22
1 Paulus nanguli iwei, “Tuama-tuama pade ompi-ompiku humawee! Epe'a olu manguli pampotolawaiku wotoku.” 2 Nangepe Paulus nobaha Ibrani, nantambaikimi kalinora.Lauparia padolanami Paulus jaritana, 3 “Aku ei to Yahudi, laiote i Tarsus i propinsi Kilikia. Naupawee laipakabohe i Yerusalem hei'a pade laipatudu pumpuna'a guru bohe Gamaliel nangkambelai patudu to laiparata Musa hi tumpulokota. Natigu mpuu'a nanturuhi parenta Alatala nahibali hante komi ei. 4 Laipakahehakura tauna to nantuku patudu nangkambelai Yesus ee hampe namate. Balailo bo bangkele laihokoku pura pade laipahuaku i rara tarungku. 5 Mamalara Imam Bohe pade humawee to Pobotuhi Agama mohabi ane napa to iuliku ei nakono. Apa hirami to nampawai'a hura parenta to rawaikara to Yahudi i Damsyik. Hante hura ee, mamala'a mampahoko pade mohilu tauna to namparahaya patudu nangkambelai Yesus pade kukeni rumai i Yerusalem rahuku.
6 Naupawee, rara pomakoaku lau marata i Damsyik, mpoeo lia, ngkali naria baa lako i langi to nabaa mpuu nampawanta'a. 7 Lauparia nadungka'a pade laiepeku to pojarita nangulika'a, ‘Saulus! Saulus! Napa pade laipakahehamu-'A?’
8 Laihonoiku-'I, ‘Hema-Ko Pue?’
Nehono-'I, ‘Akumile Yesus to Nazaret to laipakahehamu.’ 9 Tauna to laipodoheku eera nampanaa baa ee mai naupawee moma laiepera to pojarita ee.
10 Nepekune mui'a, ‘Napa to kana kubabei, Pue?’
Nehono Pue, ‘Peongkomoko pade pehuamoko i Damsyik. Riadimi pade Alatala mangkewokako napa to laipodota-Na mubabei.’ 11 Nawali naburo'a nampahilo baa to nepakawilo. Aji dohe-doheku nampanini'a nehua i Damsyik.
12 I ngata ee, naria hadua to ikahangai Ananias to natigu nantuku patudu Taurat. Humaweera to Yahudi to natida i Damsyik nampabila'i. 13 Narata'i nokangkore i humpiiku pade nanguli, ‘Saulus ompiku, penaa nculimoko!’ Tempo ee mui narawami Ananias laihiloku.
14 Napu ee iulikana'amo Ananias, ‘Alatala tumpulokota nampelihiko bona muncani patuju-Na. Laipelihi-Nako bona muhilo Yesus, Batua Alatala to Nanoro pade muepe jarita to nehuwu lako ngudu-Na. 15 Iko mei kana mawali habi-Na pade mangkarebai hi humawee tauna nangkambelai napa to laihilomu pade to laiepemu. 16 Welau ei, nemopako mokarara. Dungku peongkomoko, popewaimi wotomu radiu pade pohambayamoko hi Pue bona ra'ampunimi humawee dohamu.’
17 Panculiku i Yerusalem pade bulaku nohambaya i Hou Alatala, ngkali laiwaika'a hangu pehiloa. 18 Laihiloku Pue pade laiulika-Na'a, ‘Palahimi mahomi Yerusalem ei, apa moma raepera to Yerusalem ei napa to iulimu nangkambelai Aku.’
19 Nehono'a hi Pue, ‘Pue, laincanira mpuu ane akumi to rau i hou-hou pepuea nampahoko pade nampawebara to neparahaya hi Iko bo nopahuara i rara tarungku. 20 Wee mui tempo popatehi habi-Mu Stefanus, ria'a pade laipohitujuku popatehi'i. Akumi to nampodoo waru tauna to nampatehi'i.’
21 Naupawee Pue nampahonoi'a, ‘Koimoko, apa Kutuduko rau ngata ka'awaana hi hira tauna to moma Yahudi.’ ”
22 Hudu hee aga laiepera jarita Paulus. Napu ee, nongareramo nanguli, “Patehimi tauna etu! Moma'i mahipato matuwu!” 23 Hamalira nongare, laitenera waru pokarolapiira pade awu tana rau i lolona apa nahodo gagaramo.
Paulus i po'ohaara tantara
24 Lauparia, komandaa tantara ee nantudu mangkeni Paulus mehua rara po'ohaara tantara pade rapekune hamalina racambu bona rancani napa pade laingarehira ewa ee'i Paulus. 25 Naupawee, bulana laihilu rau racambudipi, Paulus nangulika kapitee tantara to naria i hee, “Namaladihawo mangkadungkui todea Roma kapomana rabotuhi napa halana?”
26 Nangepe lauria, raumi kapitee tantara ee nangulika komandaana, “Tuama, napami to mubabei? Apa tauna ee ria, todea Romadikowoele.”
27 Lauparia, raumi komandaa ee nampekune Paulus. Iulina, “Nakonoko todea Roma?”
Nehono Paulus, “Io, nakono.”
28 Iulina komandaa ee, “Nadea mpuu pobayariku hampe namala'a nawali todea Roma!”
Nehono Paulus, “Ane aku, todea Roma ami'a lako iote.”
29 Nangepe lauria nangkohuramo tantara to lau mangkadungkui Paulus. Naekami komandaa ee, apa bela laihilunami Paulus, bo Paulus ee todea Romadi.
Paulus i tingoo to Pobotuhi Agama
30 Komandaa tantara ee mingki mangincani napa kakonona kahalaa Paulus to laipangadukara to Yahudi ee. Etu pade kanailena laipetuduina mangala Paulus lako rara tarungku pade laikiona imam-imam to i matana pade humawee to Pobotuhi Agama Yahudi motomu. Napu ee laikenina Paulus rau nantingohira to Pobotuhi Agama ee.