11
1 Tukumi ingkuku, nahibali hante aku mui nantuku ingku Kristus.Ingku ane mohambaya ba moparata peboha Alatala
2 Kana ku'une komi habana rara hangu hangaa lailingami moto'a pade natigu komi nangkakamu patudu to laipadolaku hi komi. 3 Naupawee dotaku bona mincani aga to ku'uli ei: Kristus ee mai woo humawee balailo. Balailo ee mai woo bangkele. Pade Alatala ee mai woo Kristus.a 4 Butu balailo to nohambaya ba noparata peboha Alatala hante notalou, hia ee moma nampabila Kristus halaku woona. 5 Naupawee butu bangkele to nohambaya ba noparata peboha Alatala hante moma notalou, moma'i nampabila balailona halaku woona. Apa hia nahibali hante bangkele to laipakaea hante laikokulori. 6 Habana ane maria bangkele malohe'i motalou, agina napopepudu laumi wuluana. Naupawee ane maea'i rapudu wuluana ba rakokulori, agina motalou'i. 7 Balailo moma'i mamala motalou, habana balailo laipajadi nantuku hipa Alatala, bona Alatala rapemabohe. Naupawee bangkele laipajadi bona balailo rapemabohe. 8 Habana balailo moma laipajadi lako bangkele. Naupawee bangkele laipajadi lako balailo. 9 Pade balailo moma laipajadi bona mantulungi bangkele, naupawee bangkele laipajadi bona mantulungi balailo. 10 Etu pade bangkele kana motalou'i halaku tanda ane naria kaparahayaa laiwaika'i. Pade ingkuna ee mai laihilora malaeka Alatala. 11 Naupawee, i rara katuwuta halaku to pantuku Pue, bangkele namparaluu balailo pade balailo namparaluu bangkele. 12 Apa nahibali hante bangkele laipajadi lako balailo, balailo mui laiote bangkele. Naupawee, humaweera Alatala to nopajadi. 13 Aji, pekiri motomo komi, mahipatodi bangkele mohambaya hi Alatala hante moma motalou? 14 Laincanimi motomi ada kabiahaa manuhia, moma mahipato balailo malanga wuluana. 15 Naupawee ane bangkele malanga wuluana, etu mai pampemabohe'i. Apa wulua laiwaika hi bangkele halaku potalou woona. 16 Ane maria to mingki mampabili to iuliku ei, iwei aga to ku'uli: Ane kami hante jumaa-jumaa Alatala, kabiahaa to iuliku lau aga to ituku kami, moma naria kabiahaa ntanina lako ee mai.
Ingku to moma nahipato tempo nahiromu nangkoni roti bo nanginu ue anggur nampalinga kamate Pue
17 Nangkambelai to ku'uli ei moma'a madota mampaune komi, apa kahiromuami nogambara moma nangkeni to nabelo, aga nangkeni to moma nabelo. 18 Pamula-mulana iepeku, tempomi nahiromu halaku jumaa, nonehalapaha komi, pade laiparahayaku ane habagia to laiepeku ee mai nakono. 19 Kana maria ami pomehalapahami bona rahilo mei hema komi to mpuu-mpuu neparahaya hi Pue. 20 Tempomi nahiromu nangkoni roti bo nanginu ue anggur, ingkumi momami ewa to nampalinga kamate Pue Yesus. 21 Habana rara kahiromuami ee mai, moma komi nahintuwu nangkoni. Naria komi to nangkoni noilodo, hampena to ntanina naoro pade to ntanina nalangu. 22 Apa moma naria moto houmi mipake mangkoni bo manginu? Ba mingki mampopore jumaa Alatalada komi pade mampakaeara tauna to momahawo naria napara? Napa to kana ku'ulika komi? Mampaune komi? Moma komi ku'une hante ingkumi to ewa ee mai.
23 Napa to laipatudukaku komi nangkambelai kahiromua nampalinga kamate Pue Yesus, laitarimaku lako hi Pue moto. Patudu ee mai iwei: Ngkawengia tempo Yesus laipobalu Yudas, Yesus nangala roti 24 pade nosukuru-'I hi Alatala. Napu ee laitubi-tubi-Na roti ee mai, iuli-Na, “Eimi woto-Ku to rapopewai bona mahalama komi. Babei dolami kabiahaa ei halaku pampalingami-'A.” 25 Wee moto mui napurapa nangkoni, laiala-Na Yesus panginua ue anggur pade iuli-Na, “Ue anggur to i rara panginua ei mai halaku potipa Alatala to nabou hante manuhia, to rapakaroho hante raa-Ku. Babeimi ewa ei mai butu ngkanina komi manginu ue anggur halaku pampalingami-'A.” 26 Habana butu ngkanina komi nangkoni roti pade nanginu ue anggur ewa ei, komi nahibali nangkarebai nculi kamate Pue duu karata nculi-Na. 27 Aji, hema-hema to i rara kahiromua nangkoni roti pade nanginu ue anggur Pue pade moma nantuku ada to nampabila Pue, tauna ee mai nadoha hi Pue apa laipoporena woto bo raa Pue. 28 Etumo, butu tauna kana napareha olu patuju rarana, napu ee pade mamaladi mangkoni roti pade manginu ue anggur ee. 29 Habana hema to nangkoni roti bo nanginu ue anggur pade moma'i lailingana woto Pue, tauna ee mei Nahuku Alatala. 30 Etu pade nadea komi to nalente bo nadua, pade nadeamo komi to namate. 31 Ane tapareha wotota moto, momata Nahuku Alatala. 32 Naupawee ane Nahukuta Alatala, etu halaku patudu Alatala hi kita bona nemota mei rahuku hingkani-ngkani hante dunia. 33 Etumo ompi-ompiku, ane mahiromu komi mangkoni hingkani-ngkani, kana momepopea komi. 34 Ane maria to maoro taina, agina mangkoni ami'i lako houna bona nemo kahiromuami wule mangkeni pehuku Alatala hi komi. Uruhia to ntanina kuaturu ane marata'adamo mei.