Alatala nampelihi Israel
9
1 Napa to ku'uli ei mpuu-mpuu nakono, apa nohangu rara'a hante Kristus. Moma'a nokalowo. Pade Inoha to Nagaha nawali habi hingkani-ngkani hante rara bongoku ane napa to ku'uli ei mpuu-mpuu nakono. 2 Iwei to ku'uli: Nadua mpuu raraku pade najuu oa raraku, 3 habana ompi-ompiku to Israel. Ane ke namala, aginapi aku to Nakamo Alatala pade rapopogaa hante Kristus. Nemo ompiku eera mai to moma Natarima Alatala. 4 Apa ompiku to Israel eera to laiongko Alatala nawali ana-Na. Laipahiloi-Naramo Alatala bewa kabohe baraka-Na. Alatala nampotipakara pade laiwaika-Nara patudu Taurat pade laipatudu-Nara bewa mepue hi Hia. To Israel ee muira nantarima humawee tipa Alatala. 5 Hira ee mai muli tumpulokota. Halaku manuhia Kristus laipoanaka to Israel, pade Kristus ee mai neliu baraka-Na lako humaweena. Hiami Alatala to mahipato raune duu kahae-haena! Amin.6 Naupa nadea to Israel moma neparahaya hi Yesus, moma mamala rauli ane Alatala moma nampakadupa tipa-Na. Apa moma humawee muli Israel mpuu-mpuu to Israel. 7 Pade moma mui humawee muli Abraham laiuli muli Abraham to mpuu-mpuuna. Apa Alatala nololita hi Abraham iwei, “Muli Ishak aga to rauli mulimu.” 8 Batuana, moma tau-tauna to laipomulika Abraham to nawali ana-ana Alatala. Wuwu ngana-ngana to laiote habana tipa Alatala aga to laiuli ana-ana Alatala. 9 Apa rara tipa-Na hi Abraham, Alatala nanguli iwei, “Hampae lako welau ei, marataki-'A mei. Tempo ee mai moanami Sara hadua ngana balailo.” 10 Moma wuwu ee, Ribka mui nampotianaka rodua ngana balailo to norapi, lako balailona to laikahangai Ishak, to nawali tumpulokota. 11 Kapomana ngana eera laiote pade nobabei to nabelo ba to nadaa, laipakatantu-Na amimi Alatala hema to laipelihi-Na. Pampelihi Alatala ee moma nantuku napa to laibabei manuhia, naupawee nantuku patuju Alatala moto. 12 Kapomana ngana eera laiote, Alatala nangulika Ribka iwei, “Ana to tuaka mawali batua ana to tuai.” 13 Naria mui laitulihi rara Buku to Nagaha ane Alatala nanguli iwei, “Yakub laipelihi-Ku, naupawee Esau laiporau-Ku.”
14 Aji, bewa? Nantomo hamika-'I Alatala? Natantu ami moma! 15 Apa Alatala nololita hi Musa iwei, “Aku mampotowe tauna to Kupodota Kupotowe, pade mabelo rara-Ku hi hema to Kupodota mabelo rara-Ku.” 16 Aji, pobotuhi Alatala lauria moma nantuku dota manuhia ba pobago manuhia, naupawee nantuku kabelo rara Alatala moto. 17 Apa rara Buku to Nagaha Alatala nangulika magaura to Mesir iwei, “Etu pade laiongko-Kuko nawali magau, bona lako napa to Kubabei rara katuwumu, mamala Kupahiloi baraka-Ku, bona hanga-Ku rapemabohe i humangkulili dunia.” 18 Aji, Alatala na'ahi rara-Na hi hema to ipodota-Na pade nampakakoo rara hi hema to ipodota-Na mui.
19 Natantu maria komi to mampekune'a iwei, “Ane nakono to iulimu lauria, napa pade iuli-Na Alatala nahaladipi manuhia, bo moma hema to mamala mampaewa dota Alatala?” 20 Ompi-ompi, komi etu mai manuhia biaha moto. Moma komi mamala mampahalai Alatala. Moma ami mamala to laipajadi mangulika to nepajadi iwei, “Napa pade ewa ei tariku laipajadi-Mu?” 21 Ewa to nobabei kura tana, hia nobabei tari kura nantuku dotana moto. Lako haloli tana pulu, laibabeina rongu kura. Hangu laibabeina hante patuju rapake i ponikaa, pade hangu laibabeina rapake butu eona. 22 Nahibali hante eemi to laibabei Alatala. Mingki Napahiloi ane nahodo-'I habana doha manuhia pade mingki Napahiloi mui baraka-Na. Naupawee nohabara-'Idipi hi tau-tauna to nampopeumba hodo-Na, to laipahadia-Na rahuku duu kahae-haena. 23 Nohabaradipi Alatala bona tau-tauna to laipotowe-Na, to laipahadia-Na amiramo lako pamulana rapemabohe hingkani-ngkani hante Hia, mangincani kabohe baraka-Na pade kabelo-Na. 24 Tau-tauna to laipotowe-Na ee, kita to laikio-Na nawali todea-Na, moma wuwu to Yahudi, naupawee to moma Yahudi mui. 25 Ewa lolita Alatala i rara buku nabi Hosea nanguli iwei,
“To moma todea-Ku, Ku'uli todea-Ku.
Pade to moma laipotowe-Ku, Ku'uli laipotowe-Ku.”
26 “Pade i rima wengi Alatala nangulikara, ‘Moma komi todea-Ku,’
i hee mui mei Alatala mangulikara, ‘Komi ana Alatala to natuwu.’ ”
27 Pade nabi Yesaya mui nanguli nangkambelai Israel iwei,
“Naupa muli Israel ewa talabone i tahi kadeana,
naupawee hodira aga to rapakahalama.
28 Apa momami mahae Pue mampahuku humawee ihi dunia,
pade pehuku-Na ee mai moma mamala ratawari.”
29 Ewa to iulina mui nabi Yesaya iwei,
“Ane rapana momarapa naria to laipetoro Alatala to Nabaraka nampomulikata,
nawali ewa Sodom pade Gomoratamo.”
To Israel natehunu habana momara neparahaya
30 Aji, iwei patujuku: Tau-tauna to moma Yahudi momara nampehimukui nawali nakono i tingoo Alatala, naupawee Alatala nampemakonora habana neparahayara hi Hia. 31 Hira to Israel, naupa laipehimukuira mawali makono i tingoo Alatala hante nanturuhi patudu Taurat, momara nawali nakono. 32 Napa pade iwee? Apa iulira to Israel, ane madotata makono i tingoo Alatala kana tapoingkuka patudu Taurat, bo kakonona ane madotata makono i tingoo Alatala kana meparahayata hi Alatala. Hira natehunu i watu to nampakatehunu tauna. 33 Ewa naria laitulihi rara Buku to Nagaha iwei,
“Hilo! Laiboli-Ku i Bulu Sion to naria i Yerusalem
hangu watu to mampakatehunu tauna.
Naupawee hema to meparahaya hi watu ee mai,
momara rapakaea.”