli lauria, ngkali naratami gawu nampabungura. Katebungura rara gawu ee mai, naekaramo. 35 Napu ee iepera Alatala nololita, iuli-Na, “Eimi Ana-Ku to laipelihi-Ku. Epe pade turuhi-'Imi.”
36 Nahudupi lolita ee iepera, hadua Yesusdimi laihilora. Tempo ee, moma napa laiulira ana guru eera mai, pade moma hema haduaa laikewokara napa to laihilora.
Yesus nampopalai anudaa lako hadua ngana to nadua
37 Kanailena, panaura lako bulu ee, narataramo tauna to nadea nampotomuka Yesus. 38 Tempo ee mui, naria hadua lako tauna to nadea ee nongare, iulina, “Guru, kuperapi hi Iko bona Muhilokuwo anaku. Apa haduduana motokuwo anaku. 39 Ane laipehua anudaa'i ngkali au-aunami. Anudaa ee namparidi-ridi'i hampe nowura ngangana. Laipakahehana oa'i pade ke nono moma'i madota mampalahi'i. 40 Laiperapikumi hi ana-ana guru-Mu bona rapopalaira anudaa to nampehuai anaku ee, naupawee moma'i namala laipopalaira.”
41 Yesus nanguli, “He, komi tauna to moma neparahaya pade nahalatara. Hangkuapi kahae-Ku matida dohemi pade mohabara hi komi? Kenimi anamu tumai!”
42 Tempo ngana ee nomako rau nampamohuki Yesus, anudaa ee nampadungka bo namparidi'i. Naupawee laikamaro-Na Yesus anudaa ee, laipakauri-Na ngana ee, pade laipopanculi-Nami ngana ee hi tuamana. 43a Humawee tauna to i hee nahera nampahilo baraka Alatala to nabohe.
Pangkewo Yesus karongkanina nangkambelai bewa-'I mei mamate
43b Hamalira naheradipi humawee tauna ee hante hangu hangaa to laibabei-Na lauria, Yesus nangulika ana guru-Na, 44 “Epe bo pairara belo napa to Ku'ulika komi. Ana Manuhia mei rapopewai rara mpale manuhia.” 45 Naupawee ana-ana guru-Na moma laipahara napa to iuli-Na, habana batuana laipopalerui hi hira, hampena moma'i laipahara. Pade moma muira nabia nepekune hi Hia napa batuana to iuli-Na lauria.
Hema to neliu pobununa lako ana guru Yesus
46 Hangkani tempona, ana guru Yesus nonebili nangkambelai hema to neliu pobununa lako humaweera. 47 Naupawee Yesus nangincani napa to ipomebiliira. Laiala-Na hadua ngana kodi, laipopokangkore-Na i humpii-Na, 48 pade iulika-Nara ana guru-Na, “Hema-hema to mantarima ngana kodi to ewa ei habana tauna ee neparahaya hi Aku, hia mui nantarima-'A, pade hema-hema to mantarima-'A, hia mui nantarima Alatala to nampahuro-'A. Habana, to moma nobunu gaga lako humaweemi, hiami to neliu pobununa.”
Hadua to moma ana guru Yesus nampopalai anudaa
49 Yohanes ana guru Yesus nanguli, “Guru, laihilo kami hadua tauna nampopalai anudaa to nampehuai tauna nampake hanga-Mu. Laitagi kami tauna ee, apa moma'i to pantukuta.”
50 Yesus nangulika Yohanes, “Nemo mitagi'i, habana hema-hema to moma mampaewa komi, hia ee doomi.”
Yesus moma laitarima to Samaria
51 Namohupi tempona Yesus raongko rau huruga, nabulolimi rara-Na rau i Yerusalem. 52 Laihuro-Na bahangkua dua tauna mampoilodoka-'I rau i hangu ngata to Samaria mampahadia hangu hangaa. 53 Naupawee momara nadota to Samaria to natida i ngata ee nantarima Yesus, habana patuju pomakoa-Na rau i Yerusalem.b 54 Pangepera Yakobus pade Yohanes lauria, iulira, “Pue, madotada-Ko bona kiparenta apu manau lako langi mampakaropura?”c
Bewa mantuku Yesus
57 Tempo Yesus hante ana-ana guru-Na nopadola pomakoara, naria hadua tauna nangulika-'I, “Metuku'a dohe-Mu nau rima karaua-Mu.”
58 Yesus nangulika'i, “Nculaku naria wulou po'ohaana, tonci naria dumuna, naupawee Ana Manuhia moma naria podulea woo-Na moturu.”
59 Lauparia iuli-Na Yesus hi to ntanina, “Tuku-'Amo!”
Naupawee iulina tauna ee, “Tuama, paliu'akuwo olu manculi mampauruhi tuamaku. Ane mamatedimi tuamaku, ku'uruhi olu popatanana pade kutukuda-Ko.”
60 Yesus nangulika'i, “Paleleramo tauna to namate mopatana to namate. Naupawee iko, koimoko pade karebaimi ane nopamulami Alatala noparenta halaku Magau.”
61 Nanguli mui to ntanina, “Pue madota'a mantuku-Ko, naupawee paliu'akuwo olu rau mehabi hi ompi-ompiku.”
62 Naupawee nehono Yesus, “Moma nabelo tauna mopajeko naupawee meilidipi talikuana. Wee moto mui tauna to mantuku-'A. Ane nalinga moto oa napa to laipalahina, moma'i mahipato mawali todea i rara poparentaa Alatala.”