Pehuku Alatala nanoro
3
1 Ane iwee, napa pelabiara to Yahudi pade napa bununa popatini hi hira? 2 Nadea mpuu pelabiara pade naria ami bununa popatinira. Koropokona ntoto, Alatala namparahayaka lolita-Na hi hira to Yahudi. 3 Naupawee, nariara to Yahudi to moma natigu namparahaya tipa Alatala. Aga nemo mipekiri moma Napakadupa Alatala napa to laitipa-Na. 4 Batena moto'i Napakadupa. Apa Alatala ee mai batena moto-'I nanguli to nakono, bo humawee manuhia to pokalowo. Apa naria laitulihi rara Buku to Nagaha iwei,“Bona mamala rahilo ane nakono-Ko rara humawee lolita-Mu,
pade mopabeta-Ko ane rabotuhi.”
5 Baka naria tauna nanguli ane Alatala ee mai moma-'I nanoro ane Nahukuta habana dohata, apa dohata ee mai wule nampakanoto ane Alatala nanoro. 6 Naupawee panguli lauria moma'i nakono. Ane rapana moma-'I nanoro Alatala, bewa-'I mei mampabotuhi manuhia i dunia ei? 7 Naupawee ane ingkuta to nadaa nampakanoto ane Alatala ee mai nanoro hampena natetambaiki peune tauna hi Alatala, napa pade laihuku-Nata ane mobabei dohata? 8 Aji moma'i nakono pepakudaa tauna ane naria kami nanguli iwei, “Maita mobabei ingku to nadaa, bona meumba to nabelo.” Hira to nanguli pepakudaa ewa ee mai, mahipatora Nahuku Alatala.
Humawee manuhia nadoha
9 Aji bewa? Naria pelabia to Yahudi lako to moma Yahudi? Moma naria. Habana laiulitami he, belo to Yahudi bo to moma Yahudi humaweeta nadoha. 10 Ewa naria laitulihi rara Buku to Nagaha iwei,
“Moma naria tauna to nanoro ingkuna. Nau haduaa moma.
11 Moma naria tauna to mpuu-mpuu nengkao napa to nabelo,
pade moma hema haduaa to nampali Alatala.
12 Humawee tauna negoliramo lako hi Alatala,
humaweera momami naria bunura,
moma hema haduaa to nabelo ingkuna. Nau haduaa moma.
13 Humawee baha to iulira moma nabelo, mamala rarapaika ewa hoa to mate rara dayo.
Dilara laipakera nanguli jarita to namomi nampabagiu tau ntanina.
Wiwira nampopehuwu jarita to nampakahilaka tau ntanina ewa bisa ule.
14 Ngudura laipakera nekamo hante daa rarara.
15 Laipokonora mpuu nampatehi tau ntanina.
16 I rima-rima karauara batenaramo nobabei pogehoa pade nampakaheha tau ntanina.
17 Moma incanira bewa matuwu mohingkabelo hante tau ntanina.
18 Moma ntotora nengkoru hi Alatala.”
19 Laincanita ane humawee to laitulihi rara patudu Taurat laipatujuka hi to Yahudi to laipatudu nantuku patudu Taurat ee, bona nemo maria haduaa tauna to mampemakono wotona moto. Humawee tauna i dunia ei kana Nahuku Alatala. 20 Moma hema haduaa to Napemakono Alatala i tingoo-Na habana nampoingkuka patudu Taurat. Apa lako patudu Taurat ee laumi manuhia nangincani ane naria doha.
Manuhia laipemakono Alatala habana neparahaya hi Yesus Kristus
21 Naupawee tempo ei, naupa moma ibukuta nampoingkuka patudu Taurat, laitudoka-Natamo Alatala bewa dalana bona mamalata Napemakono i tingoo-Na. Lauria nanoto laitulihi rara buku Taurat pade buku nabi-nabi. 22 Alatala mampemakonota ane meparahayata hi Yesus Kristus. Ee mai Nababei Alatala hi humawee to neparahaya hi Yesus Kristus habana Alatala moma-'I nampelihi tauna. 23 Humawee tauna nadoha pade momatamo namala namparasai kabelo Alatala to laipemabohe. 24 Naupawee Alatala nampemakonota habana kamate Kristus Yesus nantolohi dohata. Lauria laibabei Alatala hi kita habana kabohe towe-Na to laiwaika-Na mara hi kita. 25 Ilodo nohabaradipi Alatala hante doha-doha manuhia, pade momara laihuku-Na, apa laipopea-Na karata Kristus to laipakatantu-Na mamate halaku to petolohi to mampopohingkabelo nculi manuhia to neparahaya hante Alatala. Humawee lauria laibabei Alatala nampahiloi kanoro-Na. 26 Tempo ei, laihuku-Nami dohata hante kamate Kristus Yesus bona rahilo ane Alatala ee mai nanoro. Hante iwee, laincanitami ane Alatala ee mai nanoro pade laipemakono-Na tauna to neparahaya hi Yesus.
27 Aji, natantumi hi kita ane moma naria dalata mampolinga wotota moto. Apa Alatala nampemakonota moma habana laipoingkukata patudu Taurat, naupawee laipemakono-Nata habana neparahayata hi Yesus Kristus. 28 Apa laiparahaya kami mpuu ane manuhia laipemakono Alatala habana neparahaya hi Yesus Kristus, moma habana nampoingkuka patudu Taurat. 29 Apa Alatala ee mai moma wuwu Alatalara to Yahudi naupawee Alatalara to moma Yahudi mui. 30 Apa Hadua aga Alatala. Hiami to nampemakono tauna to laitini to neparahaya hi Yesus, pade Hia moto mui to nampemakono tauna to moma laitini to neparahaya hi Yesus. 31 Aji, kita laipemakono Alatala habana neparahaya hi Yesus Kristus. Naupawee, nemo mipekiri ane patudu Taurat to Yahudi momami naria bununa, apa kakonona hante peparahayata ee laituruhitami patudu Taurat.