ناصرت آݪون رو پرڀُو يسُوع نَي نِي منڻ
6
پَڇي پرڀُو يسُوع اوٿ ݾون بَئير ھوئي آپرَي شھر ناصرت ۾ آيو ھانَ اُوئي را چيلا ڀِي اُوئي ڀيڙا ھتا۔ 2 جڏي پويتر ڏِن آيو، تو او ڀگتي گھر ۾ گيو ھانَ ݾيکاوڻ لاگو۔ اُوئي رَي باتون ݾُڻي تموم گھڻا مِنک حيرون ھويا ھانَ پُوڇڻ لاگا ڪہ، ”اِيئي ۾ اترِي ݾمجھ ھانَ پرچا بتاوڻ رِي طاقت ڪيٿ ݾون آئِي ھَي؟ 3 ڪِي اَي او واڍو ڪونھي جڪو مريم رو ڏيڪرو ھَي ھانَ يعقُوب، يُوسيس، يھُودا ھانَ شمعُون رو ڀائي ھَي؟ ڪِي اِيئي رَي ٻينون ايٿ ڪونھي ريتَي؟“ اَي باتون ڪري اُوئون پرڀُو يسُوع نَي ڪونھي منيو۔ 4 پڻ پرڀُو يسُوع اُوئون نَي ڪھيو ڪہ، ”نبِي رِي آپرَي وطن، آپرَي عزيزون ھانَ آپرَي خاندان ݾون ٽاݪ ھر جگھا عِزت ھووَي ھَي۔“ 5 اِيئي رَي ڪري پرڀُو يسُوع رُگو ڪئينڪہ بيمارون تي ھاٿ راکي ݾاجا ڪيئا پڻ اِيئي ݾون ٽاݪ ٻيجو ڪو ڀِي پرچو ڪونھي بتايو 6 ڪيونڪہ اُوئون رو وِشواس نِي ھوئڻ رَي ڪري او تموم گھڻو حيرون ھويو۔ پَڇي پرڀُو يسُوع آݾَي پاݾَي رَي گون ۾ جائي مِنکون نَي ݾيکاوڻ لاگو۔پرڀُو يسُوع رو ٻارھَي سنت ميلڻ
7 پَڇي پرڀُو يسُوع آپرَي ٻارھون چيلون نَي آپ ڏيݾا ھيلو ڪرايو ھانَ اُوئون نَي ٻي ٻي ڪري ميليا ھانَ اُوئون نَي اِختياري ڏينِي ڪہ مِنکون ݾون ڀُوت ڪاڍو 8 ھانَ اُوئون نَي ڪھيو ڪہ، ”مارگ رَي ݾارُو گيڏِي ݾون ٽاݪ ڪئين نِي ليا، نِي ٻاٽِي، نِي ٿيلو ھانَ نِي ھڙ ۾ پَشا۔ 9 جُتا پيريا، پڻ ٻيجِي کميݾ نِي ليا۔“ 10 پرڀُو يسُوع اُوئون نَي اَي ڀِي ڪھيو ڪہ، ”جي ٿي ڪيرَي گھري جائو، تو اُوئي گھر ۾ اُترِي توڻي رھيا جترِي توڻي اوٿ ݾون بَئير نِي ھوئو۔ 11 جي ڪَي جگھا تي مِنک ٿونَي نِي منَي ھانَ ٿونرِي نِي ݾُڻَي، تو اوٿ ݾون جاوتَي بِݪا آپرَي پگون رِي مٽِي ڇنڊي ڇوڙيا ڪہ اُوئون رَي خلاف گواھِي رِي نِشونِي ھووَي۔“
12 پَڇي خاص چيلا گيا ھانَ جائي مِنکون ۾ پرچار ڪيئو ڪہ، ”آپرَي پاپون ݾون توبھون ڪرو۔“ 13 پَڇي اُوئون تموم گھڻَي مِنکون ݾون ڀُوت ڪاڍيا ھانَ تموم گھڻَي مِنکون نَي زيتُون رو تيل لگائي ݾاجا ڪيئا۔
ھيروديس بادشاھ رِي پريشونِي
14 پرڀُو يسُوع تموم گھڻو مشھُور ھويو، تو گليل صُوبَي رَي بادشاھ ھيروديس اُوئي رَي بارَي ۾ ݾُڻيو۔ ڪئينڪہ مِنک ڪيتا ڪہ، ”اَي پويتر سِنون ڏيوَڻ آݪو يُوحنا ھَي جڪو مُوئوڙون ݾون جيتو ھويو ھَي، اِيئي رَي ڪري او پرچا بتاوَي ھَي۔“ 15 ڪئينڪہ مِنک ڪيتا ڪہ، ”اَي ايلياھ نبِي ھَي۔“ ڪئينڪہ ڪيتا ڪہ، ”نبيون ۾ ڪو ھيڪ۔“ 16 پڻ ھيروديس بادشاھ پرڀُو يسُوع رَي بارَي ۾ ݾُڻيو، تو ڪھيو ڪہ، ”اَي يُوحنا ھَي جڪَي رِي مھَي نَݾ بڍائِي ھتِي پڻ او ڀڙي جيتو ھويو ھَي۔“ 17 ھيروديس بادشاھ اَي بات اِيئي رَي ڪري ڪِي ڪيونڪہ اُوئي آپرَي ڀائي فِلپس رِي لُگائِي ھيرودياس ݾون بيئان ڪيئو ھتو ھانَ اُوئي رَي ڪيوَڻ تي يُوحنا پويتر سِنون ڏيوَڻ آݪَي نَي جھلائي جيل ۾ گھاتيو ھتو، 18 ڪيونڪہ يُوحنا ھيروديس نَي ڪھيو ھتو ڪہ، ”ٿارَي ݾارُو جائز ڪونھي ڪہ تُو آپرَي ڀائي رَي جيتَي جِي، اُوئي رِي لُگائِي آپ ڪڍي راکَي۔“ 19 اِيئي رَي ڪري ھيرودياس اُوئي ݾون دُشمنِي راکتِي ھانَ اُوئي رِي مرضِي ھتِي ڪہ اُوئي نَي مرائي ڇوڙَي پڻ اِيئون ڪونھي ھويو 20 ڪيونڪہ ھيروديس بادشاھ، يُوحنا نَي نيڪ ھانَ بي ڏوھي ݾمجھتو۔ اِيئي رَي ڪري او اُوئي ݾون ٻيئاجتو ھانَ اُوئي نَي بچاوڻ رِي ڪوشش ڪرتو۔ او يُوحنا رَي باتون ݾُڻي پريشون ھوتو، پڻ تو ڀِي خُوشِي ݾون ݾُڻتو۔ 21 نيٺ ھيرودياس نَي وارو مِليو۔ ھيروديس آپرَي جنم رِي خُوشِي تي آپرَي وزيرون، فوجي اَگووڻون ھانَ گليل صُوبَي رَي موٽَي مِنکون نَي دعوت ڏينِي۔ 22 تو ھيرودياس رِي ڏيڪرِي محفل ۾ آئي ناچِي ھانَ ھيروديس ھانَ اُوئي را ميموڻ تموم گھڻا خُوش ھويا۔ پَڇي بادشاھ اُوئي ڇوڪرِي نَي ڪھيو ڪہ، ”جڪو مونگڻو ھَي او مونگ، ھُون ٿنَي ڏئين۔“ 23 اُوئي ݾونݾ لي ڪھيو ڪہ، ”جي تُو مھَي ݾون آڌِي بادشاھي مونگِي، تو ڀِي ھُون ٿنَي ڏئين۔“ 24 پَڇي اُوئي ٻاھر جائي آپرِي ما ݾون پُوڇو ڪہ، ”ھُون ڪِي مونگون؟“ اُوئي ڪھيو ڪہ، ”يُوحنا پويتر سِنون ڏيوَڻ آݪَي رِي نَݾ۔“ 25 پَڇي او ڇوڪرِي ڇيڪِي مئين آئِي ھانَ بادشاھ نَي ڪھيو ڪہ، ”مھنَي ھڻون رو ھڻون يُوحنا پويتر سِنون ڏيوَڻ آݪَي رِي نَݾ ٿاݪ ۾ اَڻائي ڏي۔“ 26 اِيئي بات تي ھيروديس بادشاھ تموم گھڻو پريشون ھويو پڻ اُوئي ميموڻون آگھي ݾونݾ لي واعدو ڪيئو ھتو اِيئي رَي ڪري او ڇوڪرِي ݾون نا ڪري ڪونھي ݾگھيو۔ 27 پَڇي بادشاھ اُوئيج ٽيم فوجي نَي حُڪم ڏينو ڪہ اُوئي رِي نَݾ باڍي لي آ۔ او فوجي گيو ھانَ جيل ۾ جائي يُوحنا رِي نَݾ باڍِي۔ 28 پَڇي ٿاݪ ۾ گھاتي اُوئي ڇوڪرِي نَي ڏينِي ھانَ او آپرِي ما ڪڍي لي گئِي۔ 29 اَي بات ݾُڻي يُوحنا را چيلا آيا ھانَ اُوئي رو لاش ليئو ھانَ جائي مٽِي حوالي ڪيئو۔
پونچ ھزار مِنکون نَي ٻاٽِي کݪاوڻ
30 پَڇي ميليوڙا سنت پاڇا آيا ھانَ پرڀُو يسُوع نَي او ݾجو ڪئين ݾُڻايو جڪو اُوئون ڪيئو ھانَ مِنکون نَي ݾيکايو ھتو۔ 31 پَڇي پرڀُو يسُوع اُوئون نَي ڪھيو ڪہ، ”ھالو تو آپي ڪَي ھيکلپائي جگھا ڏيݾا ھالون جيٿ ڪئين آروم ڪرون۔“ ڪيونڪہ تموم گھڻا مِنک پرڀُو يسُوع ڪڍي آوتا اِيئي رَي ڪري اُوئون نَي ٻاٽِي کاوڻ رو ٽيم ڀِي ڪونھي مِلتو۔ 32 پَڇي او ٻيڙِي ۾ چڙھي ھيکلپائي جگھا ڏيݾا گيا۔
33 تموم گھڻَي مِنکون اُوئون نَي جاوتي ڏيٺا ھانَ اوݪکيا۔ پَڇي ݾجائِي مِنک شھر ݾون نڪري آيا ھانَ ناݾي اُوئون ݾون پيل اُوئي جگھا تي پُگا جيٿ او جاوتا پڙيا۔ 34 جڏي پرڀُو يسُوع ٻيڙِي ݾون اُتريو ھانَ اُوئي تموم گھڻا مِنک ڏيٺا، تو اُوئون تي دايا آئِي، ڪيونڪہ او اُوئون رڍون آݪِي ڪار ھتا جڪون رو ڪو ڀِي ڌراڙ نِي ھووَي۔ پَڇي او اُوئون نَي تموم گھڻَي باتون ݾيکاوڻ لاگو۔ 35 جڏي ڏِن آٿوئڻ آݪو ھتو، تو پرڀُو يسُوع را چيلا اُوئي ڪڍي آيا ھانَ ڪھيو ڪہ، ”ايٿ تو رڻ پَٽ ھَي ھانَ رات ڀِي ھوئڻ آݪِي ھَي۔ 36 اِيئي رَي ڪري ٿي ݾجَي مِنکون نَي موڪل ڏيئو، تو آݾَي پاݾَي رَي گون ھانَ ٻنِي ۾ جائي آپرَي ݾارُو کاوڻ پيئڻ رو بندوبست ڪرَي۔“ 37 پڻ پرڀُو يسُوع اُوئون نَي ڪھيو ڪہ، ”ٿي آپ اِيئون نَي کاوڻ رَي ݾارُو ڪئين ڏيئو۔“ چيلون بݪتِي ڏينِي ڪہ، ”ڪِي مھي جائي ٻي ݾئو چوندِي رَي ݾِڪون رَي ٻاٽَي مول لي آئُون ھانَ اِيئون نَي کݪائُون؟“ 38 پرڀُو يسُوع اُوئون ݾون پُوڇو ڪہ، ”ٿون ڪڍي ڪترَي ٻاٽَي ھَي؟ جائي جوئو۔“ اُوئون پُوڇي ݾُڻايو ڪہ، ”پونچ ٻاٽَي ھانَ ٻي مڇَي۔“ 39 پَڇي پرڀُو يسُوع آپرَي چيلون نَي ڪھيو ڪہ، ”ݾجَي مِنکون را ٽولا ٺائو ھانَ اُوئون نَي ݾاوَي گاݾ تي ٻيݾاڙو۔“ 40 پَڇي مِنک ݾئو ݾئو ھانَ پنجاھ پنجاھ رَي ٽولون ۾ ٻيٺا۔ 41 پَڇي پرڀُو يسُوع پونچ ٻاٽَي ھانَ ٻي مڇَي لي آڪاش ڏيݾا جويو ھانَ اُوئون رَي ݾارُو برڪت مونگِي۔ پَڇي او ٻاٽَي ڀونگي چيلون نَي ڏينَي ڪہ او مِنکون نَي ڏَي، اِيئي نمُونَي اُوئي مڇَي ڀِي ݾجَي مِنکون نَي ڏينَي۔ 42 ݾجون مِنکون ڍئو ڪري ٻاٽِي کاڌِي۔ 43 پَڇي چيلون بچوڙَي ٽُڪڙون ھانَ مڇيون را ٻارھَي ٽوڪرا ڀري کڻيا۔ 44 جڪون مِنکون ٻاٽِي کاڌِي اُوئون ۾ رُگو آڏمي پونچ ھزار ھتا۔
پرڀُو يسُوع رو پوڻي تي بيوَڻ
45 پَڇي اُوئيج ٽيم پرڀُو يسُوع آپرَي چيلون نَي آپ ݾون پيل ٻيڙِي ۾ چاڙھي ڊنڍ رَي اُوئي پاݾَي بيت صيدا شھر ڏيݾا ميليا ھانَ پَڇي مِنکون نَي جاوڻ رِي موڪل ڏينِي۔ 46 مِنکون نَي ميلڻ ݾون پَڇي آپ ھيکلو جبل تي پراٿنا ڪرڻ گيو۔ 47 جڏي شام ھوئِي، تو پرڀُو يسُوع ھيکلو ڊنڍ رَي ڪپ تي ھتو ھانَ ٻيڙِي ڊنڍ رَي بِچ ۾ ھتِي۔ 48 اُوئي ڏيٺو ڪہ چيلا ݾوملَي بائيرَي رَي ڪري تموم گھڻِي محنت ݾون ٻيڙِي ھلاوَي پڙيا۔ پَڇي ڏِن اُگڻ ݾون پيل پرڀُو يسُوع پوڻي تي بَئي اُوئون ڪڍي آيو۔ او اُوئون رَي پاݾَي ݾون لنگھڻ آݪو ھتو، 49 جڏي چيلون اُوئي نَي پوڻي تي بيتو ڏيٺو، تو او ݾمجھا ڪہ اَي ڪو ڀُوت ھَي ھانَ او رڙَي ڪرڻ لاگا، 50 ڪيونڪہ ݾجائِي اُوئي نَي ڏيکي ٻيئاجڻ لاگا۔ پڻ پرڀُو يسُوع يڪدم ڪھيو ڪہ، ”ٻيئاجو نِي، دِلجا ڪرو، ھُون ھون۔“ 51 پَڇي جڏي پرڀُو يسُوع ٻيڙِي ۾ ٻيٺو، تو بائيرو يڪدم بند ھوئي گيو۔ اَي جوئي چيلا تموم گھڻا حيرون ھويا۔ 52 بيشڪ اُوئون ٻاٽيون آݪو پرچو ڏيٺو ھتو، تو ڀِي او ݾمجھي ڪونھي ݾگھيا ڪيونڪہ اُوئون را من ڪاٺا ھوئي گيا ھتا۔
پرڀُو يسُوع را گنيسرت ۾ پرچا
53 پَڇي پرڀُو يسُوع ھانَ اُوئي را چيلا ڊنڍ پار ڪري گنيسرت رَي علائقَي ۾ پُگا ھانَ اُوئون ٻيڙِي نَي ڪپ تي ٻونڌِي۔ 54 جڏي او ٻيڙِي ݾون اُتريا، تو اوٿ رَي مِنکون پرڀُو يسُوع نَي اوݪکيو۔ 55 مِنکون اُوئيج ٽيم ݾجَي علائقَي ۾ چارئي پاݾَي جائي پرڀُو يسُوع رَي آوڻ رَي بارَي ۾ ݾجون نَي ݾُڻايو۔ پَڇي جيٿ ڀِي پرڀُو يسُوع گيو اوٿ مِنک آپرا بيمار جھوݪيون ۾ کڻائي اُوئي ڪڍي لي آيا۔ 56 پرڀُو يسُوع شھرون ھانَ گون ۾ جيٿ ڀِي جاوتو اوٿ مِنک آپرا بيمار لائي مارگ ۾ راکتا ھانَ مِنٿون ڪري ڪيتا ڪہ، ”مھربونِي ڪري آپرَي گاڀون رَي پلَي نَي ھاٿ لگاوڻ ڏيئو۔“ پَڇي جڪَي بيمار پرڀُو يسُوع رَي گاڀون نَي ھاٿ لگايو، او ݾاجو ھوئي گيو۔