Yesus laihoko
18
1 Nahudupi Yesus nohambaya, rau-'Imi hante ana-ana guru-Na i dipo Ue Kidron. I hee naria hangu pampa. Nehuami Yesus hante ana-ana guru-Na i hee.2 Yudas to nampopewai Yesus hi bali-bali-Na, ncanina pampa ee apa Yesus naharo nahiromu hante ana-ana guru-Na i hee. 3 Aji naratami Yudas i hee hante tantara-tantara Roma pade bahangkua dua to nampodoo Hou Alatala to laitudura imam to i matana pade to Farisi. Naratara hante parewa pohiwali, poindo bohe pade hulu.
4 Laincani-Na purami Yesus napa to kana madupa i woto-Na. Aji, laimohuki-Naramo tauna ee pade laipekune-Na, “Nampali hema komi?”
5 Nehonora tauna ee, “Nampali Yesus to Nazaret.”
Nehono Yesus, “Akumile to laipalimi.” Yudas to nampobalu Yesus nokangkore i hee dohera tantara pade to nampodoo Hou Alatala. 6 Pangulika-Nara Yesus, “Akumile to laipalimi,” nekangkaura puraramo to mehoko ee pade nadungka.
7 Pekuneki-Na muirapa Yesus, “Nampali hema komi?”
Nehono muira tauna ee mai, “Nampali Yesus to Nazaret.”
8 Iuli-Na Yesus, “Iulikumi he, Akumile to laipalimi. Ane Aku to laipalimi, paleleramo dohe-Ku ei mai rau.” 9 Laiuli-Na Yesus iwee bona madupami to iuli-Na rara hambaya-Na iwei, “Tuama, lako humawee tauna to laiwaika-Mu-'A, momara hema haduaa to naronto.”
10 Lauparia Simon Petrus to nangkeni tono, nowutu tonona pade nantime hadua batua Imam Bohe hampena naputu talingana mali kana. Hanga batua Imam Bohe ee, Malkus.
11 Lauparia, Yesus nangulika Petrus, “Linco nculi tonomu etu! Iulimu iko, moma-'A mahadia mangkolo kahehaa to laipakatantu-Na amimi Tuama?”
Yesus laikeni i tingoo Hanas
12 Napu ee, tantara-tantara Roma hante komandaara pade to nampodoo Hou Alatala nampahoko Yesus pade nampahilu-'I. 13 Pamulana, Yesus laikenira rau hi Hanas, paniana Kayafas. Kayafas ee mai to nawali Imam Bohe tempo ee. 14 Kayafas eemi to nangulikara to pangkeni to Yahudi iwei, “Aginapi hadua tauna mamate mampahambei todeata, nemo humawee todeata maropu.”
Petrus nampehapuka Yesus
15 Simon Petrus pade hadua ana guru Yesus to ntanina nantuku bongo Yesus. Ana guru Yesus to ntanina ee nonencani hante Imam Bohe. Etu pade namala'i nehua hingkani-ngkani hante Yesus rau i karawaa hou Imam Bohe. 16 Petrus nopea i hawaliku womo wala moto'i. Ana guru Yesus to ntanina ee nehuwu nculi nampojaritaka bangkele to nampodoo womo wala bona rapaliu i Petrus mehua dohena. Napu ee, laipodohena mpuumi Petrus nehua i karawaa hou Imam Bohe.
17 Nojaritami bangkele to nampodoo womo wala hi Petrus, iulina, “Apa moma iko mui hadua ana guru-Na?”
Nehono Petrus, “Moma.”
18 Ngkawengia ee, nalengi. Aji, bahangkua dua batua Imam Bohe pade to nampodoo Hou Alatala nopaduu apu pade nokangkoreramo i hee naneru. Petrus mui nokangkore naneru dohera.
19 Tempo ee, nopamulami Imam Bohe nampekune Yesus nangkambelai to pantuku-to pantuku-Na pade patudu-Na.
20 Yesus nangulika'i, “Naharo moto-'A nojarita i tingoo todea. Nopatudu oa-'A i hou-hou pepuea pade i karawaa Hou Alatala kahiromuara to Yahudi. Moma naria laipopalerui-Ku jarita-Ku. 21 Aji, napa pade Aku to laipekunemu? Pekunera to nangepe napa to iuli-Ku. Laincanira moto napa to iuli-Ku.”
22 Panguli-Na Yesus lauria, hadua to nampodoo Hou Alatala to nokangkore i hee nampahapa-'I pade nanguli, “Nabia mpuu-Ko nojarita ewa ee hi Imam Bohe!”
23 Nehono Yesus, “Ane naria jarita-Ku to nahala, ulimi i hei napa to nahala. Naupawee ane nakono to iuli-Ku, napa pade laihapamu-'A?”
24 Napu ee, Hanas nantudu tauna mangkeni Yesus to laihilumi ee rau hi Imam Bohe Kayafas.
25 Simon Petrus hamalina naneru oadipi. Tauna to i heera nangulika Petrus, “Apa moma iko mui hadua ana guru-Na?”
Pehapukana Petrus, iulina, “Moma.”
26 Hadua batua Imam Bohe ompi batua to laitime Petrus talingana nangulika'i, “Apa moma iko hadua dohe-Na to laihiloku i rara pampa ria he?”
27 Pehapukana mui Petrus, iulina, “Moma.” Tempo ee mui, noturuami manu.
Yesus i tingoo Pilatus
28 Hampepulo ngkii, laikenirami Yesus lako hou Kayafas rau hi gubernur. To pangkeni to Yahudi eera momara nehua rara hou po'ohaa gubernur, bona nemora marumu mantuku patudu petukuara, apa mangkoni pangkoni eo bohe Paskah to Yahudiramo.
29 Etu pade nehuwu'i Pilatus nampekunera, iulina, “Napa to ipangadukami Tauna ei?”
30 Nehonora to pangkeni to Yahudi ee, “Ane ke moma nadaa kehi-Na, moma-'I kikeni hi iko Tuama.”
31 Alaana Pilatus nangulikara, “Kenimi Tauna ei pade botuhi motomi mantuku patudu Tauratmi!”
Naupawee to pangkeni to Yahudi eera mai nampahonoi Pilatus, “Moma kami mamala mampahuku mate tauna.” 32 Ei mai nadupa, nopaganai napa to iuli Yesus nangkambelai bewa mei dala kamate-Na.a
33 Nehua nculimi Pilatus rau i rara houna nampekune Yesus iwei, “Magau to Yahudi-Ko?”
34 Nehono Yesus, “Pepekunemu ei lako hi iko motodi, ba to ntaninadi to nangkewoka-Ko nangkambelai Aku?”
35 Iulina Pilatus iwei, “Iuli-Mu Iko, to Yahudi'a? Hira to hangu ngata-Mu moto pade imam-imam to i matana to nangkeni-Ko tumai. Napa gagadi hala-Mu?”
36 Iuli Yesus, “Aku moma magau lako dunia ei. Ane ke magau lako dunia ei-'A, rapehimukuira dohe-Ku bona nemo-'A rapopewai hi to pangkeni to Yahudi. Naupawee, moma-'A magau lako dunia ei!”
37 Alaana nepekune mui Pilatus hi Hia, “Ane wetu, magau-Ko?”
Nehono Yesus, “Iko motomi nanguli ane Aku ei magau. Aku laiote pade narata i dunia ei, bona moparata nangkambelai to nakono. Butu tauna to nantarima to nakono, nangepe to iuli-Ku.”
38a Nepekune mui Pilatus hi Yesus, “Napa muihawo to iuli to nakono etu?”
Yesus laihuku mate
38b Nahudupi Pilatus nanguli lauria, nehuwu muimi nampotomukara to pangkeni to Yahudi pade nangulikara, “Moma naria hodia kahalaa Tauna ei lairataku. 39 Naupawee, mantuku kabiahaami, kubakahaka komi hadua to laitarungku i eo bohe Paskah to Yahudi. Madota komi ane Magau to Yahudi ei kubakahaka komi?”
40 Nongareramo tauna ee nanguli, “Nemo Tauna ei to mubakaha! Bakahami Barabas hi kami!” Barabas ee mai hadua lako tauna to nampaewa to poparenta Roma.