23
1 Paulus nampenotora to Pobotuhi Agama pade iulikanara, “Ompi-ompi, rara katuwuku duu welau ei, nagaha moto raraku i tingoo Alatala.” 2 Nangepe lauria, Imam Bohe Ananias nantudu tauna to nokangkore i humpii Paulus nampahapa ngudu Paulus. 3 Lauparia Paulus nangulika Imam Bohe ee, “Nahapa Alatalako mei, iko tauna to nabelo wongko! Noncunako etu nampabotuhi'a nantuku patudu Taurat, bo iko moto nantiboki patudu Taurat ee hante nantudu tauna nampahapa'a.”4 Tauna to i heera nangulika Paulus, “Laipoporemu Imam Bohe Alatala!”
5 Nehono Paulus, “Ompi-ompi, moma incaniku ane Imam Bohe'i. Naria ami laitulihi rara Buku to Nagaha, ‘Nemo madaa bahamu nangkambelai to pangkeni todeamu.’”
6 Apa laincanina Paulus ane i rara to Pobotuhi Agama ee, nariara to Saduki pade naria muira to Farisi, laipahimukuina nangulikara, “Ompi-ompi! Aku ei to Farisi, muli to Farisi. Laipareha'a ei habana laiparahayaku ane tauna to namate kana rapakatuwu nculi.” 7 Pangulina iwee, nohihalaramo to Farisi pade to Saduki hampena potomua ee nawali hore nopahamikaramo. 8 Apa to Saduki nanguli, ane manuhia to namatemi momami matuwu nculi. Moma mui parahayara ane naria malaeka Alatala, lembayo to mate pade anudaa. Bo to Farisi eera mai, parahayara mpuu ane naria humaweena ee mai.
9 Lauparia, nawali nogehoramo. Bahangkua duara to Farisi to nawali guru agama neongko bo nampabilira to Saduki ee, iulira, “Ane kami, tauna ei moma naria hodia halana. Nemo-nemo naria inoha ba malaeka to nojarita hi hia.” 10 Nadaa mpuumi pomebilira hampena naekami komandaa ee, nemo-nemo rapomerentaira mei Paulus ee. Laituduna harombonga tantarana rau nangala Paulus lako lentongora pade laikenira rau po'ohaara tantara.
11 Ngkawengiana, naratami Pue nokangkore humpii Paulus pade nangulika'i, “Pakaroho raramu Paulus. Apa nohabimoko nangkambelai Aku i Yerusalem, wetu moto muiko kana mohabi nangkambelai Aku i Roma.”
Pohikongkora to Yahudi mampatehi Paulus
12 Hampepulo kanailena, nohikongko pade nosumparamo bahangkua dua to Yahudi, momara mangkoni ba manginu ane poma'i rapatehira Paulus. 13 To nohikongko eera mai nelabi lako opo mpulu dua kadeara. 14 Rauramo hi imam-imam to i matana pade totua-totua ngata to Yahudi nanguli iwei, “Nosumpa puramo kami, poma kami mangkoni ba manginu napa-napa ane poma'i kipatehi Paulus. 15 Etumo, komi hante to Pobotuhi Agama, pakatu hura rau hi komandaa tantara Roma ee ria mamperapi bona rakeni nculi'i Paulus i tingoomi pade ntumoni miparehaki belo'i. Hamali ee nahadiamo kami mampatehi'i kapomana marata hi komi.”
16 Naupawee, hadua kabilaha, ana ompi Paulus bangkele, nangepe lauria. Lauparia, raumi i po'ohaara tantara nangkewoka Paulus. 17 Paulus nangkio hadua kapitee pade iulikana'i, “Keni'i kabilaha ei rau hi komandaa, apa naria to nakewoka'i.”
18 Kapitee ee nangkeni kabilaha ee rau hi komandaana pade nanguli, “Paulus to laitahata nangkio'a pade laituduna'a nangkeni kabilaha ei hi iko. Naria to mingki nauli.”
19 Komandaa ee nangkakamu pale kabilaha ee, laikenina nopatani pade laipekunena, “Napa to mukewoka'a?”
20 Nehono kabilaha ee, “Nariara to Yahudi nohikongko mamperapi hi iko bona maile mukeni Paulus rau hi hira to Pobotuhi Agama, ntumoni raparehakira belo. 21 Nemora muturuhi. Apa nelabi opo mpulu dua amira to nentaleru i dala mampalawa'i. Nosumpa puraramo momara mangkoni ba manginu kapomara mampatehi Paulus. Welau ei nahadiaramo. Nampopea kahitujumuradamo.”
22 Nehono komandaa ee, “Nemo hema haduaa mukewoka katumaimu nangkewoka'a.” Napu ee laitudunami kabilaha ee nanculi.
Paulus laiencu rau Kaisarea
23 Komandaa ee nangkio rodua kapitee pade iulikanara, “Pahadia roatu dua tantara biaha hante pitu mpulu dua tantara to pojara, roatu dua mui tantara to potawala meongko tinti hahio ngkawengia ei rau i Kaisarea. 24 Pahadia mui jara nahawi Paulus, pade keni'i rau hi Gubernur Feliks i Kaisarea, podoo belo'i bona mahalama'i.” 25 Lauparia, komandaa notulihi hura. Iwei moni hura ee:
26 “Tabe hi Gubernur Feliks to laipemabohe.
Ei hura lako aku Klaudius Lisias.
27 Tauna ei laihokora to Yahudi pade ke nono rapatehira. Apa iepeku ane todea Roma'i, narata'a hante tantaraku nampakahalama'i. 28 Bona kuncani napa halana, laikeniku'i rau i tingoo to Pobotuhi Agamara. 29 Laihiloku, moma naria halana to mahipato rahukuka mate'i ba ratarungkuka'i. Pangaduara ee muntu nangkambelai patudu agamara moto aga. 30 Naria mui to nangkewoka'a ane naria liwora bahangkua dua to Yahudi mampatehi'i. Etu pade dungku laipakatuku'i tulau hi iko Gubernur, pade laituduku muiramo to nampangaduka'i tulau mangadu hi iko.”
31 Tantara eera mai nampobago napa to laibohakanara komandaa ee. Laialara Paulus pade ngkawengia ee mui laikenira'i olu hudu Antipatris. 32 Kanailena, tantara to pojararadamo nadola nampabawa Paulus rau i Kaisarea. Tantara to ntanina nanculi rau po'ohaara i Yerusalem. 33 Karatara i Kaisarea, tantara to pojara eera nampopewai hura pade Paulus hi gubernur. 34 Nahudupi laibahana gubernur hura ee, nepekunemi hi Paulus rima ngatana. Hangka laincanina ane Paulus ee to Kilikia, 35 nojaritami gubernur ee hi Paulus, “Maratarapa tauna to nampangadukako ee, kuparehami uruhiamu.” Napu ee laiparentaina tantara bona Paulus ee rataha olu i hou to laibabei Herodes.