Namate pade natuwu nculi hingkani-ngkani hante Kristus
6
1 Aji, ane iwee, napa to mamala tauli? Mamalata mobabei dola doha bona matetambaiki kabohe towe Alatala hi kita? 2 Natantu ami moma! Mamala rauli namatetamo hingkani-ngkani hante Kristus, aji momami naria katekaiata hante doha. Etumo, nemo mpuuta mobabei doha rara katuwuta. 3 Bona mincani, tempota laidiu, laipahangutamo hante Kristus. Batuana, namatetamo hingkani-ngkani hante Kristus. 4 Aji, tempota laidiu, mamala rauli namatetamo pade laitana hingkani-ngkani hante Kristus, bona nahibali hante Kristus laipakatuwu nculi lako kamatea-Na habana kabohe baraka Alatala, wee moto mui kita kana matuwu hante ingku to nabou. 5 Habana ane namatetadamo hingkani-ngkani hante Hia, natantumi ane kita mui kana rapakatuwu nculi nahibali hante Hia. 6 Apa laincanita ane ingkuta to nahae halaku manuhia biaha, namatemi hingkani-ngkani hante Kristus i kau salib, bona marontomi baraka ingkuta to nahae ee mai pade momatamo matuwu laipobatua baraka doha. 7 Habana hema to namatemi, natebakahami lako baraka doha to nampobatua'i. 8 Aji, ane namatetadamo hingkani-ngkani hante Kristus, laiparahayata mui ane kita mei matuwu hingkani-ngkani hante Hia. 9 Apa laincanita ane Kristus ee laipakatuwu nculimi lako kamatea-Na pade moma-'Imi mamateki. Kamatea momami nabaraka rara katuwu-Na. 10 Kristus namate nampadagi baraka doha, hangkani aga duu kahae-haena. Pade tempo ei Kristus natuwu nampakagoe rara Alatala. 11 Iwee moto mui, komi kana mampekiri ane namatemo komi pade momami naria katekaiami hante doha, pade kana matuwu komi mampakagoe rara Alatala apa nohangu rara komi hante Kristus Yesus.12 Etumo, nemopi mipalele doha mampobatua wotomi to kana mamate, bona nemopi mituruhi dota rarami to nadaa. 13 Pade nemo mipopewai parewa wotomi napake doha mobabei ingku to nadaa, naupawee popewaimi katuwumi hi Alatala. Apa ilodo komi ewa tauna to namate, naupawee laipakatuwu nculi-Namo komi Alatala. Etumo, popewaimi parewa wotomi hi Alatala bona mamala komi mobabei ingku to nanoro. 14 Aji, momamo komi mamala napobatua doha, apa momamo komi natuwu rara baraka patudu Taurat, naupawee natuwu rara kabohe towe Alatalamo komi.
Batua doha nawali batua Alatala
15 Aji bewa? Laiulitami he ane natuwu rara kabohe towe Alatalatamo, pade momatamo natuwu rara baraka patudu Taurat. Ane iwee, mamalata mobabei doha? Natantu ami moma mamala. 16 Laincanimi motomi, ane mipopewaidimi wotomi mawali batua tau ntanina pade manturuhi'i, nawali batua tauna eemo komi. Wee moto mui, ane mituruhi dota rarami to nadaa, nawali batua dohamo komi, pade kahuduana mei mamate komi duu kahae-haena. Naupawee ane mituruhi parenta Alatala, nawali batua Alatalamo komi, pade kahuduana mei matuwu makonomo komi i tingoo Alatala. 17 Raunemi Alatala, habana ilodo komi nawali batua doha, naupawee tempo ei hante kalori rarami laituruhimimi patudu to laiparata hi komi. 18 Laibakaha-Namo komi Alatala lako dohami, pade nawali batua-Namo komi bona moingku manoro. 19 Halaku manuhia to nalente, nakorodapa komi nampaha patuduku. Etu pade nampake porapa'a nopatudu komi bona madoli mipaha. Ilodo komi nampopewai parewa wotomi mawali batua dota rarami to nadaa, pade nantambai dola kadaa ingkumi. Naupawee, tempo ei kana mipopewaimi parewa wotomi hi Alatala mawali batua to moingku nanoro, hampena komi mpuu-mpuu muntu mampobagoka Alatala. 20 Apa tempomi laipobatua dohadipi, moma naria laipekirimi moingku to nanoro. 21 Tempo ee mai napa to lairatami rara katuwumi? Humawee ingkumi tempo ee mai laipokaeamimi tempo ei, apa humawee ingkumi ee mai wule nangkeni komi rara kamatea duu kahae-haena. 22 Naupawee tempo ei laibakaha-Namo komi Alatala lako baraka doha, pade nawali batua Alatalamo komi. Rahi bohe to laitarimami lako humawee lauria, komi natuwu muntu nampobagoka Alatala pade kahuduana mei mirata katuwua to moma maria kahuduana. 23 Apa hema to nobabei doha kana mamparata tomo, pade tomo ee kamatea duu kahae-haena. Naupawee Alatala nampawai mara katuwua duu kahae-haena hi tauna to nohangu rara hante Pueta Yesus Kristus.