Nadea ngaa pampakulea, naupawee hadua aga Inoha to newai
12
1 Ompi-ompi, nangkambelai pampakulea-pampakulea to laipopewai Inoha to Nagaha, dotaku bona mipaha mpuu pampakulea to laipopewai Inoha to Nagaha ee. 2 Ncanimi motomi ane kapomami nangincani Alatala, komi laipakeni nepue hi pue-pue ntanina to moma nojarita. 3 Etumo, kana mincani ane tauna to naponu hante Inoha Alatala, moma'i madota manguli, “Mahilakami Pue Yesus!” Pade moma mui maria haduaa tauna to manguli, “Yesus ee mai Pue,” ane moma'i maponu hante Inoha to Nagaha.4 Nadea ngaa pampakulea, naupawee hadua aga Inoha to Nagaha to mampopewai pampakulea ee mai. 5 Nadea ngaa pampakulea nampobagoka Pue, naupawee hadua aga Pue to laipobagoka. 6 Nadea ngaa dala to laiwaikata mampobago bago Pue, naupawee hadua aga Alatala to nobago rara katuwu humawee tauna.
7 Butu duata laiwaika pampakulea lako Inoha to Nagaha bona mangkeni kabeloata hingkani. 8 Hi to hadua, Inoha to Nagaha nampawaika'i pampakulea nojarita hante noto, pade hi to ntanina Inoha to Nagaha to nahibali nampawaika'i pampakulea nojarita hante kataualua. 9 Hi to hadua, Inoha to Nagaha nampawaika'i pampakulea neparahaya mpuu, pade hi to ntanina Inoha to Nagaha to nahibali nampawaika'i pampakulea nepakauri. 10 Hi to hadua, Inoha to Nagaha nampawaika'i pampakulea nobabei to nepakahera, pade hi to ntanina Inoha to Nagaha to nahibali nampawaika'i pampakulea noparata peboha Alatala, pade hi to ntanina muipi Inoha to Nagaha ee mai nampawaika'i pampakulea nangincani uma Inoha to Nagaha, uma inoha to nadaa. Hi to hadua, Inoha to Nagaha nampopewai pampakulea nampake baha Inoha to Nagaha, pade hi to ntanina Inoha to Nagaha to nahibali nampawaika'i pampakulea nobatuani baha Inoha to Nagaha ee mai. 11 Humawee pampakulea lauria narata lako Inoha to Nagaha to nahibali aga, moma naria ntanina. Butu dua tauna hore-hore laiwaika pampakulea to nontani nantuku dota Inoha to Nagaha.
Hangu woto naupawee nadea bagiana
12 Kristus ee mai mamala rarapaika woto manuhia. Hangu aga woto, naupawee nadea bagiana. Humawee bagia woto to nadea ee mai nawali hangu woto aga. 13 Wee moto mui humaweeta, belo to Yahudi bo to moma Yahudi, belo batua bo to moma laipobatua, laidiu-Na hingkanitamo Inoha to hadua ee mai bona kita mawali hangu woto. Pade humaweeta mui nantarima Inoha to hadua ee mai i rarata.
14 Wotota moma aga hangu bagia, naupawee nadea bagia. 15 Ane paa manguli, “Apa moma'a pale, aji moma'a bagia lako woto,” nakono moma'i bagia lako woto? 16 Pade ane talinga manguli, “Apa moma'a mata, aji moma'a bagia lako woto,” nakono moma'i bagia lako woto? 17 Ane rapana woto ee mai humaweena mata, bewata me'epe? Pade ane rapana woto ee mai humaweena talinga, bewata me'enga? 18 Naupawee hilota motomi Alatala noboli butu bagia woto i hangu woto. Butu bagia ee mai laiboli-Na i hore-hore poboliana nantuku dota-Na moto. 19 Ane rapana woto ee mawali hangu bagia aga, momami mamala rauli woto. 20 Kakonona, nadea ngaa ami bagia woto, naupawee hangu aga woto.
21 Aji, mata moma mamala mangulika pale iwei, “Momako paraluuku,” pade woo moma mamala mangulika paa iwei, “Momako paraluuku.” 22 Bagia lako woto to hiloana nalente, ee laumi to iparaluu ntoto. 23 Pade bagia-bagia woto to laipekirita moma'i nabelo gaga, bagia-bagia woto to ee laumi to laiuruhita belo. Pade bagia-bagia woto to moma'i nahipato rahilo doo, eemi to laiwarui belota. 24 Bagia-bagia woto to nahipato rahilo doo, moma lau'i laiuruhi belota ewa lauria. Aji, weemi Alatala noaturu pobolia bagia-bagia wotota, bona bagia wotota to laipekirita moma'i nabelo gaga, ee laumi to laiuruhita belo. 25 Alatala noaturu ewa ee mai bona bagia-bagia woto ee mai moma matebagi-bagi. Pade bagia-bagia woto to hore nontani ee mai mometulungi. 26 Ane hangu bagia madua, humawee bagia morasai kaduana. Ane hangu bagia raune, humawee bagia magoe.
27 Humaweemi nawali woto Kristus, pade butu duami nawali bagia lako woto Kristus ee mai. 28 I rara jumaa, hore-hore bago laipakatantu-Na amimi Alatala iwei: Pamulana halaku rasul, karongaana halaku nabi pade katolu ngaana halaku guru. Napu ee naria mui to laiwaika pampakulea nobabei to nepakahera, nepakauri, nampatulungi doo, nawali to pangkeni, pade nampake baha Inoha to Nagaha. 29 Natantu ami moma humawee tauna laiongko Alatala nawali rasul ba nabi ba guru. Moma mui humawee tauna laiwaika pampakulea nobabei to nepakahera, 30 ba nepakauri, ba nampake baha Inoha to Nagaha, ba nobatuani baha Inoha ee mai. 31 Aji pehimukuimi bona mirata pampakulea to neliu pobununa. Naupawee nariadipi to ku'ulika komi to neliupi kabelona.