Bewa mepue to nakono hi Alatala
12
1 Ompi-ompi, na'ahi mpuu rara Alatala hi kita. Aji kuperapi mpuu hi komi, bona mipopewai wotomi halaku pewaimi to natuwu, muntu hi Alatala, to nampakagoe rara-Na. Eemi koro pepuemi hi Alatala. 2 Nemo mahibali ingkumi hante ingku manuhia to nadaa i dunia ei. Palelemi Alatala mampakabou pekirimi bona mobali ingkumi. Ane iwee, mamala mincani dota Alatala. Dota Alatala ee mai to nabelo, to nampakagoe rara-Na pade to moma naria hodia kakuraana. 3 Alatala nampaongko'a nawali rasul habana kabohe towe-Na moto. Etu pade ku'ulika komi hadua bo hadua iwei, nemo mipekiri ane neliupi pobunumi lako tau ntanina. Nabelopa komi mampekiri wotomu hante makono mantuku peparahaya to laipopewai Alatala hi butu duami.4 Wotota hangu aga, naupawee nadea parewana. Pade humawee parewa wotota ee mai moma nahibali bagora. 5 Iwee moto mui kita todea Alatala. Naupa nadeata, kita ei hangu woto motota apa nohangu rarata hante Kristus. Pade noneparaluuta hadua bo hadua halaku parewa woto Kristus. 6 Butu duata laiwaika pampakulea to moma nahibali, nantuku napa to laiwaika-Nata Alatala lako kabohe towe-Na. Aji, ane pampakuleata ee mai moparata peboha Alatala, tababeimi ewa ee mai mantuku peparahayata. 7 Ane pampakuleata ee mai mantulungi tau ntanina, kana mpuu-mpuuta mantulungi tau ntanina. Iwee moto mui ane pampakuleata mopatudu tau ntanina, kana mpuu-mpuuta mopatudu tau ntanina. 8 Ane pampakuleata mampakaroho rara tau ntanina, kana mpuu-mpuuta mampakaroho rara tau ntanina. Ane pampakuleata mewai, kana mewaita hante kalori rarata. Ane pampakuleata halaku to pangkeni, kana marajita mampobago bago to laiparahayakata. Ane pampakuleata ma'ahi rarata hi tau ntanina, kana tapoingkuka ahi rarata ee hante kagoeta.
Patudu bona matowe
9 Poingkukami towe ee mai hante kalori rara. Babeimi ingku to nabelo pade podaami ingku to nadaa. 10 Kana momepotowe komi halaku to po'ompi pade kana mibila ompimi melabi lako pampabilami wotomi moto. 11 Kana maroho wukumi mampobagoka Pue, nemo malente. 12 Kana magoe moto oa rarami habana komi noharumaka Pue. Kana mohabara komi mantingohi kahehaami pade mohambaya moto oa komi. 13 Tulungira todea Alatala to nakakuraa rara katuwura, pade tarimara todea Alatala i houmi naupa momara laincanimi. 14 Hambayanira to nampaduahi komi bona Alatala mantiroira, nemora mikamo. 15 Kagoemo komi hante tauna to nagoe, pade kakeomo komi hante tauna to nakeo. 16 Kana mohangu rara bo mohangu pekiri moto oa komi rara katuwumi. Nemo mahombo, pade podoheramo to nakahiahi katuwura. Nemo miuli neliupi kataualumi lako to ntanina. 17 Ane maria tauna madaa ingkuna hi komi, nemo mibalahi. Poingkukami to nabelo hi humawee tauna. 18 Kana mipehimukui mpuu matuwu mohingkabelo hante humawee tauna.
19 Ompi-ompi to ipotoweku, nemo mibalahi tauna to nampakadua rarami, naupawee palelemi Alatala mampahuku'i, apa rara Buku to Nagaha Pue nololita iwei, “Aku aga to mamala mebalahi. Kana Kuhukura to nadaa ingkura.” 20 Pade naria mui laitulihi rara Buku to Nagaha iwei, “Ane balimu maoro, pakoni'i. Ane mabai wuuna, painu'i. Ane iwee mibabei, maea moto'imi habana nadaa rarana hi iko.”a 21 Nemo madaa ingkumi hi tauna to nadaa ingkura hi komi. Dagimi ingku to nadaa hante mobabei ingku to nabelo.