Kana matundu hi to poparenta
13
1 Butu tauna kana matundu hi to poparenta, apa moma naria to poparenta to moma laipodota Alatala, pade humawee to poparenta, namalara noparenta habana laipakatantu Alatala. 2 Etumo, hema to nampaewa to poparenta, hia nampaewa dota Alatala. Hema to moingku ewa ee, hia nangkeni pehuku hi wotona moto. 3 Apa ane hadua tauna mabelo ingkuna, wetumi maeka hi to poparenta. Naupawee ane madaa ingkuna, kana maeka'i hi to poparenta. Madota komi matuwu moma maria ekami hi to poparenta? Babeimi ingku to nabelo bona raunera komi. 4 Apa to poparenta ee mai batua Alatala to nangkeni kabeloa hi komi. Naupawee ane madaa ingkumi, kana maeka komi hi hira, apa nabarakara mampahuku komi. To poparenta ee mai batua Alatala to mampahuku tauna to nadaa ingkura. 5 Etu pade kana matunduta hi to poparenta, moma wuwu habana naekata rahuku, naupawee habana pampekirita moto mui nanguli ane mahipatota matundu hi to poparenta. 6 Etu muimi habana pade nobayari paja komi. Apa to poparenta ee mai batua Alatala to mahipato mamparata tomo lako bagora ee. 7 Bayarimi hi humawee tauna napa to kana mibayari hi hira. Bayarimi paja ba ongkoho to ntanina hi hira to mahipato mantarima. Pengkorumo hi tauna to mahipato rapengkorui pade bilara tauna to mahipato rabila.Towe ee mai nopaganai patudu Taurat
8 Nemo komi moinda napa-napa hi tau ntanina. Naupawee kana momepotowe oa komi hadua bo hadua. Wuwu ee aga inda to naria hi kita. Apa hema to nampotowe hingka manuhiana, hia nampoingkuka humawee atura rara patudu Taurat. 9 Apa rara patudu Taurat naria atura laitulihi iwei, “Nemo mogau hala, nemo mepatehi, nemo mangio, nemo mampokailu napa to naria hi tau ntanina.” Ane laipoingkukatapi parenta to hangu ei, “Potowemi hingka manuhiamu ewa pampotowemu wotomu moto,” ee mai nahibali hante laipoingkukata purami parenta lauria pade humawee parenta ntanina rara patudu Taurat. 10 Apa ane hadua tauna nampotowe hingka manuhiana, natantu ami moma'i mobabei ingku to nadaa hi tauna to laipotowena ee. Aji, hante nampotowe hingka manuhiata, kakonona laipoingkukatami humawee atura rara patudu Taurat.
11 Humawee lauria kana mibabei, apa incanimi ane temponamo komi mopamula bagomi ewa tauna to lako nemata noturu. Apa nahaetamo neparahaya hi Pue, pade tempo ei kamoo-mohuami tempona Alatala mampakahalamata. 12 Nahaemi bengina, lau parabaami, momami mahae mabaa. Aji, nemotapa mobabei ingku to nadaa ewa tauna to natuwu i rara kalimauana. Kana tapakemi parewa pohiwali to mahipato rapake rara kabaana. 13 Kita kana matuwu hante ingku to nabelo ewa to laibabei tauna i kabaana. Nemota mobabei pohuhaa mantuku dota rara pade nemota malangu-langu. Nemota mogau hala pade nemota mantuku dota rarata to nadaa. Nemota mobungka pade nemota momepohirii. 14 Kana mituku ingku Pue Yesus Kristus rara katuwumi, pade nemo mpuupa komi mampali kaohaa rarami to nadaa.