Paulus laipangaduka to Yahudi
24
1 Alima eo naliu, Imam Bohe Ananias pade bahangkua dua totua ngata to Yahudi narataramo i Kaisarea. Laipodohera hadua tauna to nataualu atura Roma to laikahangai Tertulus. Rauramo i tingoo Gubernur Feliks pade nanguli pangaduara. 2 Laikiomi Paulus rau i tingoo gubernur ee pade laiwaikami Tertulus loga manguli pangaduana. Iulina Tertulus, “Gubernur Feliks to laipemabohe kami, hinungkai iko nawali gubernur, na'ama moto ngata kami. Apa nadea timbamu noparenta, nadeamo to laipakabelokimu i ngata kami. 3 I rima-rima poparentamu to nabelo etu laitarima kami pade laibila kami moto oa hante nanguli nadea belona. 4 Naupawee, bona nemo mapu mara logamu, kuperapi bona madotako mangepe pangadua kami ei hangoni.5 Nanotomi hi kami ane tauna ei nangkeni hilaka ewa haki to nelelei. I rima-rima'i i dunia ei nampopogeho to Yahudi. Hia ei mui to pangkenira to nantuku patudu to nahalatara nangkambelai Yesus to Nazaret. 6 Moma aga ee, laipehobana mui nampakarumu Hou Alatala. Etu pade laihoko kami'i pade mingki kami mampabotuhi'i mantuku patudu Taurat kami. 7 Naupawee Komandaa Lisias namparampaki'i lako rara mpale kami 8 pade nantudura to pangadu ee rumai hi iko. Ane mupareha tauna ei, muepe motomi ane nakono napa to iuli kami.” 9 Humaweera to Yahudi to naria i hee nampangaduka Paulus pade nampemakono pangadua to laiuli Tertulus.
Paulus nampotolawai wotona i tingoo Feliks
10 Gubernur ee nampawaika Paulus loga mojarita. Lauparia, nojaritami Paulus, “Gubernur to laibilaku, ncaniku nadea mpaemoko nawali to pobotuhi i ngata ei. Etu pade nagoe raraku laiwaikamu'a loga mampotolawai wotoku i tingoomu. 11 Mamala mupekune hi tau ntanina ane kakonona hampulu roeo'adapa narata i Yerusalem, narata'a mepue. 12 Moma'a naria lairatara to Yahudi ee nobungka hante haduaa tauna pade moma'a naria nampaukei tauna bona mobabei pogeho, belo i Hou Alatala, i hou-hou pepuea ba i rima-rima rara ngata. 13 Moma naria bakena lako humawee to laipangadukara'a to mamala rapahiloira hi iko. 14 Naupawee mangaku'a hi iko tuama, ane aku ei nepue hi Alatala tumpuloko kami nantuku patudu Yesus to iulira nahalatara. Laiparahayaku humawee napa to laitulihi i rara buku Taurat pade buku nabi-nabi. 15 Aku mui ewa hira nampaharumaka Alatala, ane humawee to namate kana matuwu nculi, to nanoro ingkuna bo to nadaa ingkuna. 16 Etu pade pehimukuiku mpuu, bona magaha raraku i tingoo Alatala pade i tingoo manuhia.
17 Bahangkua mpae'amo moma no'oha i Yerusalem, nanculi'a rau ria nangkeni doi petulungi hi ompi-ompiku to Yahudi pade mojuju kurban hi Alatala. 18 Nahudu'apa nobabei ada pampegaha woto, bahangkua dua to Yahudi lako propinsi Asia namparata'a i Hou Alatala bulaku nojuju kurban hi Alatala. Tempo ee moma naria todea laipodoheku pade moma naria pogehoa. 19 Kakonona, to Yahudi lako propinsi Asia eerada to marata hi iko hei mampangaduka'a, ane rapana maria to mingki rapangadukara nangkambelai aku hi iko tuama. 20 Ane moma iwee, paleleramo tauna to naria eira manguli napa halaku to lairatara tempoku laibotuhi i tingoo to Pobotuhi Agama. 21 Hangaa aga jaritaku to laipodaara tempo ee. Apa tempoku i tingoora iulikakura iwei, ‘Laipareha'a welau ei habana laiparahayaku katuwu nculira tauna to namate.’ ”
22 Lauparia, Gubernur Feliks to laincaninami patudu nangkambelai Yesus, nampopentuu poparehana ee pade iulina, “Uruhiami ei kubotuhi ane maratadimi Komandaa Lisias.” 23 Lauparia laitudunami kapitee tantarana mampataha Paulus. Naupawee, moma'i laipatuhura pade laipaliu moto dohe-dohena mangkenika'i kaparaluana.
Feliks nangkioki nculi Paulus
24 Bahangkua eo naliu, naratami Feliks hante bangkelena to laikahangai Drusila. Bangkelena ee to Yahudi. Laituduna tauna mangkio Paulus, pade laiepena Paulus nampojarita nangkambelai peparahaya hi Kristus Yesus. 25 Paulus nanguli ane ingkuta kana manoro pade nemota mantuku dota rara to nadaa, apa marata mei eo pobotuhia manuhia. Nangepe lauria naekami Feliks, iulina, “Hudu heimi olu! Pehuwumoko. Ane maria loga belo, kukiokidamoko.” 26 Feliks nampaharumaka Paulus mampawaika'i doi. Etu pade naharo'i nangkio Paulus pade nampojaritaka'i.
27 Naganapi rompae, laipahawami Feliks. To nampahawa Feliks nawali gubernur ee hangana Perkius Festus. Feliks mingki mangala rarara to Yahudi, etu pade laipalelena motomi Paulus laitarungku.