Paulus rau i Roma
27
1 Laibotuhipi ane kana rau kami i Italia, Paulus pade bahangkua dua tauna to laitaha laikeni hi Yulius, hadua kapitee tantara Magau Bohe Roma. 2 Nencawimo kami i kapala tahi to narata lako Adramitium to rau i bahangkua pentuua kapala tahi i propinsi Asia. Aristarkhus to lako Tesalonika i propinsi Makedonia mui laipodohe kami i hee. Lauparia neongkomo kami lako Kaisarea. 3 Kanailena, naratamo kami i Sidon. Nabelo'i Yulius ee hi Paulus. Laipaliuna'i Paulus rau mantako dohena bona rawaikara'i kaparaluana. 4 Lako i hee, padola kami pomakoa kami. Apa nabohe ngolu tahi namparumpa kapala kami, etu pade nokapalamo kami nantuku dola talinti lewuto Siprus to naleru hodi lako ngolu bohe. 5 Napu ee noliumo kami i tahi to i tingoo propinsi Kilikia pade propinsi Pamfilia duuna narata kami i Mira i propinsi Likia. 6 I hee Kapitee Yulius namparata hangu kapala tahi to narata lako Aleksandria to meongko rau i Italia. Lauparia, laiencunamo kami rau i kapala ee.7 Nadea eo kami nokapala tahi, apa nalera mpuu pomako kapala tahi to laihawi kami. Nakoro mpuu pomako kapala kami pade noliuda kami i Knidus. Apa ngolu bohe nampotomu kapala kami, alaana nokapala kami nantuku wiwi talinti lewuto Kreta nampaliu lorena to nempano rau tahi to ikahangai Salmone bona maleru kami lako ngolu bohe. 8 Naheha mpuu iepe kami nampaliu Salmone ee pade naratada kami i pentuua kapala tahi to laikahangai “Pentuua Naramba,” to namohu hante ngata Lasea.
9 Nadeami loga natetadi mara pade naliumi tempo eo bohe Pohingkabeloa to Yahudi hante Alatala. Momami ma'ama mokapala. Etu pade nepalingaimi Paulus hi hira to i rara kapala ee mai. 10 Iulina, “Ompi-ompiku, laihiloku makoromi pomakota ane madola motota. Madea mpuu karugiata. Moma wuwu pangulayata, hante kita mui mei mamate.” 11 Naupawee, kapitee tantara ee moma'i nepangala. Laiparahayanapi to iuli to nopajala kapala pade kapitee kapala ee lako to iuli Paulus. 12 Moma ami nabelo pentuua kapala to i hee napentuui kapala tempo lengi. Etu pade nadea motora to mingki madola pade nampehimukui marata i ngata Feniks pentuua kapala tahi i lewuto Kreta pade mo'oha i ria duuna tempo lengi maliu. Pentuua kapala i Feniks ee mai nongayo mali kaholoa.
Ngolu bohe namparumpa kapala tahi
13 Tempo ee ngolu lako selatan nopamulami nantawiri hodi-hodi. Etu pade laipekirira mamala motora rau pentuua kapala i ngata Feniks. Aji laiorerami ahe potaha kapala ee pade najalami kapala tahi ee nencoho talinti lewuto Kreta. 14 Poma nahae, naratami ngolu bohe lako i lorena to laiuli “Ngolu Mataeo.” 15 Lairumpana kapala ee hampena kapala ee moma ibukuna nampataha ngolu bohe to namparumpa'i. Etu pade palele kami laumi kapala ee nolumanto laikeni ngolu. 16 Naonu kapala kami duu naliu lewuto kodi to laikahangai lewuto Kauda. I hee namala kami nampehimukui nampaore duanga kodi to iuli sekoci rau i lolo kapala. Duanga kodi ee mai biahana laipou i talikua kapala. 17 Kateorena duanga kodi ee mai, kapala ee laiwewera kaloro bona nemo mapihe. Apa naekara matetaha talabone i kadelea tahi Sirtis, laipopanaumi layar kapala ee pade palelerami kapala ee nolumanto laikeni ngolu. 18 Moma naria pentuuana ngolu bohe namparumpa kapala kami, etu pade kanailena laitadirami pangulaya kapala tahi ee rau i tahi. 19 Kanailena muipi, hante parewa kapalami to laitadira. 20 Bahangkua eo moma naria lainaa kami eo bo betue. Ngolu bohe ee namparumpa dola kapala kami. Lauparia momami laiharumaka kami ane mahalamadapa kami.
21 Apa bahangkua eoramo moma nangkoni, neongkomi Paulus nanguli iwei, “Ompi-ompi, ane ke laituku to iuliku bona nemota meongko lako Kreta, moma'i tarata kahehaa bo karugia ei. 22 Naupawee, welau ei kuperapi hi komi bona mipakaroho moto rarami. Apa moma hema haduaa to mamate, wuwu kapala ei aga to mapengka. 23 Apa ngkawengia wei, Alatala to laipueku, to nangkami katuwuku, nantudu hadua malaeka-Na narata hi aku. Malaeka ee mai nokangkore i humpiiku 24 pade nangulika'a, ‘Nemoko maeka Paulus! Kana rauko mantingohi Magau Bohe. Apa nabohe towe Alatala hi iko, humawee tauna to laipodohemu i rara kapala ei mahalama pura motora.’ 25 Etumo, pakaroho moto rarami! Apa parahayaku mpuu ane humawee to laiulika-Na'a Alatala kana madupa. 26 Naupawee, kapala ei mei kana matetuku i hangu lewuto.”
Kapala tahi natetuku
27 Bengi kahampulu opona, kapala kami batena laitawiri ngolu bohe i tahi Adria. Ntongo bengi, to nobago i rara kapala eera nampekiri ane namohu i lorenamo kami. 28 Laiulura kaloro to laipantoeni watu moukuru bona rancanira kandala tahi. I hee maria rompulu nopo kandalana. Namaju mui hodi, laiukurura mui, i hee maria hampulu alima nopodimi kandalana. 29 Apa naekara kapala kami matetuku watu, laipopanaura opo ongu ahe potaha kapala mali talikuana pade nohambayara bona mahomimi mabaa. 30 Molelau to nobago i rara kapala ee mingki malai bongo lako kapala. Laipopanau bongora duanga kodi to laiuli sekoci rau i tahi pade ntumoni popanaurami bahangkua ongu ahe potaha kapala mali ngayona. 31 Paulus nangulika kapitee pade tantarana ee, iwei, “Ane malaira to pobago kapala ee, moma komi hema mahalama.” 32 Lauparia, tantara eera mai nobotohi kaloro potaha duanga kodi to iuli sekoci ee pade palelerami naonu.
33 Lau mabaa, nebawaimi Paulus mangkoni. Iulina, “Hampulu opo eomo komi nopea pade nantaha oro taimi, moma komi naria nangkoni. 34 Ku'ulika komi, kana mangkoni komi nau hodi bona matuwu moto komi. Apa moma maria napa-napa to maronto lako hi komi, naupa hangkau wuluami.” 35 Napu nanguli lauria, Paulus nangala roti, nosukurumi hi Alatala i tingoora tauna ee, laitubi-tubina roti ee pade nopamulami nangkoni. 36 Lauparia, naroho nculimi rarara pade nangkoni muiramohawo. 37 Roatu pitu mpulu ono dua kadea kami i rara kapala ee. 38 Napu kami nangkoni, laitadirami ohe gando to laiulaya kapala ee rau i tahi bona mangaami kapala.
39 Nabaapi, to pobago kapala eera nampanaa lorena. Naupawee moma incanira lore napa'i ee. Laihilora mui huno tahi to nalempe talintina. Lauparia laibotuhira baka mamalara mampopentuu kapala ee mai i hee. 40 Laitompora kaloro ahe potaha kapala ee, pade palelerami ahe potaha kapala ee naboli i rara tahi. Hamali ee laikakara mui kaloro-kaloro pampou kamudi kapala ee bona mamalara mampa'aturu pomako kapala. Laipasara mui layar mali ngayo kapala ee bona ngolu mantawiri kapala ee pade laipopongayora rau i talinti. 41 Naupawee, kapala ee namparumpa kadelea tahi hampena natetuku heemi. Woo kapala tahi ee momami namala nokageno. Mali talikuana nagero lairumpa balumba bohe.
42 Tempo ee noliwora tantara mampatehi humawee tauna to itaha ee bona moma maria haduaa metibo rau i lorena. 43 Naupawee kapitee ee nampatagira apa nampotolawai Paulus. Laituduna tauna to namala nonangu mekawantu ilodo pade monangu rau i lorena. 44 To ntanina metuku hante mentoe dopi ba kapihea kapala ee. Weemi dalana hampe nahalama pura kami rau lorena.