Ingku Paulus noparata Kareba Belo
9
1 Aku ei mai moma hema nampobatua'a. Aku ei rasul. Aku ei laihilokumi Pueta Yesus. Komimi wua lako bago Pue to ipobagoku. 2 Naupa tau ntanina moma nampangaku'a halaku rasul, naupawee ane komi tantu mipangaku'a, apa peparahayami hi Pue Yesus nampahiloi ane aku ei mpuu-mpuu rasul.3 Ane maria tauna mampahalai'a, kuhonoira iwei: 4 Kami rasul Yesus, natantu ami mahipato kami mantarima pangkoni bo panginu lako bago kami noparata Kareba Belo. 5 Natantu ami mamala kami mangkeni bangkele kami to hangu kaparahayaa rara pomakoa kami noparata Kareba Belo, ewa rasul-rasul ntanina bo hira tuai Pue Yesus pade Petrus. 6 Ba iulimi komi, rodua kami Barnabas moto to kana mobago mampali pangkoni kami? 7 Moma hema to no'ongkohoni wotona moto ane rau'i nohiwali. Tauna to notuda anggur, natantu ami nakoni wuana. Tauna to noewu bimba, natantu ami nainu ue huhu bimba ee mai. 8 Napa to iuliku ee mai moma nehuwu lako pampekiri manuhia. Apa to ewa ee mai naria laitulihi rara buku Taurat. 9 Rara buku Taurat to laiparata Musa laitulihi iwei, “Nemo ragowu ngudu japi to bulana laipake noihe wuli gando, palele motomi mangkuku.” Iulimi komi, japi to laipatuju Alatala? 10 Kakonona kita manuhia to laipatuju Alatala hante pangengko nangkambelai japi ee mai. Apa tauna to nopajeko pade to noihe wuli gando, nampaharumaka mamparata bagiana lako bagona ee. 11 Aji, ane kami nohawu Kareba Belo hi komi, natantu amimi mahipato kami mampaharumaka mantarima to kiparaluu i dunia ei lako hi komi. 12 Aji, ane tau ntanina namala noharumaka mantarima to iparaluura i dunia ei lako hi komi, neparauli kami!
Naupawee moma'i laiala kami napa to mahipato kitarima lako hi komi. Humawee kaparalua kami laipali kami moto bona nemo kaparalua kami ee mampakantomo rarami mantarima Kareba Belo nangkambelai Kristus. 13 Laincanimi moto ane hira to nobago i Hou Alatala namparata pangkonira lako Hou Alatala, pade hira to nobago nampauruhi meja pantunua kurban namparata bagiara lako meja pantunua kurban ee mai. 14 Wee moto mui Pue nampakatantu hi hira to nangkarebai Kareba Belo, kana matuwu lako bagora nangkarebai Kareba Belo ee mai.
15 Naupawee moma naria laialaku hodia to mahipato kutarima. Humawee ee laitulihiku moma bona miwai'a hangu hangaa. Aginapi mamate'a, nemo kagoe raraku ei maronto, apa nagoe mpuu raraku ane moma'i kuala napa to mahipato kutarima. 16 Bagoku nangkarebai Kareba Belo moma mahipato kupolinga, apa ee amimi bago to laituduka-Na'a Alatala. Mahilaka'a ane moma'i kukarebai Kareba Belo lako Alatala. 17 Ane dotaku moto nampobago humawee lauria, mahipato'a mantarima tomo. Naupawee, moma dotaku nampobago humawee lauria. Alatala to nampakoloi'a humawee bago lauria. 18 Ane wee napa tomoku? Ei mai tomoku: Namala'a nangkarebai Kareba Belo naupa moma'a laibayari pade moma laialaku to mahipato kutarima halaku to nobago nangkarebai Kareba Belo.
19 Aku ei mai moma hema to nampobatua'a, naupawee dotaku moto nawali batua humawee tauna, bona madea mpuu tauna to meparahaya hi Kristus. 20 Ane aku dohera to Yahudi, noingku'a ewa kabiahaara to Yahudi, bona mamalara kupanuntu meparahaya hi Kristus. Ane aku dohera to laipatudu manturuhi patudu Taurat, noingku'a ewa tauna to nanturuhi patudu Taurat, naupa kakonona moma'a laipou patudu Taurat. Laibabeiku ewa ee mai bona mamala'a mopanuntura meparahaya hi Kristus. 21 Ane aku dohera to moma nangincani patudu Taurat, aku nawali ewa tauna to moma nangincani patudu Taurat. Naupawee nemo rauli moma laituruhiku parenta Alatala, apa aku ei natundu hi parenta-parenta Kristus. Laibabeiku ewa ee mai bona mamalara tauna to moma nangincani patudu Taurat kupanuntu meparahaya hi Kristus. 22 Ane aku dohera to poma naroho peparahayara, ewa to poma naroho peparahayaku mui'akuwo bona mamalara kupanuntu meparahaya hi Kristus. Aji, aku nantuku nadea ngaa pokaingku tauna bona mamala'a mangkeni bahangkua dua lako hi hira Napakahalama Kristus. 23 Humawee lauria laibabeiku bona Kareba Belo nangkambelai Yesus rapotolele dola, bona mamparata mui'akuwo bagia lako to laitipa Alatala rara Kareba Belo ee.
24 Ompi-ompi, laincanimi ane rara pohilumbaa humawee tauna nohilumba nokumeno, naupawee hadua aga to mamparata hadia. Etumo, pokumenomo komi hante humawee rohomi bona mamala komi mamparata hadia ee mai. 25 Butu tauna to nantuku pohilumbaa, nantanee dota rarana rara hangu hangaa. Hira noingku ewa ee mai bona mamparata hadia to mamala magero, naupawee kita ei nantanee dota rarata rara hangu hangaa bona tarata hadia to moma mamala magero. 26 Etu pade aku ei mai nohilumba hante patuju to natantu amimi. Moma'a to potinju to hampa-hampana nejaguru. 27 Laipabiahaku wotoku bona mamala'a mantanee dota raraku, apa moma'a madota ane mahudu'apa mangkarebai Kareba Belo, aku moto moma'a Natarima Pue.