Nemo muhalai ompimu
14
1 Tarima belora jumaa to nalente peparahayara, pade nemo mihalai pampekirira. 2 Naria tauna to namparahaya ane mamala'i mangkoni humawee pangkoni. Naupawee tauna to nalente peparahayana nanguli ane to mamala nakoni uta-uta aga. 3 Hema to nangkoni humawee pangkoni, nemo napandaente tauna to moma nangkoni humawee pangkoni. Pade hema to moma nangkoni humawee pangkoni, nemo nahalai tauna to nangkoni humawee pangkoni. Apa Alatala nantarima tauna ee nawali todea-Na. 4 Nemo komi mampahalai batua tau ntanina, apa maradikana moto moma nampahalai'i. Ba mabelohawo pobagona ba moma, ee mai uruhia maradikana moto. Pade natantu ami mabelo moto pobagona apa Pue nabaraka mobabei bona mabelo moto pobagona.5 Naria bahangkua dua tauna to namparahaya ane naria eo to neliupi pobununa lako eo ntanina, naupawee tau ntanina mui namparahaya, humawee eo nahibali aga. Koropokona butu tauna kana naparahaya mpuu ane napa to ipekirina ee mai nakono. 6 Hema to nanguli naria haeo to neliu pobununa, ee mai laibabeina habana pebilana hi Pue. Pade hema to nangkoni humawee pangkoni, hia mui nobabei ee habana pebilana hi Pue, apa nosukuru'i hi Alatala habana pangkoni ee mai. Pade hema to moma nangkoni humawee pangkoni, ee laibabeina habana pebilana hi Pue, pade nosukuru mui'ihawo hi Alatala. 7 Apa ane matuwuta, momata matuwu mampakagoe rarata moto, pade ane mamateta momata mamate mantuku dotata moto. 8 Ane matuwuta, kita matuwu mampakagoe rara Pue, pade ane mamateta kita mamate mantuku dota Pue. Aji, matuwu ba mamateta, batena motota todea Pue. 9 Eemile patujuna Kristus namate pade natuwu nculi, bona Hia mawali Puera to namateramo pade Puera to natuwu. 10 Aji, ompi-ompi, nemo komi mampahalai ompimi hangu kaparahayaa. Nemo mui mihauru ompimi hangu kaparahayaa. Apa humaweeta mei kana mantingohi Alatala i kadera pobotuhia-Na. 11 Apa naria laitulihi rara Buku to Nagaha iwei,
“ Pue nololita, ‘Mpuu-mpuu Ku'uli,
humawee tauna mei kana motingkodu mepue i tingoo-Ku,
pade humawee tauna mampangaku ane Akumi Alatala.’ ”
12 Aji, butu duata mei kana mampahonoi pepekunea Alatala nangkambelai humawee ingkuta.
Nemo mampakadoha ompi hangu kaparahayaa
13 Etumo, nemotapa momehalai. Nabelo laupi ane mikakamu patudu ei: Nemo mpuu tababei ompita hangu kaparahayaa madoha. 14 Halaku tauna to nohangu rara hante Pue Yesus, laincaniku pade laiparahayaku mpuu ane moma naria pangkoni to narumu. Naupawee naria tauna to namparahaya ane naria pangkoni to narumu. Ane nakoni pangkoni ee, nadoha'i. 15 Ane mukoni pangkoni to laipekiri ompimu narumu, laipakaduamumi rarana pade etu nahibali hante moma laipotowemu ompimu ee. Nemo mupakagero peparahaya ompimu hante napa to mukoni, apa namatemi Kristus nampakahalama'i. 16 Aji, ane maria to laipekirita nabelo pade etu mai mampakagero peparahaya ompita, agina nemo tababei bona momata rahalai tauna. 17 Apa ane nawali todea rara poparentaa Alatalatamo, moma pangkoni bo panginu koropokona. To koropokona, kana makonota i tingoo Alatala, matuwu mohingkabelota hante tau ntanina, pade magoeta habana Inoha to Nagaha naria hi kita. 18 Hema to nampobagoka Kristus ewa ee, hia nampakagoe rara Alatala pade laibila manuhia. 19 Etumo, maitamo mampehimukui mpuu matuwu mohingkabelo hante tau ntanina pade momepakaroho rara hante ompita hangu kaparahayaa. 20 Nemo mupakagero bago Alatala hante pangkoni. Hangu hangaa mamala rakoni, naupawee ane napa to mukoni nampakadoha tau ntanina, nahalamoko. 21 Nabelo mpuu ane moma mukoni bau ba muinu ue anggur ba mubabei to ntanina to mampakadoha ompimu. 22 Napa to mubabei mantuku to iparahayamu, ee mai uruhiamu hante Alatala. Apa norahi mpuu tauna to moma nampahalai wotona moto habana nobabei napa to laiparahayana nakono. 23 Naupawee hema to mokarara nangkambelai hangaa pangkoni, pade kahuduana nakoni moto mui'i pangkoni ee mai, Alatala mampahuku tauna ee mai, apa tauna ee mai moma laitukuna napa to iparahayana. Humawee to laibabei, ane moma mantuku napa to laiparahaya, to laibabei ee mai doha.