Yesus laipopewai hi Pilatus pade kamate Yudas
27
1 Hampepulo ngkii, humawee imam to i matana pade totua-totua ngata to Yahudi nahiromu pade nobotuhi mampatehi Yesus. 2 Laihilura Yesus pade laikenira rapopewai hi gubernur Pilatus, to laiongko Magau Bohe Roma noparenta i Yudea.3 Hangka Yudas to nampobalu Yesus nampahilo ane rahuku matemi Yesus, laihohonami rarana. Laipopanculina doi to tolu mpulu halaka ee mai hi imam-imam to i matana pade hi totua-totua ngata to Yahudi, 4 iulina, “Nadoha'amo aku ei, apa nampobalu tauna to moma nahala hampena laihuku mate-'I.”
Naupawee nehonora, “Moma uruhia kami etu! Uruhiamu motokowo!”
5 Lauparia Yudas nampopepana doi ee mai i rara Hou Alatala, pade raumi notoe wotona nekahunca.
6 Imam-imam to i matana nangala doi ee pade iulira, “Moma mamala doi ei rapopehua rara peti pewaia, apa doi ei oli raa.” 7 Napurapa nolibu, doi ee mai laipopangolira tana to rapakera mawali popatanaa to rata. Tana to iolira ee mai, ilodo laikahangai Tana to Pobabei Kura Tana. 8 Etu pade duu ei mai tana ee laikahangai Tana Raa. 9 Hante kajadia lauria laipaganaimi lolita to laiuli nabi Yeremia owi iwei, “Laitarimara tolu mpulu doi halaka, etumi oli-Na to laipakatantura to Israel, 10 pade doi ee mai laipakera nangoli tana to pobabei kura tana, ewa to laibohaka-Na'a Pue.”
Yesus i tingoo gubernur Pilatus
11 Napu ee Yesus laikenira hi gubernur Pilatus. Gubernur ee nepekune hi Yesus, “Magau to Yahudi-Ko?”
Nehono Yesus, “Iko motomi nanguli.”
12 Naupawee humawee perai to laiulira imam to i matana pade totua-totua ngata to Yahudi hi Yesus, moma'i laihonoi-Na nau hamati. 13 Lauparia Pilatus nangulika Yesus, “Moma iepe-Mu nadeadamo peraira habi ei mai hi Iko?” 14 Naupawee moma'i nowotu Yesus, hampena nahera mpuu'i Pilatus.
15 Ewa kabiahaa gubernur, butu mpaena tempo eo bohe Paskah to Yahudi, nabakaha hadua to laitarungku mantuku dota todea. 16 Tempo ee mai naria hadua i rara tarungku, to laincani mpuu kadaa ingkuna. Hangana Yesus Barabas. 17 Kahiromura todea i po'ohaa Pilatus, nepekunemi Pilatus hi hira, “Hema dotami kubakaha, Yesus Barabasdi ba Yesus to ikahangai Kristusdi?” 18 Laincanina amimi Pilatus ane Yesus laipopewaira habana hiri rarara.
19 Bulana Pilatus noncuna i kadera pobotuhia, bangkelena nopakatu peboha hi hia iwei, “Nemo mu'umpui uruhia Tauna to moma nahala etu, apa habana Hia, naheha mpuu iepeku rara pangipiku ngkawengia wei.”
20 Naupawee imam-imam to i matana pade totua-totua ngata to Yahudi nampaukeira todea bona raperapira Barabas to rabakaha pade Yesus rahuku mate.
21 Pilatus nampekunera todea, “Hema lako to rodua ei mai to miperapi kubakaha?”
Nehonora, “Barabas.”
22 Iulina Pilatus hi hira, “Ane wee, napa to kubabei hi Yesus to laikahangai Kristus?”
Humaweera nehono, “Salib-'I!”
23 Iulina mui Pilatus, “Napa pade rasalib-'I? Ingku napa to nadaa laibabei-Na?”
Nahimukuki lauramo nongare, iulira, “Salib-'I!”
24 Hangka laihilona Pilatus momami naria bununa mangulikara todea ee mai, habana narimbohokimi pongarera pade nopamulami nagado, laialanami ue pade nowano i tingoora todea ee mai pade iulina, “Moma kupohala aku kamate Tauna ei. Komi motokowo to mangkolo!”
25 Pade humawee todea ee mai nehono, “Palelemi kamate-Na kikolo kami pade muli kami!”
26 Napu ee Pilatus nampabakaha Barabas hi todea, pade Yesus laipopewaina hi tantarana bona racambura pade rasalibra.
Yesus laipopore
27 Napu ee tantara-tantara gubernur Pilatus nangkeni Yesus nehua rara hou po'ohaa gubernur pade laikiora humawee tantara ntanina mahiromu mampatikuhi Yesus. 28 Lailoncura waru Yesus pade laiwaruira-'I hante waru to nalei ewa waru magau. 29 Laibabeira tali patoko lako dunumpu rui ewa tali patoko magau, pade laibolira i woo-Na. Laipakakamuira mui-'I hangu lua i pale kana-Na ewa lua to laipake magau. Napu ee notingkoduramo i tingoo-Na pade nampopore-'I, iulira, “Tabe hi Iko, Magau to Yahudi!” 30 Napu ee laitailuhira-'I pade laialara lua ee mai lako pale-Na pade bahangkua ngkani laipaokara woo-Na. 31 Napurapa nampopore-'I, lailoncurami waru to laipakekara-'I pade laiwaruira nculi-'I hante waru-Na moto, pade laikenirami rau hawaliku ngata bona rasalib.
Yesus laisalib
32 Bulara nomako nehuwu lako ngata, laipotomura hadua tauna lako Kirene to laikahangai Simon. Tantara eera mai nampahuru Simon mopahaa salib Yesus. 33 Lauparia narataramo i hangu bulu to laikahangai Golgota, batuana: Pobolia Banga Woo. 34 I ria Yesus laipainuira anggur to napai apa laigalo hante pou. Hangka laipetami-Na, moma-'I nadota nanginu. 35 Napurapa nosalib Yesus, laibagi-bagirami waru Yesus hante nocabu lot. 36 Napu ee noncunaramo i hee nampodoo-'I. 37 Pade i wongko woo-Na, laiparikara dopi to laitulihi napa habana pade laisalib-'I. Iwei monina, “Eimi Yesus Magaura to Yahudi.” 38 Naria mui rodua to perampaki laisalib dohe-Na, hadua mali pangkana-Na pade hadua mali pangkai-Na.
39 Tau-tauna to noliu i hee, notalibi nampopore-'I pade 40 iulira iwei, “Iuli-Mu wei, Mupakaropodi Hou Alatala pade Mupatuna nculi rarana tolu eo. Ane nakono-Ko Ana Alatala, pakahalamami woto-Mu pade pehompomo-Ko lako kau salib etu!”
41 Wee mui imam-imam to i matana hingkani-ngkani hante hira to nataualu buku Taurat pade totua-totua ngata to Yahudi nampopore-'I, iulira iwei, 42 “Tau ntanina laipakahalama-Na, woto-Na moto moma namala laipakahalama-Na! Hia ei mai Magau to Israel? Ane wee, palelemi mehompo lako kau salib ee mai bona meparahaya kami hi Hia. 43 Hia nampaharumaka Alatala, pade iuli-Na Hia Ana Alatala. Mai tahilo, ane madota-'I Alatala mampakahalama-'I!”
44 Rodua to perampaki to laisalib dohe-Na mui, nampopore-'I ewa ee.
Yesus namate
45 Nopamula lako tinti hampulu rongu mpoeo lia duu tinti tolu ngkinuwia, humangkulili ngata ee mai nawali nalimau. 46 Maria tinti tolu ngkinuwia, nongaremi Yesus, iwei, “Eli, Eli, lama sabakhtani?” Batuana: Alatala-Ku, Alatala-Ku, napa pade laipalahi-Mu-'A?
47 Nangepe lauria, bahangkua dua to nokangkore i hee nanguli, “Hilo, nangkio Elia-'I.”
48 Napu ee nokumenomi hadua lako hi hira, nangala bunga to ewa tamomo pade lailomena i rara ue anggur to naonco, pade laijujukana hi Yesus nampake doa bona mamala Nainu. 49 Naupawee to ntanina nanguli, “Nemo, tahiloidi baka marata mpuu'i Elia mampakahalama-'I.”
50 Napu ee nongareki muimi Yesus, pade popewai-Nami inoha-Na hi Alatala. 51 Tempo ee mai powide rara Hou Alatala nahia ntongo lako wongkona duu nauna. Naria linu bohe, pade watu-watu to nabohe nabika. 52 Dayo-dayo natebea, pade nadea todea Alatala to namateramo laipakatuwu nculi 53 pade nehuwu lako dayora. Natuwu nculipi Yesus, tauna to natuwu nculi eera mai nehua i ngata Yerusalem pade nadea tauna nampahilora.
54 Kapitee tantara hante tantara-tantara to nampodoo Yesus nawali naeka purara namparasai linu pade nampahilo humawee to nadupa lauria. Iulira, “Nakono mpuu, Hia ei Ana Alatala.”
55 I hee mai nadea bangkele to nampahilo humawee lauria lako ka'awaana. Hira ee mai bangkele to nantuku pade nantulungi Yesus hinungkai lako Galilea. 56 Dohera bangkele ee mai nariara Maria Magdalena, Maria tina Yakobus pade Yusuf, pade bangkele Zebedeus.
Yesus laitana
57 Ngkinuwia mparopi, naratami hadua to nahugi, hangana Yusuf. Hia ee mai to Arimatea, pade hia mui to pantuku Yesus. 58 Rau'i Yusuf nampotomuka Pilatus pade namperapi wataloka Yesus. Lauparia Pilatus nangulikara tantarana bona wataloka Yesus rapopewai hi Yusuf. 59 Yusuf nangala wataloka Yesus pade laibunguna hante kae bula to nagaha. 60 Wataloka Yesus laidulena i rara dayona to poma'i laipake. Dayo ee mai laipaa amimi i rara bulu watu. Napu ee laiduliana hangu watu bohe laipopowuntana dayo ee mai, pade raumi. 61 Pade Maria Magdalena hante Maria to ntanina noncuna i tingoo dayo ee mai.
Dayo Yesus laipodoora tantara
62 Kanailena, i eo Pentuua to Yahudi, narataramo imam-imam to i matana pade hira to Farisi nampotomuka Pilatus. 63 Iulira, “Tuama, lailinga kami ane Tauna to nepahalatara ee wei, tempo katuwu-Nadipi naria iuli-Na iwei, ‘Eo katoluna mei, matuwu nculi-'Amo.’ 64 Etumo, tuduramo tauna mampodoo dayo-Na duu eo katoluna. Apa ane moma, maratara mei ana guru-Na mampangio wataloka-Na, pade raulirami hi todea, natuwu nculi-'Imi lako lentongora to mate. Ane wee mei, melabipi kadaana pepahalatara to ngkapurina lako pepahalatara to pamulana.”