Pehono Paulus i tingoo Magau Agripa
26
1 Iulina Agripa hi Paulus, “Mamalako mehono mampotolawai wotomu.”Paulus notano palena pade noparata honona iwei, 2 “Magau Agripa, norahi mpuu'a apa welau ei namala'a nanguli pampotolawaiku wotoku i tingoomu nangkambelai humawee napa to laipangadukara'a to Yahudi. 3 Pelabina laincanimu mpuu ada pade patudu to laipomehonoi to Yahudi. Etumo, kuperapi hi iko, bona mohabarako mangepe jaritaku.
4 Ncanira mpuu humawee to Yahudi bewa dala katuwuku lako kanguraaku. Apa lako kakodiakumi no'oha dohera ompiku to Israel i ngata Yerusalem. 5 Nahae'amo laincanira. Ane madotara, mamalara mohabi ane aku ei to pantuku patudu to Farisi, to nelabi karoho aturana rara agamata to Yahudi. 6 Welau ei, laikeni'a i pobotuhia ei habana laiparahayaku tipa to laiuli Alatala hi tumpulokota to Yahudi. 7 Kaganaa tipa eemile to laipopea muli hampulu rontina tumpuloko Israel pade natigura nepue hi Alatala eona bo bengina. Magau Agripa! Habana neparahaya'a hi tipa Alatala eemile pade laipangadukara'a to Yahudi. 8 Napadikona pade moma'i parahayami ane Alatala mamala mampakatuwu nculi to mate?
9 Ilodo, aku moto nampekiri ane kana kupehimukui mpuu mampaewa hanga Yesus to Nazaret ee. 10 Laibabeiku lauria i Yerusalem. Hante hura parenta to laiperapiku hi imam-imam to i matana, nadea tauna to neparahaya hi Yesus laipahuaku i rara tarungku. Moma wuwu ee, nahituju mui'a ane tauna eera mai rapatehi. 11 Naharo'a nampakahehara i rara hou-hou pepuea pade laipahurukura mampahapuaka peparahayara. Nahodo mpuu'a hampena laidapakura duu i ngata ntanina.
12 Etu patujuku pade laikeniku hura parenta lako imam-imam to i matana rau i Damsyik. 13 Magau Agripa, lentongo dala, mpoeo lia, ngkali naria baa lako langi to nelabipi kabaana lako eo. Baa ee newanta nampatikuhi'a hante hira to laipodoheku. 14 Nadungka pura kami pade laiepeku to pojarita rara baha Ibrani iwei, ‘Saulus, Saulus! Napa pade laipakahehamu-'A? Mampakaheha wotomu motoko ane muewa dota Alatala.a’ 15 Nehono'a, ‘Hema-Ko Pue?’ Nehono Pue, ‘Akumi Yesus to laipakahehamu. 16 Pematamoko pade pokangkoremoko! Nerawa-'A hi iko apa Kuongkoko mawali batua bo habi-Ku. Kana mukarebai napa to laihilomu welau ei pade to Kupahiloikako mei. 17 Kupakahalamako lako tau-tauna to Yahudi pade tau-tauna to moma Yahudi. Kutuduko rau hi hira 18 mobunge matara, bona megolira lako kalimaua mehua i rara baa pade matebakahara lako baraka Magau Heta manculi hi Alatala. Bona hante peparahayara hi Aku doha-dohara ra'ampuni pade hira mawali todea to laipelihi Alatala.’
19 Magau Agripa, etumi pade laipehimukuiku mpuu natigu hi to laipahiloika-Na'a Alatala. 20 Pamula-mulana laikarebaiku hi hira to Yahudi i Damsyik, napu ee rau i Yerusalem duuna humawee ngata i Yudea, pade hi tau-tauna to moma Yahudi. Laikarebaiku hi hira bona mancororamo lako dohara pade manculira hi Alatala, pade mokaingkura ewa bewa kahipatona tauna to nancororamo lako dohara. 21 Etu pade laihokora'a to Yahudi i karawaa Hou Alatala pade laipehimukuira mampatehi'a. 22 Naupawee, laitulungi-Na moto'a Alatala hampena duu ei natuwu'adapa pade namala'adapa nohabi hi to laipemabohe bo hi todea biaha. To iuliku ei nahibali hante to iuli Musa pade nabi-nabi ntanina, 23 ane Magau to Pepakahalama to laitipa Alatala kana maheha bo mamate, pade Hiami to pamula-mulana matuwu nculi lako kamatea pade mangkeni baa hi to Yahudi bo to moma Yahudi bona rancanira bewa Alatala mampakahalama manuhia.”
Popantarui Festus pade Agripa
24 Hamalina Paulus nampojarita humawee lauria nampotunui wotona, nongaremi Festus, “Nagilamoko Paulus! Nadea gaga to laincanimu, alaana nagilamoko!”
25 Naupawee nehono Paulus, “Festus to laibilaku, moma'a nagila! Humawee to iuliku ei nakono, pade nanoto moto pampekiriku. 26 Ncanina moto mui Magau Agripa ei. Etu pade nabati'a nanguli lauria hi hia. Parahayaku mpuu ane moma naria hangaa lako to iuliku ei to moma laincanina. Apa humaweena ei moma nadupa i kaleruana. 27 Magau Agripa, parahayamura nabi? Ncaniku ane parahayamura.”
28 Nehono Agripa, “Ke nono mupajadi to pantuku Kristus'a!”
29 Iulina Paulus, “Mohambaya'a hi Alatala, mahae ba mahomi, moma wuwu iko to mawali to pantuku Kristus, naupawee humawee to nangepe napa to iuliku welau ei mui mahibali hante aku. Aga nemo komi rapou hante rante ewa aku.”
30 Napu ee, neongkoramo Magau Agripa, Festus, Bernike hante humawee tauna to noncuna dohera nehuwu lako hou pobotuhia ee. 31 Karatara i hawalikuna, noneulikaramo hadua bo hadua, “Moma naria kahalaa tauna ei to mahipato rahukuka mate'i ba ratarungkuka'i.”
32 Agripa nangulika Festus, “Kakonona, mamalami tauna ei rabakaha ane ke moma'i nerapi rau nabotuhi Magau Bohe.”