2
1 Ompi-ompi, wee moto mui karataku hi komi nangkarebai liwo Alatala to ilodo laipopalerui-Na hi manuhia. Moma'a narata hante noto manuhia ba nampake baha-baha to nalangko. 2 Apa nabulolimi raraku, ane moma'a mopatudu to ntanina hi komi. To kupatuduka komi muntu nangkambelai Yesus Kristus aga, koropokona kamate-Na laisalib. 3 Tempoku no'oha dohemi, nalente wotoku pade nokaridi'a keni ekaku. 4 Laiparataku kareba nangkambelai Yesus hi komi, moma hante nampake noto manuhia. Tempoku noparata kareba ee mai, Inoha to Nagaha nampahiloi baraka Alatala, 5 bona peparahayami hi Kristus moma mantuku noto manuhia, naupawee mantuku baraka Alatala.Noto to nakono
6 Naupawee ane mojarita kami hi tau-tauna to narohomi peparahayara, naria noto laipojarita kami. Noto ee mai moma noto dunia ei, pade moma mui notora to poparenta i dunia ei. Apa poparentaara mei hangkani tempona rapakaronto. 7 Noto to laipojarita kami ee, noto Alatala to laipopalerui-Na, to laipahadiaka-Na amitamo Alatala kapomana dunia laipajadi-Na bona mamalata mamparata bagia rapemabohe hante Kristus. 8 Moma hema to poparenta i dunia ei to nangincani noto ee mai. Apa ane ke ncanira noto ee, natantu amimi moma-'I rasalibra Pue to laipemaboheta. 9 Naupawee ewa naria laitulihi rara Buku to Nagaha iwei,
“Napa to moma naria laihilo mata
pade moma naria laiepe talinga
bo moma neumba rara pekiri manuhia,
eemi mai to laipahadia Alatala hi tau-tauna to nampotowe-'I.”
10 Apa hante Inoha to Nagaha laikewoka-Natamo Alatala noto-Na. Habana Inoha to Nagaha nangincani hangu hangaa. Nau to laipopalerui Alatala, laincani-Na pura. 11 Apa to nangincani napa ihi rara manuhia, inoha manuhia ee moto. Wee mui Alatala. To nangincani ihi rara Alatala, Inoha Alatala moto. 12 Kita ei, momata nantarima inoha lako dunia, naupawee kita nantarima inoha lako Alatala, bona tancani napa to laipopewai Alatala hi kita hante kabohe towe-Na.
13 Etu pade tempo kami nojarita hi tau-tauna to naponu hante Inoha Alatala nangkambelai to laipopewai Inoha Alatala, moma kami nojarita hante noto manuhia naupawee hante noto to laipopewai Inoha Alatala. 14 Naupawee tau-tauna to moma naria Inoha Alatala i rarara, moma nantarima napa to laiuli Inoha Alatala. Apa hira nanguli, patudu lauria jarita to nadoyo moto'i apa moma'i laipahara, habana to ewa ee mai mamala tapaha ane naria Inoha Alatala hi kita. 15 Tauna to naponu hante Inoha Alatala namala'i nampantarui hangu hangaa, naupawee moma hema haduaa to namala mampantarui tauna ee. 16 Habana naria laitulihi rara Buku to Nagaha iwei,
“Moma hema haduaa to nangincani pampekiri Pue,
moma hema haduaa to namala mopatudu Pue.”
Naupawee kita to neparahaya, nahibali pampekirita hante Kristus.