Kana mometarimata
15
1 Kita to narohomi peparahayata kana mohabara pade mantulungira ompita to poma naroho peparahayara. Nemota mampali kasanaa wotota moto. 2 Butu duata kana mobabei napa to mangkeni kabeloa hi ompita pade to mampakasana rarara. Kana tababei ewa ee mai bona marohoki peparahayara ompita ee mai. 3 Apa Kristus mui, moma-'I nampali kasanaa woto-Na moto. Apa i rara Buku to Nagaha naria laitulihi iwei, “Pepoporera tauna to nampopore-Ko, nambela hi akumi.” 4 Humawee to laitulihi rara Buku to Nagaha, kakonona patudu hi kita bona meharumakata hi Alatala. Patudu rara Buku to Nagaha ee mai nobabeita nohabara nantingohi kahehaa pade nampakaroho wukuta. 5 Mohambaya'a hi Alatala to nampawaikata habara pade nampakaroho rarata, bona Alatala mantulungi komi matuwu mohangu rara bo mohangu pekiri hadua bo hadua, mantuku ingku Kristus Yesus. 6 Ane mohangu rara pade mohangu pekiri komi, mamala komi hingkani-ngkani mampemabohe Alatala, Tuama Pueta Yesus Kristus.7 Etumo, kana mometarima komi hadua bo hadua, ewa Kristus mui nantarimata. Babeimi ewa ee bona Alatala rapemabohe. 8 To ipatujuku nanguli lauria iwei: Kristus ee mai nampatulungira to Yahudi, bona potipa Alatala hi tumpulokota ilodo madupa, hampena manoto hi humawee tauna ane lolita Alatala ee mai nakono. 9 Pade Yesus mui nobabei ewa ee bona tau-tauna to moma Yahudi mamala muirahawo mampemabohe Alatala habana ahi rara-Na hi hira, ewa naria laitulihi rara Buku to Nagaha iwei,
“Etu pade ane tempoku dohera to moma Yahudi,
kana kupemabohe-Ko pade moulia'a mampaune hanga-Mu.”
10 Pade naria mui laitulihi iwei,
“Kagoemo komi tau-tauna to moma Yahudi,
hingkani-ngkani hante todea Alatala.”
11 Pade ei muipi,
“Komi tauna i humawee ngata, unemi Pue,
pade palelemi tauna i humangkulili dunia mampaune Alatala.”
12 Pade nabi Yesaya nanguli iwei,
“Lako muli Isai marata mei Hadua
to moparenta humawee ngatara to moma Yahudi,
pade Hiami to raharumakara.”
13 Mohambaya'a hi Alatala to laiharumakata, bona mpuu-mpuu Napakagoe rarami pade Nawaika komi katuwu to nanone habana neparahaya komi hi Hia. Kuperapi bona peharumakami hi Hia mantambai karohona habana baraka Inoha to Nagaha.
Paulus nanguli napa to laipentidaina notulihi hurana
14 Ompi-ompi, laiparahayaku mpuu ane batena moto komi noingku to nabelo. Nataualumo komi rarana hangu hangaa pade bukumi nonewaika patudu. 15 Naupawee, nabia'a notulihi hi komi hangu hangaa bona mampalingai komi, apa eemi bago to laiwaika-Na'a Alatala habana kabohe towe-Na hi aku. 16 Aku ei mai laiongko Alatala nampobagoka Kristus Yesus hi tau-tauna to moma Yahudi, noparata Kareba Belo lako Alatala hi hira, bona Alatala mantarimara to moma Yahudi halaku pewai to nampakagoe rara Alatala, apa laipakagaha-Naramo Inoha to Nagaha.
17 Aji, namala'a magoe habana bagoku hi Alatala, apa nohangu rara'a hante Kristus Yesus. 18 Moma'a mabia mampojarita to ntanina. Wuwu napa to laibabeiku nampake baraka Kristus aga to kupojarita. Nadea tauna to moma Yahudi nanturuhi Kristus habana nangepe patuduku pade nampahilo to ipobagoku. 19 Tau-tauna to moma Yahudi nanturuhi Kristus habana nadea ngaa tanda bo kajadia to nepakahera laibabei Inoha Alatala rara bagoku. Laikarebaikumi Kareba Belo nangkambelai Kristus i humawee ngata to laikarataiku, lako Yerusalem duuna propinsi Ilirikum. 20 Rara bagoku nokarebai Kareba Belo, laipehimukuiku mpuu bona kukarebai i ngata-ngata to poma naria tau ntanina nangkarebai nangkambelai Kristus. Apa moma'a madota mopadola bago nopatudu Kareba Belo to laipamula tau ntanina i ngata ee. 21 To laibabeiku lauria nahibali hante to laitulihi rara Buku to Nagaha iwei,
“Hira to pomara naria nangepe kareba nangkambelai Hia, kana rahilora-'I.
Pade hira to pomara naria nangepe nangkambelai Hia, mawali mengkao hema-'I kakonona.”
Liwo Paulus rau i Roma
22 Ompi-ompi, habana bagoku eemile hampena poma oa naria logaku tulau mantako komi. 23 Naupawee, nahudumi bagoku i ngata-ngata ei. Ba hangkua mpae'amo noliwo dola tulau mantako komi. 24 Naria liwoku rau i Spanyol. Kuharumaka rara pomakoaku rau mei, mamala'a mehani pade mampotomuka komi. Mahuduta motomu pade magoe hingkani-ngkani, kuharumaka mitulungi'a mopadola pomakoaku rau i Spanyol.
25 Naupawee, rau'a i Yerusalem olu, mangkeni doi petulungi hi todea Alatala i ria. 26 Apa naboturamo to Makedonia pade to Akhaya nampopewai doi petulungi hi todea Alatala to nakahiahi i Yerusalem. 27 Kabotuara ee mai laibabeira hante goe rarara. Kakonona kana rababeira ewa ee naupa moma hema mamperapi. Habana lako to Yahudimi hampena tau-tauna to moma Yahudi nantarima rahi lako Alatala. Aji, to moma Yahudi mahipato mantulungi to Yahudi hante kahugia dunia to naria hi hira. 28 Ane mahududimi bago ee mai kubabei pade kupopewaimi hi to Yahudi napa to laipopewaira ompita ee, meongko'amo rau Spanyol mantara i ngatami. 29 Pade laincaniku ane marata'a mantako komi, Natiroi purata Kristus hante melabi-labi. 30 Aji, kuperapi mpuu hi komi bona hingkani-ngkanita mohambaya mpuu-mpuu hi Alatala, mampahambayani'a, apa neparahayata hi Pueta Yesus Kristus pade Inoha to Nagaha nampawaikata pampakulea nampotowe tau ntanina. 31 Mohambayata bona moma'a rakua-kuara tauna to moma neparahaya i Yudea. Pade tahambayani mui bona todea Alatala i Yerusalem mantarima belo petulungi to laikeniku ei. 32 Taperapi mui, ane Napodota Alatala, mamala'a mehani hi komi hante goe raraku, bona mamalata momepakaroho mporara. 33 Mohambaya'a bona Alatala to newai katuwu to nanone mampodohe moto oa komi. Amin.