Nemo mamporoho hadua to pangkeni
3
1 Ompi-ompi, tempoku ritu dohemi moma'a nojarita hi komi ewa nampojaritakara tauna to naponu hante Inoha Alatala. Nojarita'a hi komi ewa nampojaritakara tauna to natuwu nantuku dota duniaradapa, to poma naroho peparahayara hi Kristus. 2 Komi ewa ngana kodi to nehuhuradapa apa pomara mamala rawaika konia to nakadu. Etu pade to laiwaikaku komi patudu to nadolidipi, poma patudu to nakoro, apa poma ibukumi nampaha patudu ee. Pade duuna welau ei poma oa ibukumi nampaha patudu ee mai, 3 apa natuwu nantuku dota duniadapa komi. Habana nonepohiriidapa komi pade nonehalapaha, ee mai nampahiloi ane kakonona komi natuwu nantuku dota manuhia pade noingku ewa tauna to moma nangincani Alatala. 4 Apa ane mariadapa komi to manguli, “Aku to pantuku Paulus,” pade to ntanina manguli, “Aku to pantuku Apolos,” ee mai nampahiloi ane komi noingku ewa tauna to moma nangincani Alatala. 5 Aku bo Apolos, batua moto kami. Kami nampobagoka Alatala pade nopanuntu komi neparahaya hi Kristus. Kami ei mai hore-hore nampobago bago to laipakoloi-Na kami Pue. 6 Aku notuda, Apolos nobunuhi, naupawee Alatala to nampakatuwu. 7 Aji, koropokona Alatala to nampakatuwu, moma to notuda ba to nobunuhi. 8 To notuda pade to nobunuhi nahibali motora. Hore-horera mei mamparata tomora mantuku bago to laipobagora. 9 Kami ei mai dohe hampobagoa nampobagoka Alatala. Komi lairapaika bone Alatala pade hou Alatala.Jumaa Alatala lairapaika hou Alatala
10 Nantuku kabohe towe Alatala laiongko-Na'amo nawali rasul to noparata Kareba Belo hi komi. Mamala rauli, aku ei ewa tuka to nataualu nobangu hou Alatala. Laibabeikumi pondasi hou ee pade tuka-tuka ntanina nopapola nobangu i lolo pondasi ee. Naupawee butu tuka kana mampanaa belo bewa'i mobangu i lolo pondasi ee mai. 11 Apa Yesus Kristus eemi pondasi to naria amimi, moma naria pondasi ntanina. 12 Naria tuka to nobangu i lolo pondasi ee mai nampake bulawa, halaka, watu to nahuli olina, kau, kawoko to nabangi pade diami. 13 Karata nculi Yesus mei pade rahilodi bewa kabelo bago butu dua tauna. Apa tempo ee mei apu to mampauji bago ee mai, narohodi ba momadi. 14 Ane bago hadua tauna mantaha'i rauji hante apu, tauna ee mei mamparata tomo. 15 Ane bagona ee mapapu, marugi tauna ee. Tauna ee rapakahalama moto'i, naupawee ewa laipakahalama lako rara apu. 16 Apa moma incanimi ane komi etu hou Alatala pade Inoha Alatala no'oha i rarami? 17 Ane maria tauna mampakagero hou Alatala, hia mei Nahuku Alatala. Apa hou Alatala ee mai nagaha, pade komimi hou Alatala.
18 Nemo maria tauna mamparune wotona moto. Ane maria lako hi komi to nampekiri naria notona i tingoo manuhia, nabelo laupi mawali madoyo'i i tingoo manuhia bona maria notona i tingoo Alatala. 19 Apa noto i dunia ei, kadoyoa i tingoo Alatala. Ewa naria laitulihi rara Buku to Nagaha iwei,
“Alatala nopanawu tauna to naria notora,
hante akalara moto.”
20 Pade naria mui laitulihi rara Buku to Nagaha iwei,
“Laincani-Na Pue ane pampekirira tauna to naria notora
kakonona moma naria bununa.”
21 Etumo, nemo komi maria to mampolinga wotomi moto habana nantuku hadua manuhia, apa hangu hangaana laipopewai Puemi hi komi. 22 Paulus, Apolos, Petrus, dunia ei, tuwu, mate, tempo ei, eo ngkapurina mei, humawee lauria komi tumpuna. 23 Naupawee komi etu mai gagu Kristus, pade Kristus ee mai gagu Alatala.