Katuwua to laipopewai Inoha Alatala
8
1 Aji tempo ei, kita to nohangu rara hante Kristus Yesus momatamo rahuku, 2 apa Inoha Alatala nampawaikata katuwu to nabou habana nohangu rarata hante Kristus Yesus. Inoha Alatala ee mai nampabakahata lako baraka doha pade kamatea duu kahae-haena. 3 Patudu Taurat moma namala nampabakahata lako pehuku, apa kita manuhia moma ibukuta manturuhi patudu ee mai. Etu pade Alatala nantudu Ana-Na narata i dunia, nawali manuhia hante woto to nahibali woto manuhia to nadoha. Ana-Na ee namparasai pehuku Alatala i woto-Na habana dohata. Pade hante pohuku woto Yesus, Alatala nampadagi baraka doha. 4 Alatala nobabei ewa ee mai bona tabuku mampoingkuka napa to laituntu patudu Taurat. Apa kita moma natuwu nantuku dota rara manuhia, naupawee natuwu nantuku napa to laipodota Inoha Alatala. 5 Hira to natuwu nantuku dota rara manuhia, wule nampekiri dota rarara ee mai. Naupawee hira to natuwu nantuku dota Inoha Alatala, nampekiri napa to laipodota Inoha Alatala. 6 Hira to natuwu nantuku dota rara manuhia kana mamate duu kahae-haena. Naupawee hira to natuwu nantuku dota Inoha Alatala kana mantarima katuwua to nanone lako Alatala duu kahae-haena. 7 Hira to natuwu nantuku dota rara manuhia nampaewa Alatala, apa momara natundu hi patudu Alatala. Moma amira namala natundu hi patudu Alatala. 8 Hira to natuwu nantuku dota rara manuhia, natantu amimi momara nampakagoe Alatala.9 Naupawee komi, moma komi natuwu nantuku dota rara manuhia. Ane nakono Inoha Alatala naria i rarami, komi natuwu nantuku dota Inoha Alatala. Tauna to moma naria Inoha Kristus i rarana, hia ee mai moma'i todea Kristus. 10 Naupawee ane Kristus natuwu i rarami, naupa wotomi kana mamate habana doha, Inoha Alatala mampawaika komi katuwua duu kahae-haena habana Alatala nampemakono komi. 11 Inoha Alatala nampakatuwu nculi Yesus lako kamatea-Na. Inoha Alatala ee mui natida i rarami. Aji, hante Inoha-Na to natida i rarami, Alatala kana mampakatuwu nculi mui wotomi to kana mamate etu, ewa woto Kristus Yesus laipakatuwu nculi-Na lako kamatea-Na.
12 Aji ompi-ompi, kita kana matuwu mantuku dota Alatala. Nemota matuwu mantuku dota rara manuhia to nadaa. 13 Apa ane komi matuwu mantuku dota rarami halaku manuhia, mategaa komi hante Alatala. Naupawee ane mipehimukui mpuu mobakaha ingkumi to nadaa hante petulungi Inoha Alatala, matuwu komi hingkani-ngkani hante Alatala.
14 Humawee tauna to nanturuhi Inoha Alatala, hira ee mai Ana Alatala. 15 Apa Inoha Alatala to laitarimami moma nampobatua komi hampena komi natuwu naeka i tingoo Alatala. Naupawee inoha Alatala to laitarimami ee nampajadi komi ana-ana-Na. Pade hante Inoha Alatala ee kita nekio, “Papa, Tuamaku!” 16 Inoha Alatala ee mai hingkani-ngkani hante inohata nohabi ane kita ei ana-ana Alatala. 17 Pade ane kita ei mai ana Alatala, kitami to kana mantarima humawee rahi to laipahadia Alatala hi ana-ana-Na ewa to laitipa-Na. Humawee rahi lako Alatala ee mai tatarima hingkani-ngkani hante Kristus, ane mantahata rara kahehaa ewa to lairasai Kristus, bona kita mui mei rapemabohe hingkani-ngkani hante Kristus.
Harumakaa ana-ana Alatala
18 Apa laiparahayaku mpuu ane kahehaa to lairasaita tempo ei mai, moma'i hangkuana ane rapopohibali hante kasanaa to Nawaikata mei Alatala. 19 Habana humawee ihi dunia ei nalentora mpuu mingki mampahilo Alatala mampopahiloi hemara ana-Na. 20 Alatala nobabei humawee ihi dunia ei nagero pade momami nobunu. Pobabei Alatala lauria nantuku dota-Na moto, moma dota humawee ihi dunia ee. Naupawee, naria harumakaa to iwei: 21 Hangkani tempona mei Alatala mampabakaha humawee ihi dunia lako baraka to nepakagero pade mampawaikara kasanaa hingkani-ngkani hante ana-ana-Na.
22 Laincanita ane duu ei mai, humawee ihi dunia hingkani-ngkani nekakai ewa pekakai hadua bangkele tempona noana. 23 Pade moma wuwu hira to nekakai, kita to neparahaya mui nekakai i rarata, etumi kita to nantarima Inoha to Nagaha halaku popakaroho ane humawee to laitipa Alatala kana madupa. Tempo ei kita nekakai apa laipopeatadipi Alatala mampaongkota mawali ana-Na. Tempo eemi Alatala mampabakaha wotota lako humawee to nampouta. 24 Apa tempota laipakahalama Alatala, laiwaika-Nata harumakaa ane Nabakaha wotota. To laiharumakata ei poma'i lairasaita, apa ane tarasaidimi momami mamala rauli laiharumakatadipi, habana moma naria tauna nampaharumaka napa to lairasainami. 25 Naupawee ane kita nampaharumaka napa to poma lairasaita, nohabarata nampopea napa to iharumakata ee mai.
26 Wee moto mui Inoha to Nagaha nampatulungita i rara kalenteata, habana moma incanita napa to kana tahambayani. Naupawee Inoha to Nagaha nampohambayakata hi Alatala hante pekakai-pekakai to moma'i nateuli. 27 Pade Alatala to nangincani ihi rara manuhia, laincani-Na napa dota Inoha to Nagaha ee mai. Habana Inoha to Nagaha ee mai nohambaya nantuku dota Alatala nampahambayani humawee todea Alatala.
28 Aji, laincanita ane rarana hangu hangaa Alatala nobago bona mangkeni kabeloa hi humawee tauna to nampotowe-'I. Hira eemi mai to laikio Alatala nawali todea-Na nantuku liwo-Na moto. 29 Habana humawee tauna to lako pamulana laincani Alatala, hira mui to laipakatantu-Na lako pamulana Nabaliki bona mahibaliramo hante Yesus Ana-Na, bona Ana-Na ee mai mawali ulumbua hi ompi-Na to nadea. 30 Aji, hira to laipakatantu Alatala lako pamulana, hira ee mui laikio-Na nawali todea-Na. Hira to laikio-Na ee, laipemakono-Na. Pade hira to laipemakono-Na, hira ee mui laipemabohe-Na.
Moma naria to mamala mampopogaata lako towe Alatala
31 Nampalinga humawee to iuliku i wongko he, laincanitami ane Alatala mopahamika hi kita, moma naria to mamala mampadagita. 32 Ana-Na moto moma laipetahai-Na, apa Ana-Na ee mai popewai-Na laipatehi nampatolohi dohata hingkani. Ane ewa ee mai Alatala nampomaihita, bewa pade momata mei Nawaika hangu hangaa to laiparaluuta? 33 Moma hema to mamala mampatuntu tauna to laipelihi Alatala. Apa Alatala moto to nampemakonota. 34 Ane iwee hema to mamala mampatuntuta bona rahukuta? Kristus Yesus eemi to nampotunuita. Hia namate habana dohata pade natuwu nculi-'Imi lako kamatea-Na bo noncuna mali pangkana Alatala i huruga. 35 Hema to mamala mampopogaata lako towe Kristus? Rapakapepaa, rapakahehaa, rahehaki, narumpa oro mpai, moma mowaru, rapararai rapatehi, pade rapararai hante tono lampa, humawee lauria moma namala nampopogaata lako towe Kristus. 36 Ewa naria laitulihi rara Buku to Nagaha iwei,
“Habana peparahaya kami hi Iko, butu eona kami laipararai rapatehi.
Kami lairapaika bimba to rahamale.”
37 Aji, nau napa to mamparumpata rara katuwuta, batena mopabeta bohe oata habana petulungi Kristus to nampotoweta. 38 Apa laiparahayaku mpuu ane belo mamate ba matuwuta, belo malaeka-malaeka ba anudaa, belo to nadupa tempo ei ba to madupa ngkapuri mei, 39 belo baraka to i langi ba to i rara dunia, belo to natuwu ntanina to laipajadi Alatala, humawee lauria moma namala mampopogaata lako towe Alatala to lairasaita habana Kristus Yesus, Pueta.