Tabe
16
1 Rara hura ei mai mingki kukewoka komi nangkambelai Febe, ompita hangu kaparahayaa. Hia etu mai ompita bangkele to nampobagoka Kristus hi jumaa i Kengkrea. 2 Kuperapi bona mitarima'i halaku ompi hangu kaparahayaa, ewa kabiahaata todea Alatala. Tulungi'i ane maria kaparaluana, apa hia etu mai nadeamo tauna laitulungina, pade hante aku mui laitulungina. 3 Uli tabeku hi Priskila pade Akwila. Hira etu mai dohe hampobagoaku nampobagoka Kristus Yesus. 4 Priskila pade Akwila etu ke nono mamate habana nampotunui'a. Moma wuwu aku to manguli nadea belona hi hira, naupawee humawee jumaa i ngata-ngatara to moma Yahudi. 5 Uli mui tabeku hi jumaa to nahiromu oa i hou Priskila pade Akwila. Tabeku hi Epenetus doheku to laipotoweku. Hia etumi to pamulana ntoto neparahaya hi Kristus i propinsi Asia. 6 Tabeku hi Maria to nampobagoka ntomo komi. 7 Tabeku hi Andronikus pade Yunia ompi-ompiku to Yahudi to nariara laitarungku hingkani-ngkani hante aku. Hira etu mai tauna to laibilara rasul. Kapomaku neparahaya hi Kristus, hira etu mai neparahayaramo. 8 Tabeku hi Ampliatus doheku to laipotoweku. Hia etu mai hadua to nohangu rara hante Pue. 9 Tabeku hi Urbanus dohe hampobagoa kami nampobagoka Kristus, pade tabeku mui hi Stakhis doheku to laipotoweku. 10 Tabeku hi Apeles to batena moto'i neparahaya hi Kristus, naupa nadea ngaa kahehaa namparumpa'i. Tabeku hi hira to hancou hante Aristobulus. 11 Tabeku hi Herodion ompiku to Yahudi. Tabeku hi hira to hancou hante Narkisus to neparahaya hi Pue. 12 Tabeku hi Trifena pade hi Trifosa. Tabeku hi Persis doheku to ipotoweku. Bangkele to tolu dua etu mai laipehimukuira mpuu nampobagoka Pue. 13 Tabeku hi Rufus to moma iodena nampobagoka Pue, pade tabeku mui hi tinana to nampowali'a anana. 14 Tabeku hi Asinkritus, Flegon, Hermes, Patrobas, Hermas pade humawee ompi hangu kaparahayaa to nahiromu oa hingkani-ngkani hante hira. 15 Tabeku hi Filologus pade Yulia, Nereus pade ompina bangkele, pade Olimpas, pade hi humawee ompi hangu kaparahayaa to nahiromu oa hingkani-ngkani hante hira. 16 Pometabe komi hante towemi hadua bo hadua halaku to po'ompi.a Jumaa-jumaa Kristus i humawee ngata nampakatu tabera hi komi.Pepaingai
17 Ompi-ompi, kupatudu komi bona mainga komi hi hira to nampopeumba pomehalapaha pade nampakagero peparahaya tauna hi Pue. Patudu to laiparatara hi komi moma nahibali hante patudu to laitarimami lako ilodo. Nemora mipodohe tauna to ewa etu! 18 Apa tau-tauna to ewa etu mai kakonona momara nampobagoka Kristus, Pueta. Hira nampobagoka ihi ntaira moto. Pade hante jaritara to nabelo pade bahara to namomi, laipatiwoora tauna to moma napa ncanira.
19 Kareba nangkambelai katigumi nanturuhi Kareba Belo, laiepe humawee taunami. Etu pade nagoe mpuu'a hi komi. Dotaku bona mataualu komi moingku to nabelo pade moma mincani moingku to nadaa. 20 Mohambaya'a hi Alatala to newai katuwu to nanone, bona dungku Napakaropumi baraka Magau Heta pade Nawaika komi baraka mampadagi'i. Mohambaya mui'a bona kabohe towe Yesus Pueta mampodohe moto oa komi.
21 Timotius doheku hampobagoa nopakatu tabena hi komi. Iwee mui Lukius, Yason pade Sosipater, nopakatu tabera hi komi. Hira ee ompi-ompiku to Yahudi. 22 Tabe i rara hanga Pue lako hi aku Tertius, ompimi hangu kaparahayaa. Akumi to notulihi hura ei nantuku napa to laiuli Paulus.
23 Gayus mui nopakatu tabena hi komi. I hou Gayus etu'a no'oha pade i houna eemo kami nepue hingkani-ngkani hante jumaa. Erastus to poboli doi ngata mui nopakatu tabena hi komi. Iwee mui Kwartus ompita hangu kaparahayaa, nopakatu tabena hi komi. [ 24 Mohambaya'a bona kabohe towe lako Pueta Yesus Kristus, mampodohe komi. Amin.]
Alatala aga to mahipato raune
25 Raunemi Alatala to nabaraka nampakaroho peparahayami, habana laiepemimi Kareba Belo nangkambelai Yesus Kristus to laiparataku. Kareba Belo ee mai iatu mpaenami laipopalerui pade moma hema nangincani lako ilodo. 26 Naupawee tempo ei patuju Alatala to laipopalerui ee mai, laikewo hi kita i rara buku to laitulihira nabi owi. Pade Alatala to natuwu duu kahae-haena nampetudui bona patuju-Na ee mai rakewo hi humawee tauna i dunia, bona humawee manuhia mamala meparahaya hi Kristus pade manturuhi Alatala. 27 Hiami Alatala to nangincani hangu hangaa. Moma naria Alatala ntanina. Raunemi Alatala duu kahae-haena habana napa to laibabei Yesus Kristus. Amin.