Paulus i lewuto Malta
28
1 Karata kami i lorena hante nahalama, pade ncani kamidi ane lorena ee laikahangai lewuto Malta. 2 Todea i Malta ee nadole mpuura hi kami. Laipotomu belora kami. Laipatuwukara kami apu kipanerui apa nangkanehiami pade nalengimi. 3 Tempona Paulus nopalimpuru kau pade lailobuna, nehuwu hamaa ule to narahua keni kapane apu ee. Ule ee nampatilo pale Paulus. 4 Hangka todea ngata nampanaa ule ee nentoe i pale Paulus, noneulikaramo hadua bo hadua, “Natantu tauna ei to pepatehi. Nau nahalama'i lako tahi, Dewi to Pobotuhi moma nampalele'i matuwu.” 5 Naupawee, Paulus notontahi ule ee i rara apu pade moma naria hodia nadua iepena. 6 Pekirira, pale Paulus mawoto ba ngkali madungkami mamate. Bahangkua kahaena laipopeara, moma naria napa to nadupa hi Paulus. Nobalimi pekirira pade iulira Paulus ee hadua dewa.7 Moma na'awa lako hee, naria tana Publius. Publius ee mai to poparenta i lewuto ee. Nadole'i nampotomu kami pade tolu eo kami no'oha i houna halaku to rata. 8 Tempo ee tuamana lairata kami noturu moto'i, habana nangkalengi pade nadua ntai. Paulus nehua i kamarana pade nodama tanuana tuama Publius ee pade nohambaya nampakauri'i. 9 Napu ee humawee tauna to nadua i lewuto ee narata hi Paulus pade hira mui laipakauri. 10 Laibilara mpuu kami pade naratapi tempona meongkomo kami, laipahadiara hangu hangaa to iparaluu kami.
Paulus narata i Roma
11 Kaganana tolu mula kami no'oha i Malta, neongkomo kami nencawi kapala to lako Aleksandria. Kapala ee nahaemi nentuu i hee hinungkai tempo lengi narata. Kapala ee laimere gambara dewa to norapi, hangara Kastor pade Poluks. 12 Nehani kami i Sirakusa pade no'oha i hee tolu eo. 13 Lako i hee nencoho dola kami pade narata i Regium. Kanailena nantawirimi ngolu lako selatan, etu pade nagahi pomako kapala kami pade kanailena muipi naratamo kami i Putioli. 14 I hee notomu kami hante bahangkua dua ompi to hangu kaparahayaa. Habana nebawaira, hamingku kami no'oha dohera. Napu ee pade neongkoda kami rau i Roma. 15 Laieperami ompi-ompi to hangu kaparahayaa i Roma ane marata kami. Etu pade naratara nampotomu kami i ngata to laikahangai Pasar Apius pade i ngata to laikahangai Pehania Tolu. Hangka laipotomukanara Paulus, nosukurumi Paulus hi Alatala pade narohokimi rarana.
16 Karata kami i Roma, laipaliu'i Paulus no'oha ntani laipodoo hadua tantara.
Paulus nampojaritakara to Yahudi i Roma
17 Naliu tolu eo, Paulus nampaokara to nawali to pangkenira to Yahudi to natida i ngata ee mahiromu. Karatara i hee, nojaritami Paulus, “Ompi-ompiku, moma naria halaku hi to Yahudi. Moma mui'a nantiboki ada kabiahaa lako tumpulokota. Naupawee, laihoko'a i Yerusalem pade laipopewai hi to poparenta Roma to i hee. 18 Hangka to poparenta Roma nampareha'a, moma naria halaku lairatara to mahipato rahukuka mate'a, etu pade mingkira mampabakaha'a. 19 Naupawee habagia to Yahudi i propinsi Yudea, moma tarimara ane moma'a nahala. Apa moma naria dala ntanina, alaana perapiku bona uruhiaku nabotuhi Magau Bohe Roma. Laibabeiku ewa ee, moma habana mampangadukara ompiku to Yahudi. 20 Etumile pade laiperapiku mampotomuka komi pade mingki'a mampojaritaka komi, bona mincani lairante'a ei habana neparahaya'a hi Magau to Pepakahalama to laiharumaka to Israel.”
21 Naupawee nehonora to Yahudi ee, “Poma naria hura laitarima kami lako to Yahudi i Yudea nangkambelai iko. Poma mui naria haduaa ompita to narata lako ria nangkewo ane nadaa kehimu. 22 Naupawee, mingki kiepe lako hi iko nangkambelai to iparahayamu. Apa laiepe kami, i rima-rima tauna nampaewa patudu to laitukumu.”
23 Lauparia laitoarami eo napara motomu. Eo ee nadea mpuu tauna narata i po'ohaa Paulus. Haeoa ntua'i Paulus nopandolakara pade nangkarebai bewa Alatala noparenta halaku Magau pade laipehimukuina bona raparahayara Yesus mantuku patudu Taurat to laitulihi Musa pade buku nabi-nabi. 24 To Yahudi eera mai, nariara to namparahaya, naria muira to moma namparahaya napa to iuli Paulus. 25 Duuna nahudu potomuara ee momara nohangu baha pade nanculiramo. Naupawee, kapomara nanculi, iulina muipi Paulus, “Nakono mpuu to iuli Inoha to Nagaha to laiparata nabi Yesaya hi tumpulokomi! 26 Iuli-Na,
‘Koimoko hi to Yahudi pade ulikara iwei,
“Komi mei me'epe hante talingami,
naupawee moma mipaha napa to iepemi.
Komi mei mehilo hante matami,
naupawee moma komi mengkao napa to ihilomi.”
27 Habana nakoomi rarara tauna ei,
nantomomi talingara ne'epe,
pade tungkai pirira matara.
Ane moma iwee ingkura, mamala rahilora napa to nadupa,
mamalara me'epe bo mampaha batuana,
mamalara mampaha napa to nakono,
alaana megolira hi Aku pade Aku mampakaurira.’ ”
28 Kahuduana Paulus nanguli, “Bona mincani, kareba kahalamaa lako Alatala laikarebai hi tauna to moma Yahudi pade hira mei madotara mangepe!” [ 29 Napu Paulus nanguli iwee, nanculiramo to Yahudi ee pade nonehono hore hira.]
Paulus noparata nangkambelai poparentaa Alatala