Manuhia nohingkabelo nculi hante Alatala
5
1 Kita ei, laipemakonotamo habana neparahayata hi Alatala. Aji, tempo ei natuwu nohingkabelotamo hante Alatala habana kamate Pueta Yesus Kristus. 2 Yesus nampawaikata dala namparasai kabohe towe Alatala apa neparahayata hi Hia. Tempo ei kita natuwu i rara kabohe towe Alatala ee mai, etu pade nagoe rarata apa laiharumakata mpuu ane rapemaboheta mei hingkani-ngkani hante Alatala. 3 Moma wuwu ee, nagoe muita ane narumpa kahehaa, apa laincanita ane kahehaa ee mai nampopeumba katiguta, 4 pade katiguta ee nampopeumba karoho rarata ane rapehori, pade karoho rarata ane rapehori ee mai nampakaroho peharumakata hi Alatala. 5 Pade ane neharumakatadamo hi Alatala, natantu ami tatarima to laiharumakata ee, apa lairasaita mpuumi kabohe towe Alatala to laipobago Inoha to Nagaha to laiwaika Alatala hi kita. 6 Iwei kabohe towe Alatala to lairasaita, i tempo to laipakatantu-Na amimi Alatala, Kristus namate nampahambeita manuhia to nadoha tempona moma ibukuta nampakahalama wotota moto. 7 Nakoro mpuu hadua tauna madota'i mamate mampahambei tau ntanina naupa laincanina tauna ee mai to nanoro. Naupawee, ane mampahambei tauna to nabelo ingkuna, baka naria moto to madota mamate. 8 Naupawee Alatala nampopahiloi towe-Na hi kita, apa tempota nadohadipi, namatemi Kristus nampahambeita. 9 Tempo ei laipemakonotamo habana kamate Kristus. Pelabi-labina tempo kahudua dunia mei, natantu amitamo Napakahalama Kristus lako hodo Alatala. 10 Apa tempota nampobali Alataladipi, laipopewai-Na Ana-Na namate nampahambeita bona mohingkabelo nculita hante Alatala. Tempo ei nohingkabelotamo hante Alatala. Pelabi-labina tempo kahudua dunia mei, natantu amitamo Napakahalama Kristus lako pehuku Alatala apa Kristus ee natuwu moto oa-'I. 11 Moma wuwu ee, laipolingata muipi Alatala habana Yesus Kristus Pueta, apa Hiami to nampopohingkabelota hante Alatala.Kahibalia pade pontania Adam hante Kristus
12 Doha neumba i rara dunia habana hadua tauna, pade habana doha ee mai nariami kamatea. Alaana, humawee manuhia kana mamate, apa nadoha puratamo. 13 Habana kapomana naria patudu Taurat, naria amimi doha i dunia. Doha ee mai moma'i ratuntu ane moma naria patudu Taurat. 14 Naupawee, nopamula lako hira to natuwu tempo katuwu Adam duuna hira to natuwu tempo katuwu Musa, humaweera kana mamate, naupa momara nantiboki parenta Alatala ewa to laibabei Adam.
Adam ee mai naria kahibaliana hante Yesus to narata ngkapuri, apa napa to laibabei Adam pade Yesus ee, nambela humawee manuhia. 15 Naupawee napa to laibabei Adam moma nahibali hante napa to laibabei Kristus. Apa habana kahalaa to laibabei Adam, humawee manuhia kana mamate. Naupawee, kabohe towe Alatala to laipopewai-Na mara hi manuhia, neliupi kabohena lako kahalaa Adam. To laipopewai mara Alatala hi manuhia ee mai, kahalamaa to laipobago Yesus Kristus hante kabohe towe-Na. 16 Pade kabohe towe to laiwaika mara Alatala hi kita moma nahibali hante doha to laibabei hadua manuhia. Adam nantiboki hangaa parenta Alatala. Lauparia, Alatala nobotuhi manuhia nahala pade kana rahuku. Naupawee, lako kabohe towe to laiwaika-Na mara hi kita, dohata to nadea momami lailinga-Na pade laipemakono-Natamo. 17 Habana lako doha hadua tauna, humawee manuhia kana mamate. Naupawee nelabi-labipi kabohena napa to lairatata lako bago hadua Tauna, etumi Yesus Kristus. Humawee to laipemakono Alatala pade nantarima kabohe towe Alatala hante nelabi-labi, kana matuwu bo moparenta hingkani-ngkani hante Yesus Kristus.
18 Aji, habana doha Adam, humawee manuhia kana rahuku. Wee moto mui, habana ingku Kristus to nanoro, humawee manuhia laipemakono pade mamparata katuwua duu kahae-haena. 19 Pade habana Adam moma neturuhi hi Alatala, humawee manuhia nawali nadoha. Wee moto mui habana Kristus neturuhi hi Alatala, humawee manuhia nawali nakono i tingoo Alatala.
20 Alatala nampawaikata patudu Taurat, bona mampakanoto ane nadea mpuu dohata habana nantiboki patudu Taurat ee mai. Naupawee, nau hangkua katetambai kadea doha manuhia, neliu muipi katetambai kabohe towe Alatala. 21 Aji, ilodo manuhia natuwu i rara baraka doha hampena humawee manuhia kana mamate. Naupawee, tempo ei manuhia natuwu i rara baraka kabohe towe Alatala. Apa hante kamate Pueta Yesus Kristus, Alatala nampemakonota pade laiwaika-Nata katuwua duu kahae-haena.