Paulus i tingoo Festus
25
1 Tolu eodipi Festus narata i propinsi ee, neongkomi lako Kaisarea rau i Yerusalem. 2 I hee imam-imam to i matana hante to pangkeni to Yahudi narata hi hia nampangaduka Paulus. Laipehimukuira nampalanai Festus 3 bona mabelo rarana hi hira pade madota'i mantudu tauna mangkeni Paulus marata i Yerusalem, apa nohikongko muiramo to Yahudi ee mampatehi Paulus i dala. 4 Naupawee Festus nampahonoira, “Paulus laitaha i Kaisarea pade aku mui moma'amo mahae manculi rau ria. 5 Aji, hema-hema lako hi komi ei to nawali to pangkeni madota rau doheku, rautamo. Ane naria halana mipangaduka riadimi.”6 Ba maria walu eo ba hampulu eopi Festus no'oha i Yerusalem. Napu ee nanculimi rau i Kaisarea. Kanailena laibabeinami libu pobotuhia pade laituduna tauna mangala Paulus. 7 Karata Paulus i hee, humawee to Yahudi to narata lako Yerusalem nokangkore nampatikuhi'i pade nampangaduka'i. Nadea ngaa kahalaa to nantomo laipangadukara'i, naupawee moma'i namala popobakera pangaduara.
8 Lauparia, Paulus nampotolawai wotona, iulina, “Moma naria hodia kahalaaku hi patudu agama to Yahudi, hi Hou Alatala ba hi Magau Bohe Roma.”
9 Naupawee, apa mingki'i Festus mangala rarara to Yahudi, nepekunemi hi Paulus, “Madotako rau i Yerusalem bona i riadimi kubotuhi napa to laipangadukarako?”
10 Nehono Paulus, “Tuama, nokangkore i pobotuhia kamagaua Roma'amo ei. Kakonona, i hei'amo rabotuhi. Laincanimu moto ane moma naria halaku hi hira to Yahudi. 11 Aji, ane naria halaku to mahipato rahukuka mate'a, madota'a mamate. Naupawee, ane moma'i nakono to iulira, moma naria haduaa to mamala mampopewai'a hi hira. Welau ei kuperapi, rau rabotuhi i tingoo Magau Bohe Roma'a!”
12 Nahudupi Festus nolibu hante dohe-dohena to nataualu atura Roma, iulikanami Paulus, “Perapimumi rabotuhi i tingoo Magau Bohe Roma. Aji, kana rauko mantingohi Magau Bohe Roma.”
Festus nangkewo uruhia Paulus hi Magau Agripa
13 Bahangkua eo lako ee, narataramo Magau Agripa hante Bernike i Kaisarea mampemabohe Festus habana laiongko nawali gubernurmi. 14 Bahangkua eorapa i hee, laituturanami Festus uruhia Paulus ee hi Magau Agripa. Iulina Festus, “Naria hadua eiri to laitaha tempo poparentaa Feliks. 15 Kariaku i Yerusalem, tauna ei laipangadukara imam-imam to i matana pade totua-totua ngata to Yahudi hi aku pade laiperapira bona kuhuku'i. 16 Naupawee, laihonoikura ane moma mamala to Roma mampopewai mara tauna rahuku ane to laipangaduka ee poma'i mometingohi hante to nampangaduka'i. To laipangaduka ee kana rawai loga mampotolawai wotona i tingoora to nampangaduka'i. 17 Aji, karatara rumai hei momami leba laipegikaku, kanailena dungku laibabeiku libu pobotuhia pade laipetuduiku bona tauna ee rakeni i tingooku. 18 Naupawee, pokangkorera tauna nanguli pangaduara, moma naria hangua kahalaa to iulira ewa to laipekiriku. 19 Hira ee mai nonehalapaha motora hante Paulus nangkambelai agamara pade nangkambelai hadua Tauna to laikahangai Yesus. Tauna to laikahangai Yesus ee namatemi. Naupawee, Paulus nanguli ane Tauna ee natuwu moto-'I. 20 Apa naingu raraku nangepe uruhia lauria, nepekune'a hi Paulus baka madota'i rau i Yerusalem rabotuhi ria nangkambelai uruhiana ee. 21 Naupawee, Paulus namperapi bona rataha motomi olu duuna uruhiana nabotuhi Magau Bohe. Etu pade laitahaku dola'i duuna maria logaku mampakatu'i rau hi Magau Bohe.”
22 Iulina Agripa hi Festus, “Mingki kuepe muikuwo tauna etu mojarita.”
Nehono Festus, “Mailedimi muepe.”
23 Kanailena, narataramo Agripa pade Bernike hante nampahiloi kabohe pangkara. Nehuaramo i rara hou pobotuhia hante bahangkua dua komandaa tantara pade tauna to laibila i rara ngata ee. Festus nampetudui bona Paulus rakeni i pobotuhia ee. 24 Lauparia, iulina Festus, “Magau Agripa hante komi to nehupa ei, humawee to Yahudi i Yerusalem pade i ngata ei nampangaduka tauna ei hi aku. Naratara ngare-ngarena nanguli ane hia ei momami mahipato rapalele matuwu. 25 Naupawee, moma naria halana lairataku to mahipato rahukuka mate'i. Apa laiperapina bona uruhiana ei nabotuhi Magau Bohe, noliwo'a mopakatu'i rau hi Magau Bohe, 26 aga poma ncaniku napa to kana kutulihika Magau Bohe nangkambelai tauna ei mai. Etu pade laikeniku'i hi komi, pelabina hi iko Magau Agripa. Bona ane mapupi tapareha, mariami to kutulihika Magau Bohe. 27 Apa mantuku pampekiriku, moma mahipato mopakatu to laitaha rau hi Magau Bohe ane moma'i maria ratulihi pangadua nangkambelai tauna ee.”