To Israel to neparahaya hi Yesus pade to nakoo rarara
11
1 Aji, mpuu-mpuu ku'uli: Kakonona, momara laiporau-Na Alatala to Israel. Apa aku ei moto to Israel, muli Abraham lako muli Benyamin. 2 Moma naria Alatala namporau todea-Na to laincani-Na lako pamulana. Laincanimimi napa to laiuli Buku to Nagaha nangkambelai Elia. Tempona nampangaduka to Israel hi Alatala laiulina iwei, 3 “Pue, laipatehirami nabi-nabi-Mu. Watu-watu pantunua kurban hi Iko, laigerohira. Haduakudimi to natuwu, pade mingki muira mampatehi'a.” 4 Naupawee Alatala nampahonoi Elia iwei, “Nariadipi pitu ncobu dua to laipetoro-Ku to nepue hi Aku, to momara nadota nepue hi dewa Baal.” 5 Iwee moto mui tempo ei. Naria habagia kodi tau-tauna to laipelihi Alatala habana kabohe towe-Na hi hira. 6 Alatala nampelihira nantuku kabohe towe-Na moto, moma habana napa to laibabeira. Apa ane pampelihi Alatala ee mai nantuku napa to laibabei tauna, momami mamala rauli kabohe towe Alatala.7 Aji nanotomi ane habagia bohe to Israel moma iratara dala bona mamalara makono i tingoo Alatala. Habagia kodira aga to namparata dala ee. Hira ee mai to laipelihi Alatala. Pade to ntanina laipakakoo rarara. 8 Ewa naria laitulihi rara Buku to Nagaha iwei,
“Alatala nampabungu pekirira bo rarara,
laipakaburo-Na matara bona nemora mampahilo dala to nakono,
pade laipiri-Na talingara bona nemora mangepe kareba to nakono,
duu welau ei.”
9 Pade Magau Daud mui nanguli iwei,
“Palelemi rahi to naria hi hira ee mampakanawura
duuna raratara pehuku mampabalahi ingkura to nadaa ee.
10 Palelemi matara mawali malimau, bona moma rahilora dala to nakono,
pade paleleramo mangkolo pangkolo to nantomo hampena mabungkura duu kahae-haena.”
To Yahudi natehunu, to moma Yahudi laipakahalama
11 Aji mepekune'a, duu kahae-haenara to Yahudi nanawu rara doha? Natantu ami moma. Naupawee habana dohara, tau-tauna to moma Yahudi namparata loga rapakahalama. Alatala nobabei ewa ee mai, bona to Yahudi mampohiriira to moma Yahudi. 12 Habana nadohara to Yahudi pade momara nadota nanturuhi dota Alatala, etu pade Alatala nampawaika rahi bohe ee hi to moma Yahudi. Naupawee ane humawee to Yahudi mohingkabelo nculi hante Alatala, pelabi-labinapi kabohe rahi to Napopewai Alatala hi humawee tauna to neparahaya hi Hia i humangkulili dunia.
13 Napa to ku'uli ei, ku'uli hi komi to moma Yahudi. Apa aku ei mai rasul to laitudu hi to moma Yahudi, pade laipolingaku mpuu bagoku ei mai. 14 Apa laiharumakaku, hante bago ei mai mamala'a mampopeumba hiri rarara ompiku to Yahudi, bona habana hiri rarara ee mamalara bahangkua dua Napakahalama Alatala. 15 Apa tempo Alatala namporaura to Yahudi, laibeaka-Nara humawee tau ntanina i dunia dala bona maria logara mohingkabelo hante Hia. Naupawee neliupi kabelona ane to Yahudi Natarima nculi Alatala. Apa kajadia ee mahibali hante to mate matuwu nculi.
16 Ane roti to pamulana laibabei laipopewai hi Alatala, humawee roti ntanina mui Alatalami tumpuna, pade ane lari kau Alatala tumpuna, humawee raa kau ee mui Alatala tumpuna. 17 To Yahudi lairapaika raa kau zaitun to laitungkai tuda, pade to moma Yahudi lairapaika raa kau zaitun to moma laitungkai tuda. Bahangkua raa kau zaitun to laitungkai tuda ee mai laitompomi, pade i potompoa ee mai laiparika raa kau zaitun to moma laitungkai tuda. Aji, raa kau zaitun to moma laitungkai tuda ee mai namparata bagia to nabelo lako kau zaitun to laitungkai tuda ee mai. 18 Nemora mihauru raa kau zaitun to laitompo ee. Ane mingki mipolinga wotomi, kana milinga ane komi etu mai wule raa to laiparika. Apa moma raa kau to nopakoni larina, naupawee lari kau to nopakoni raana. 19 Baka maria komi to manguli iwei, “Laitompo raa kau ee mai bona mamala'a raparika i potompoana ee mai.” 20 Nakono ami to iulimi. Alatala namporaura to Yahudi habana momara neparahaya hi Kristus. Komi to moma Yahudi laitarima Alatala habana neparahaya komi hi Kristus. Etumo, nemo mipolinga wotomi moto, kana mengkoru komi hi Alatala. 21 Apa ane moma ihoho-Na Alatala rara-Na namporaura to Yahudi to lairapaika raa kau zaitun to laitungkai tuda ee, neparauli hi komi to wule raa kau zaitun to laiparika. Natantu amimi moma Nahoho rara-Na Alatala mamporau komi.
22 Aji, kana mihilo mpuu ane Alatala ee mai nabelo rara-Na pade moma ore-ore-Na ane nampahuku tauna to nahala. Alatala nampahukura to Yahudi to momara neparahaya, naupawee nabelo-'I hi komi. Kana meparahaya dola komi hi Hia, bona mabelo dola-'I hi komi. Apa ane moma iwee, komi mui mei Naporau ewa raa kau zaitun to laitompo. 23 Naupawee ane meparahayaradamo to Yahudi to laiporau Alatala ee, Natarima nculi motora. Habana nabaraka-'I mantarima nculira. 24 Apa komi to moma Yahudi lairapaika raa kau zaitun to moma laitungkai tuda. Komi laitompo pade laiparika i puu kau zaitun to laitungkai tuda, bo moma'i nahibali hipami hante kau zaitun to laitungkai tuda ee. Pelabi-labinapi to Yahudi, to lairapaika raa kau zaitun to laitungkai tuda, natantu moma makoro mamparika nculira i puura ami.
Popakahalamara to Yahudi
25 Ompi-ompi, to laipodotaku bona mincani hangu patudu to ilodo laipopalerui Alatala hi manuhia. Patudu ee mingki ku'ulika komi bona nemo komi mahombo. Patudu ee iwei: Habagia to Yahudi nakoomi rarara, pade batena moto oa makoo rarara duuna humawee tauna to moma Yahudi to laipelihi Alatala marata hi Alatala. 26 Aji, humawee to Yahudi mei rapakahalama, ewa naria laitulihi rara Buku to Nagaha iwei,
“Lako Bulu Sion i Yerusalem mei, marata Magau to Pepakahalama.
Hia mei mampa'ampuni doha humawee muli Yakub.”
27 Alatala nanguli iwei,
“Eimi potipa-Ku to Kubabei hante hira,
tempo-Ku mampa'ampuni dohara.”
28 Momara nadota to Yahudi nantarima Kareba Belo, etu pade hira nawali bali Alatala. Alaana komi to moma Yahudimi namparata rahi. Naupawee hira to Yahudi ee mai to laipelihi Alatala, aji batena motora laipotowe Alatala habana potipa Alatala hi tumpulokora. 29 Apa ane Alatala nampelihi tauna pade nampawaikara rahi, moma laihoho-Na rara-Na nobabei ewa ee. 30 Ilodo moma komi nanturuhi Alatala. Naupawee tempo ei lairasaimimi ahi rara Alatala, habana to Yahudi momara neturuhi hi Hia. 31 Wee moto mui, tempo ei to Yahudi momara neturuhi hi Alatala, bona rahilora ahi rara Alatala hi komi pade hangkani tempona mei ratarimara muihawo ahi rara Alatala. 32 Alatala nampalele humawee tauna moma neturuhi hi Hia. Patuju Alatala, bona mamala-'I mampopehuwu ahi rara-Na hi humawee tauna.
33 Oo, neliu mpuu kahugi, noto, bo kataualu Alatala! Moma hema to nangincani kabotua-kabotua to laibabei-Na pade moma hema nangincani bewa-'I nobago. 34 Rara Buku to Nagaha laitulihi iwei,
“Hema to nangincani pekiri Pue?
Hema to namala nopatudu-'I?
35 Moma hema haduaa to nampopewai nau hangaa aga hi Alatala,
hampena moma naria to kana Napahawa.”
36 Apa hangu hangaa Alatala to nopajadi. Hia moto to nampodoo humawee to laipajadi-Na. Pade humaweena Hia tumpuna. Alatalami to mahipato rapemabohe duu kahae-haena! Amin.