Yesus nehua i Yerusalem ewa hadua magau
21
1 Namohurapa Yesus hante ana-ana guru-Na i Yerusalem pade narata i ngata Betfage to i Bulu Zaitun, laitudu-Naramo rodua ana guru-Na, 2 iulika-Nara, “Koimo komi i ngata to i tingoota mairia, pade i ria mei mirata hamaa keledai weana laitaka pade anana i humpiina. Kakami keledai etu mai pade keniramo tumai hi Aku. 3 Ane maria tauna mangkamaro komi, ulimi, ‘Pue namparaluura keledai ei mai.’ Dungku napopewaimi mei keledai ee mikeni.” 4 Lauria nadupa nopaganai peboha Alatala to laiparata nabi owi, iwei,5 “Ulikaramo todea Yerusalem,
Hilo, Magaumi narata hi komi,
moma-'I nahombo, Hia nencawi hamaa keledai,
hamaa keledai to nanguradipi.”
6 Lauparia rauramo ana guru Yesus to rodua ee mai pade nampobago napa to laituduka Yesus hi hira. 7 Laikenira keledai ee mai hante anana, pade lailampiira hante waru pokarolapiira. Napu ee Yesus nencawi keledai ee mai.
8 Nadea tauna nowole waru pokarolapiira i dala, pade naria muira to notompo raa-raa kau pade laihenara i dala. 9 Pade todea to nomako noilodo bo to nantuku Yesus lako puri nongare, iulira,
“Hosana! Raunemi muli Magau Daud.
Laitiroimi Hia to narata hante baraka Pue.
Hosana! Raunemi Alatala i kalangkoana!”
10 Pehua Yesus i Yerusalem, humawee tauna i ngata ee mai nakonce bo nogeho, pade nanguli, “Hemadi Tauna lauria?”
11 Todea to nantuku Yesus nehono, “Hia lauria nabi Yesus lako ngata Nazaret i Galilea.”
Yesus nampopalaira to nobalu-balu i Hou Alatala
12 Napu ee Yesus nehua i karawaa Hou Alatala, pade laipopalai-Na purara to nobalu-balu pade to peoli i hee. Laibaliangko-Na mejara to pohula doi pade bangku-bangkura to pobalu tonci bangkebodo. 13 Pade iulika-Nara, “Naria laitulihi rara Buku to Nagaha iwei, ‘Hou-Ku kana rauli hou pohambayaa,’ naupawee laipowalimi po'ohaara to perampakidi.”
14 Lauparia narataramo tauna to naburo pade to nakejo hi Yesus i Hou Alatala ee mai, pade laipakauri-Na purara. 15 Naupawee nagigi mpuu rarara imam-imam to i matana pade to nataualu buku Taurat nampahilo to nepakahera to laibabei Yesus pade nangepera ngana to nongare i Hou Alatala, nanguli, “Hosana! Raunemi muli Magau Daud!”
16 Hira nampekune Yesus, “Iepe-Mu to laiulira ngana ei mai?”
Nehono Yesus, “Iepe-Ku. Apa nongkuadi? Poma'i naria laibahami to laitulihi rara Buku to Nagaha iwei,
‘Lako ngudura ngana kodi pade ngana to nehuhuradapa
laipahadia-Mu amimi ulia-ulia peune.’ ”
17 Napu ee laipalahi-Naramo Yesus, pade nehuwumi lako Yerusalem rau noturu i Betania.
Yesus nampakamo kau ara
18 Hampepulo ngkii rara pomakoa-Na manculi rau i Yerusalem, naoromi tai Yesus. 19 Laihilona namohu lako dala naria hampuu kau ara. Rau-'I i puu kau ara ee mai, naupawee moma naria hangua wuana lairata-Na, wule tawena aga. Iuli-Na hi kau ara ee mai, “Momamoko mowua duu kahae-haena!” Tempo ee mui nabangimi kau ara ee mai.
20 Nampahilo lauria, nahera mpuura ana guru-Na, iulira, “Bewa pade ngkali nabangimi kau ara ee mai?”
21 Yesus nangulikara, “Mpuu-mpuu Ku'ulika komi, ane meparahaya mpuu komi pade moma komi mokarara, moma wuwu to laibabei-Ku hi kau ara ei mai mamala mibabei, naupawee melabi lako ee mai. Ane miulika bulu ei, ‘Kateongkomoko pade matebunca i rara tahi,’ kana madupa ewa to iulimi etu mai. 22 Pade bonau napa to miperapi rara hambaya, ane meparahaya mpuu komi, mitarima mei napa to iperapimi ee.”
Pepekunea nangkambelai baraka Yesus
23 Napu ee Yesus nehua i karawaa Hou Alatala nopatudu. Bula-Na nopatudu, narataramo imam-imam to i matana hante totua-totua ngata to Yahudi hi Hia nampekune-'I, “Hante baraka hema-Ko nobabei humawee etu mai? Pade hema to nampawaika-Ko baraka etu?”
24 Nehono Yesus hi hira, “Naria mui-Kuwo hangaa to Kupekuneka komi. Ane mamala-'A mihonoi, Ku'ulika mui komi-Kuwo hante baraka napa-'A nobabei humawee lauria. 25 Lako hi hema baraka Yohanes nopadiu tauna? Lako Alataladi ba lako manuhiadi?”
Noneulikaramo hore hira, iulira, “Ane tauli lako Alatala, Naulikata mei, ‘Ane wee, napa pade moma'i laiparahayami?’ 26 Naupawee, ane tauli lako manuhia, naekata mahodora mei todea, apa todea nanguli ane Yohanes ee mai hadua nabi.” 27 Lauparia, nehonora hi Yesus, “Moma incani kami.”
Iulika-Na muirahawo Yesus, “Ane wee, moma mui-Kuwo Kukewo hi komi hante baraka hema-'A nobabei humawee lauria.”
Porapa nangkambelai hadua to tuama pade rodua anana
28 “Bewa popantaruimi ane to ewa ei? Naria hadua to tuama, rodua anana balailo pura. Rau'i hi anana to ulumbua, pade iulina, ‘Anaku, koimoko mobago i pampa anggur.’
29 Nehono anana ee mai, ‘Malohe'akuna.’ Naupawee laihohona rarana pade rau moto'i i pampa anggur ee.
30 Napu ee rau mui'i hi anana to tuai, pade nanguli mui ewa to laiulikana anana to ulumbua. Anana ee mai nehono, ‘Io papa, rau'adamo.’ Naupawee moma'i rau i pampa anggur ee.
31 Aji, hemara lako rodua anana ee mai, to nobabei dota tuamara?”
Nehonora, “Anana to ulumbua.”
Yesus nangulikara, “Mpuu-mpuu Ku'ulika komi, hira to peduhu paja pade bangkele-bangkele to nobalu wotora mei moilodo mehua rara poparentaa Alatala. 32 Habana Yohanes narata nantudoka komi dala katuwua to nanoro i tingoo Alatala, naupawee moma'i laiparahayami. Bo hira to peduhu paja pade bangkele-bangkele to nobalu wotora laiparahayara napa to iulina. Pade naupa laihilomi motoramo bewara namparahaya to laiuli Yohanes, moma laihohomi rarami pade moma komi nadota namparahaya patudu Yohanes.”
Porapa nangkambelai to pobago i pampa anggur
33 Napu ee Yesus nopadola nangulikara iwei, “Epe mui komi hangu porapa ntanina. Naria hadua tumpu pampa notuda anggur i pampana pade laiwala ntikuna. Laikaena lowu popiea anggur pade laipatunana hangu hou langko rapake mampodoo pampa ee mai. Napu ee, pampa ee mai laipopehewana hi bahangkua dua to pobago, pade rau'imi i ngata ntanina. 34 Namohupi tempona wua anggur rapupu, laitudunaramo batuana rau hi hira to pobago ee mai mamperapi bagiana.
35 Naupawee hira to pobago pampa ee nampahokora batua ee mai. Naria to laikadungkuira, naria to laipatehira, pade naria muira to laiwunura hante watu. 36 Napu ee tumpu pampa ee nantudura batuana to ntanina, nelabipi kadeara lako to pamulana, naupawee hira mui laipowee nahibali hante batua-batua to pamulana. 37 Kahuduana laituduna anana rau hi hira, iulina, ‘Ane anaku to kutudu rau, tantu rapokaekara'i.’
38 Naupawee hangka to pobago pampa eera mai nampahilo ana tumpu pampa ee mai, noneulikaramo, ‘Hilo, etumi tumai ana tumpu pampa to mangkami pampa ei mei. Agina tapatehi lau'imi bona pampa ei mai ta'ala kitami.’ 39 Laihokora ana tumpu pampa ee mai, laikenira rau hawaliku pampa pade laipatehira.
40 Aji, ane marata'i tumpu pampa anggur ee mai, nakuara mei to pobago i pampa anggurna ee?”
41 Nehonora hi Yesus, “Napatehi purara mei to pobago to nadaa ingkura etu mai, pade pampa anggurna etu napopehewa hi hira to pobago ntanina to mampopewai bagia hi hia ane temponapi wua anggur ee rapuputi.”
42 Yesus nangulikara, “Apa poma'i naria laibahami rara Buku to Nagaha,
‘Watu to laitadira tuka hou,
watu ee laumi to nawali koro watu pondasi.
Ee mai laibabei Pue,
nahera pade nagoe mpuuta nampahilo humawee lauria.’
43 Etumo Ku'ulika komi, bagiami rara poparentaa Alatala ra'ala nculi lako hi komi pade rawaika to ntanina to nantuku dota Alatala. [ 44 Pade hema to manawu i lolo watu etu mai marega, pade hema to naparumpihi watu etu marutu.]”