Hura Paulus to pamulana rau hi jumaa i Korintus
Tabe
1
1 Lako Paulus, to laikio Alatala nawali rasul Yesus Kristus, pade lako hi Sostenes ompita hangu kaparahayaa. 2 Hura ei laipakatu kami hi jumaa Alatala i ngata Korintus, to laipakagaha habana nohangu rara hante Kristus Yesus pade laikio Alatala nawali todea-Na hingkani-ngkani hante humawee tauna i dunia to nepue hi Pue Yesus Kristus. Hiami Pueta pade Puera. 3 Mohambaya kami bona kabohe towe pade katuwu to nanone lako Alatala Tuamata, pade lako Pue Yesus Kristus mampodohe komi.Posukuru
4 Nosukuru oa'a hi Alatala habana kabelo rara-Na hi komi to nohangu rara hante Pue Yesus Kristus. 5 Alatala nampawai komi nadea ngaa pampakulea habana nohangu rara komi hante Kristus. Laiwaika-Na komi kataualua nampojarita lolita-Na pade nadea ngaa pampaha nangkambelai Alatala. 6 To laipopewai Alatala lauria nadupa hi komi habana kareba nangkambelai Kristus nantono mpuumi i rarami. 7 Etu pade bulami nampopea Alatala mampakarata nculi Pueta Yesus Kristus, moma mpuu komi nakakuraa pampakulea lako Inoha to Nagaha. 8 Kristus moto mui to mampakaroho peparahayami hi Hia duu kahudua dunia, bona moma komi makahalaia tempo karata nculi-Na. 9 Alatala ee mai mamala raparahaya, pade Hiami to nangkio komi nohangu rara hante Yesus Kristus Ana-Na, Pueta.
Pomehalapaha rara jumaa
10 Ompi-ompi, rara hanga Pueta Yesus Kristus, kuperapi mohangu baha moto oa komi. Nemo maria pomehalapahami. Mahintuwu moto oa komi, mohangu rara pade mohangu pekiri. 11 Laiulikaku komi ei, apa hira to nohancou hante Kloe nangkewoka'a ane naria pomehalapahami. 12 To laipatujuku, iwei. Naria komi to nanguli, “Aku to pantuku Paulus.” To ntanina nanguli, “Aku to pantuku Apolos.” Naria mui to nanguli, “Aku to pantuku Petrus,”a pade naria muipi to nanguli, “Aku to pantuku Kristus.” 13 Bona mincani, Kristus ee mai moma-'I nateganta-ganta. Moma naria Paulus laihuku mate i kau salib nantolohi dohami. Moma mui komi laidiu rara hanga Paulus. 14 Nosukuru'a hi Alatala habana moma komi hema to laidiuku. Krispus pade Gayus aga to laidiuku, 15 bona nemo maria tauna manguli, ane komi laidiu rara hangaku. 16 (Oo, nakono. Humawee to nohancou hante Stefanus, aku mui to nodiura. Ntanina lako ee mai, momami lingaku ba nariaradapa to laidiuku ba momamidi.) 17 Apa Kristus nampahuro'a bona moparata Kareba Belo, moma'a laihuro-Na mopadiu. Pade laihuro-Na'a noparata Kareba Belo moma hante kataualu manuhia nojarita, bona nemo kamate Kristus i kau salib mawali moma mobunu.
Noto Alatala pade noto manuhia
18 Hi hira tauna to rapakaropu, kareba nangkambelai kamate Kristus i kau salib ee, jarita to nadoyo aga. Naupawee hi kita to laipakahalama Alatala, kareba ee mai nampopahiloi hi kita kabohe baraka Alatala. 19 Apa rara Buku to Nagaha Alatala nanguli iwei,
“Kupakaingu rarara tauna to naria notora,
pade Kupakaronto kataualura tauna to nataualu.”
20 Aji, napa bunura tauna to naria notora? Napa bunura tauna to nataualu nopatudu buku Taurat? Napa bunura tauna to napande nojarita i dunia ei? Apa noto bo kataualu manuhia i dunia ei laibabei Alatala nawali kadoyoa. 21 Alatala ee nanoto mpuu. Laipakatantu-Nami ane manuhia moma namala mangincani Alatala hante notona moto. Etu pade Alatala nobotuhi nampakahalama manuhia to namparahaya Kareba Belo to laiparata kami, to laiulira tauna i dunia ei jarita to nadoyo. 22 To Yahudi momara madota meparahaya ane momara kipahiloi tanda to nepakahera. Hira to Yunani momara madota meparahaya ane momara kipakanotoka hante noto manuhia. 23 Bo kami ei nangkarebai Kristus to laisalib. Kareba ee mai nampakadua rarara to Yahudi. Pade to moma Yahudi nanguli kareba ee mai jarita to nadoyo. 24 Naupawee hira to laikio Alatala nawali todea-Na, belo to Yahudi ba to moma Yahudi, laincanira ane kamate Kristus ee mai nampopahiloi baraka Alatala bo noto Alatala. 25 Apa kareba kamate Kristus to laiuli manuhia jarita to nadoyo, kakonona nampopahiloi noto Alatala, pade nelabipi lako kataualua manuhia. Pade kamate Kristus to laiuli manuhia kalentea Alatala, kakonona nampopahiloi karoho Alatala, pade nelabipi lako karoho manuhia.
26 Ompi-ompi, linga motomi bewa katuwumi kapomami laikio Alatala nawali todea-Na. Mantuku pekiri manuhia, hodi komi aga to naria notomi, hodi komi aga to napangkaa, pade hodi moto mui komi maradika. 27 Naupawee Alatala nampelihi tauna to laiuli manuhia nadoyo, bona mampakaeara tauna to nataualu. Pade laipelihi-Na tauna to laiuli manuhia nalente, bona mampakaeara tauna to naroho. 28 Alatala nampelihira tauna to moma napangkaa, to laipopore pade to moma naria bunura i dunia ei, bona mampakanoto ane napa to laipolinga manuhia i dunia ei moma naria bununa. 29 Aji, nemo maria manuhia to mampolinga wotona i tingoo Alatala. 30 Apa Alatala motomi to nobabei hampena nohangu rara komi hante Yesus Kristus, pade lako Kristus eemi laitarimata noto Alatala. Kristus ee mai nampemakonota i tingoo Alatala, laipajadi-Nata todea-Na pade laitolohi-Nata lako doha-dohata. 31 Ewa naria laitulihi rara Buku to Nagaha iwei, “Hema-hema to mingki mampolinga hangu hangaa, aginapi mampolinga napa to laibabei Pue.”