10
1 Ompi-ompi, dota raraku pade hambayaku hi Pue, bona to Israel rapakahalama. 2 Mamala'a mohabi nangkambelai hira, ane nokehi mpuura nampobagoka Alatala, naupawee moma incanira bewa nobago to nakono. 3 Moma incanira bewa dala Alatala nampemakono manuhia. Hira nampehimukui nobabei dalara moto bona mawali makonora i tingoo-Na, pade moma laitarimara dala to nakono to laibabei Alatala.Hema-hema to meparahaya hi Kristus rapakahalama
4 Napa to laitulihi rara patudu Taurat laipaganai Kristusmi. Aji, Alatala nampemakono butu dua tauna to neparahaya hi Kristus. 5 Naria to laitulihi Musa nangkambelai bewa dalana mawali makono i tingoo Alatala hante mampoingkuka patudu Taurat. Laitulihina ane hema to nampoingkuka patudu Taurat, kana matuwu habana patudu ee mai. 6 Naupawee, naria patudu ntanina rara Buku to Nagaha nangkambelai bewa dalana tauna mawali makono i tingoo Alatala hante peparahayana. Iwei patudu ee mai, “Nemo mu'uli rara bongomu, hema to mengkahe rau huruga?” (Bona mamperapi Kristus mehompo.) 7 Laitulihi mui iwei, “Pade nemo mu'uli, hema to mehompo rau i lowu to nalimau po'ohaa to mate?” (Bona mampakatuwu nculi Kristus lako kamatea-Na.) 8 Momami mingki mepekune ewa lauria, apa kapolaana laitulihi iwei, “Lolita Alatala namohu hi iko, naria i rara ngudumu pade i raramu.” Eemile lolita Alatala to laiparata kami. Lolita ee mai nanguli ane komi kana meparahaya hi Alatala. 9 Ane mipangaku hante ngudumi ane Yesus ee mai Pue, pade meparahaya komi i rarami ane Alatala nampakatuwu nculi-'I lako kamatea-Na, komi mei kana rapakahalama. 10 Apa ane i rarata neparahayata hi Kristus, Alatala nampemakonota. Pade ane tapangaku hante nguduta ane Kristus ee mai Pue, Alatala kana mampakahalamata. 11 Rara Buku to Nagaha laitulihi iwei, “Hema to meparahaya hi Hia, moma rapakaea.” 12 Apa moma naria pontaniana to Yahudi pade to moma Yahudi. Hadua aga Alatala. Hiami Pue humawee tauna, pade laiwaika-Na oa rahi hi humawee tauna to nohambaya nerapi hi Hia. 13 Apa naria laitulihi rara Buku to Nagaha iwei, “Hema to nohambaya nerapi hi Pue, hia kana rapakahalama.”
14 Naupawee, bewara mamala mohambaya hi Hia ane moma-'I raparahayara? Bewa-'I raparahayara, ane moma raepera kareba nangkambelai Hia? Bewa raepera kareba nangkambelai Hia, ane moma maria tauna to moparata kareba ee hi hira? 15 Pade bewa tauna moparata kareba nangkambelai Hia ane momara ratudu? Ewa naria laitulihi rara Buku to Nagaha iwei, “Nabelo mpuu karatara tauna to nangkarebai Kareba Belo!”
To Yahudi moma namparahaya Kareba Belo
16 Naupawee moma humawee to Yahudi namparahaya Kareba Belo ee mai. Yesaya moto nanguli iwei, “Pue, ke nono momami hema to namparahaya kareba to laiparata kami.” 17 Tauna neparahaya hi Kristus, apa laiepera Kareba Belo ee mai. Kareba Belo ee mai laiepera apa naria tauna to noparata nangkambelai Kristus hi hira. 18 Naupawee mepekune'a olu, nakono poma iepera to Yahudi Kareba Belo ee mai? Moma nakono. Kakonona ieperami, apa rara Buku to Nagaha laitulihi iwei, “Jaritara ee mai laiepe i humangkulili duniami, pade to iulira naratami duu wuntu dunia.” 19 Mepekune mui'a, nakono poma ipahara to Israel Kareba Belo ee mai? Moma nakono. Musa to pamulana ntoto noparata peboha Alatala iwei,
“Kubabei komi mohiri hi tau-tauna to moma todea-Ku,
pade Kupopeumba hodomi hi tau-tauna to moma Yahudi to moma'i napa ncanira.”
20 Pade Yesaya mui nabia noparata peboha Alatala iwei,
“Hira to moma nampali-'A, hira laumi to nampotomu-'A.
Pade hira to moma nampekune-'A, hira laumi to laipoperawaka-Ku woto-Ku.”
21 Naupawee, nangkambelai to Israel, Yesaya noparata peboha Alatala iwei,
“Haeoa-'A noulu paleku
hi hira to moma neturuhi pade to nadea pehonora.”