Abraham laipemakono habana peparahayana hi Alatala
4
1 Aji napa to tauli nangkambelai Abraham, tumpulokota to Yahudi? 2 Ane ke laipemakono'i Abraham habana ingkuna to nabelo, mamala'i mampolinga wotona moto. Naupawee moma'i mamala mampolinga wotona moto i tingoo Alatala. 3 Apa naria laitulihi rara Buku to Nagaha iwei, “Abraham neparahaya hi Alatala, pade habana peparahayana ee mai Alatala nantarima'i halaku tauna to nanoro.” 4 Ane naria tauna nobago, tomo to laitarimana ee moma mamala rauli pewai mara, naupawee tomo ee mai nahipato ami natarima. 5 Naupawee, moma iwee ane kita hante Alatala. Alatala nantarimata halaku tauna to nakono i tingoo-Na moma habana laipehimukuita noingku belo, naupawee habana neparahayata hi Alatala to nampemakonora tauna to nadoha. Aji, Alatala nampemakonota habana peparahayata. 6 Ewa Magau Daud mui nanguli ane norahi mpuu tauna to laipemakono Alatala moma habana ingkuna to nabelo. 7 Iwei to laiuli Magau Daud,“Norahi mpuu tauna
to laiampuni humawee halana bo dohana.
8 Norahi mpuu manuhia
to momami lailinga Pue dohana.”
9 To laiuli Magau Daud tauna to norahi mpuu, moma wuwu hira to nanturuhi patudu nangkambelai popatini, naupawee laipatujukana mui hi hira to moma nanturuhi patudu popatini. Apa laiuli kamimi he, ane Abraham laitarima halaku tauna to nanoro habana peparahayana. 10 Bulauma Alatala nangulika Abraham lauria? Kapomana Abraham laitinidi ba napupi laitinidi? To nakonona, Abraham laipemakono kapomana laitini, moma napupi laitini. 11 Abraham laitini halaku tanda ane Alatala nampemakono'i habana peparahayana to laipopahiloina kapomana laitini. Iweemi hampena Abraham nawali tuamara humawee to neparahaya to momara laitini, bona hira muihawo Napemakono Alatala. 12 Abraham ee mui tuamara tauna to nanturuhi patudu nangkambelai popatini, to koropokona hira to moma wuwu nanturuhi patudu nangkambelai popatini ee, naupawee neparahaya muira hi Alatala nahibali hante Abraham neparahaya hi Alatala kapomana laitini.
13 Alatala notipa hi Abraham pade mulina ane dunia ei mai hira tumpuna. Laitipa-Na Alatala lauria moma habana katigu Abraham nanturuhi patudu Taurat, naupawee habana peparahayana hi Alatala hampena Alatala nampemakono'i. 14 Apa ane wuwu tau-tauna to natigu nanturuhi patudu Taurat moto to mantarima napa to laitipa Alatala, moma naria bunuta neparahaya hi Alatala, pade napa to laitipa Alatala nawali kalowodimi. 15 Hodo Alatala neumba habana patudu Taurat laitiboki. Naupawee ane ke moma'i naria patudu Taurat, moma mui naria kahalaata.
16 Aji, tipa Alatala ee mai mamala tatarima ane meparahayata hi Alatala, bona manoto ane tipa Alatala ee mai laiwaika-Nata habana kabohe towe-Na hi kita. Patuju Alatala bona napa to laitipa-Na mamala ratarimara humawee muli Abraham, moma wuwu hira to laipatudu manturuhi patudu Taurat, naupawee hante hira to neparahaya hi Alatala ewa Abraham neparahaya hi Alatala. Apa Abraham ee mai tuamata humawee to neparahaya. 17 Ewa naria lolita Alatala hi Abraham rara Buku to Nagaha nanguli iwei, “Laiongko-Kuko nawali tuamara to neparahaya i humawee ngata.” Weemi Alatala nanguli potipa-Na hi Abraham, pade Abraham neparahaya hi Hia. Hiami Alatala to nampakatuwu nculira to mate. Hia muimi Alatala to hante lolita-Na namala nobabei napa to moma naria nawali naria. 18 Naupa momami naria harumakaa Abraham moana, naupawee batena moto'i neparahaya pade nampaharumaka Alatala, hampena hia nawali tuamara to neparahaya i humawee ngata, ewa to laiuli rara Buku to Nagaha iwei, “Mulimu mei melabi mpuu kadeara.” 19 Peparahaya Abraham naroho moto oa'i naupa laincanina ane hia naliu gagami katuana, apa umuruna maria hatu mpaemi, pade Sara bangkelena mui nalalo. 20 Moma'i nokarara Abraham namparahaya tipa Alatala. Peparahayana hi Alatala nampakaroho rarana hampena laipemabohena Alatala, 21 pade parahayana mpuu ane Alatala mamala mobabei humawee to laitipa-Na. 22 Etu pade Abraham laitarima Alatala halaku tauna to nanoro. 23 To laitulihi rara Buku to Nagaha iwei, “Habana peparahayana ee mai Alatala nantarima'i halaku tauna to nanoro.” To laitulihi ee mai moma wuwu laitulihika hi Abraham, 24 naupawee laitulihika mui hi kita. Apa Alatala mui nantarimata halaku tauna to nanoro habana neparahayata hi Alatala to nampakatuwu nculi Yesus Pueta lako lentongora to mate. 25 Yesus ee mai laipopewai Alatala rapatehi habana dohata, pade laipakatuwu nculi Alatala bona mamalata Napemakono.