Natebakahatamo lako patudu Taurat
7
1 Ompi-ompi, humaweemi nangincani atura. Tantu laincanimi ane atura-atura ee mai laipake tempota natuwu aga. 2 Ewa hadua bangkele laipou atura poncamoko hante balailona. Atura ee mai nampou'i ane natuwudipi balailona. Naupawee ane mamatedimi balailona, moma'imi natepou hante atura poncamoko ee. 3 Aji, ane naria bangkele to natuwudipi balailona pade norara ntani hante balailo to ntanina, bangkele ee mai nogau hala. Naupawee ane mamatedimi balailona, mamala'i mobalailoki apa moma'imi natepou hante atura poncamoko pade ane iwee moma'i nogau hala. 4 Wee moto mui hante kita ompi-ompi. Mamala rauli namatetamo tempo kamate Kristus. Aji momatamo natepou hante patudu Taurat. Tempo ei to ntaninami to nampouta. Hiami Kristus to laipakatuwu nculi Alatala lako kamatea-Na. Nawali todea Kristustamo bona katuwuta mobunu i tingoo Alatala. 5 Habana ilodo, kapomata neparahaya hi Pue Yesus, kita natuwu nantuku dota rarata halaku manuhia. Tempo ee mui, patudu Taurat nampopeumba dota rarata mobabei doha, hampena parewa wotota nobabei dola ingku to nadaa to mangkenita i rara kamatea duu kahae-haena. 6 Naupawee tempo ei laibakaha-Natamo Alatala lako patudu Taurat, apa namatetamo pade momatamo natepou hante patudu Taurat. Tempo ei kita natuwu nampobagoka Alatala hante katuwu to nabou nantuku panuntu Inoha to Nagaha, pade momatamo natuwu nantuku patudu Taurat to laitulihi.7 Ane iwee, napa to mamala tauli? Patudu Taurat ee mai doha? Natantu ami moma. Naupawee, habana patudu Taurat, laincaniku to laiuli doha. Apa ane ke moma naria laitulihi rara patudu Taurat iwei, “Nemo mampokailu napa to naria hi tau ntanina,” moma muikuwo kuncani ane nahala'a nampokailu napa to naria hi tau ntanina. 8 Naupawee doha namala nampopeumba nadea ngaa to laipokailuku habana parenta ee mai. Apa ane ke moma naria patudu Taurat, moma mui namala doha nampopeumba dota rara to nadaa i rara wotoku. 9 Ilodo, kapomana laincaniku patudu Taurat, pekiriku nabelo moto katuwuku. Naupawee, hangka laincaniku patudu Taurat, neumba laumi dota raraku mobabei doha rara katuwuku. 10 Pade nanotomi raraku ane mahipato'a rahuku mate pade mategaa hante Alatala duu kahae-haena. Patuju parenta Alatala ee mai kakonona bona mabelo katuwuku. Molelau, hangka laincaniku parenta ee mai, neumba laumi dota raraku mobabei doha to mangkeni'a rahuku mate pade mategaa hante Alatala duu kahae-haena. 11 Apa hangka laincaniku parenta ee mai, naria laumi loga doha nampabagiu'a hampena laibabeiku ingku to nadaa to nangkeni'a rahuku mate. 12 Aji, patudu Taurat pade humawee parenta to naria i rara patudu Taurat ee nagaha, nakono pade nabelo.
Patudu Alatala nohihala hante baraka doha
13 Ane iwee, mamala rauli ane patudu Taurat to nabelo ee mai nangkeni'a rahuku mate? Natantu ami moma. Doha ee mai to nangkeni'a rau rahuku mate. Patudu Taurat to nabelo ee mai laipake doha nampabagiu'a hampena mahipato'a rahuku mate, bona manoto kuncani bewa hipa doha. Aji, hante parenta-parenta Alatala ee mai nanotomi ane nadaa mpuu'i doha ee mai. 14 Apa laincanita ane patudu Taurat ee mai narata lako Inoha to Nagaha. Naupawee aku ei manuhia to nadoha to natuwu laipobatua doha. 15 Aku moto moma incaniku bewa ingkuku. Apa moma to ipodotaku to laibabeiku, naupawee to moma ipodotaku ee laudi to laibabeiku. 16 Aji, ane aku mobabei ingku to nadaa to moma laipodotaku, batuana nahituju'a ane patudu Taurat ee mai nabelo. 17 Kakonona, moma aku to nobabei to nadaa ee mai, naupawee baraka doha to naria i raraku. 18 Laincaniku ane moma naria to nabelo i raraku halaku manuhia to nadoha. Apa batena oa'amo nobabei to nadaa, naupa naria moto dota raraku mobabei to nabelo. 19 Madota'a mobabei to nabelo, naupawee moma'i laibabeiku. Moma'a madota mobabei to nadaa, molelau to nadaa ee laudi to laibabeiku. 20 Aji, ane aku mobabei napa to moma laipodotaku, kakonona momami aku to nobabei lauria naupawee doha to naria i raraku.
21 Humawee lauria nampakanoto raraku ane to nadupa i rara katuwuku batena oami iwei: Mingki'a mobabei to nabelo naupawee to laibabeiku batena oami to nadaa. 22 Habana i raraku laipokonoku patudu Alatala. 23 Naupawee laincaniku ane i rara wotoku naria mui patudu ntanina to nampaewa patudu Alatala to naria i raraku. Patudu ntanina i rara wotoku ee mai baraka doha to nampou'a hampena aku nawali batua doha. 24 Nahilaka mpuu'amo aku ei mai. Hema to mamala mampabakaha'a lako baraka doha to naria i rara wotoku to mampakamate'a? 25 Raunemi Alatala, apa hante kamate Yesus Kristus, Pueta, Alatala nampabakaha'a. 26 Aji, i rara pekiriku natundu'a hi patudu Alatala, naupawee habana dota raraku to nadaa, natundu mui'a hi baraka doha.