پويتر سِنون ڏيوَڻ آݪَي يُوحنا رو موت
14
اُوئون ڏِنون ۾ گليل صُوبَي رَي چوٿَي حِصَي رَي گوَرنر ھيروديس اِنتپاس پرڀُو يسُوع رِي بکوڻ ݾُڻِي، 2 تو اُوئي آپرَي نوڪرون نَي ڪھيو ڪہ، ”اَي پويتر سِنون ڏيوَڻ آݪو يُوحنا ھَي، جڪو مُوئوڙون ݾون جيتو ھويو ھَي، اِيئي رَي ڪري او پرچا بتاوَي ھَي۔“3 اِيئي ݾون پيل ھيروديس اِنتپاس آپرَي ڀائي فِلپس رِي لُگائِي ھيرودياس رَي ڪيوَڻ تي پويتر سِنون ڏيوَڻ آݪَي يُوحنا نَي جھلائي جيل ۾ گھاتيو، 4 ڪيونڪہ يُوحنا ھيروديس نَي ڪھيو ھتو ڪہ، ”ٿارَي ݾارُو آپرَي ڀائي رَي جيتَي جِي اُوئي رِي لُگائِي نَي آپ ڪڍي راکڻ جائز ڪونھي۔“ 5 اِيئي بات رَي ڪري ھيروديس يُوحنا نَي مارڻ رَي ݾارُو ڪرتو، پڻ او مِنکون ݾون ٻيئاجتو، ڪيونڪہ مِنک اُوئي نَي نبِي منتا۔
6 جڏي ھيروديس رو جنم ڏِن ملھاوتا پڙيا، تو ھيرودياس رِي ڏيڪرِي محفل ۾ ناچِي۔ ھيروديس اِترو تو خُوش ھويو ڪہ 7 اُوئي ݾونݾ لي واعدو ڪيئو ڪہ، ”جڪو کپَي او مونگ، او ھُون ٿنَي ڏئين۔“ 8 اِيئي تي اُوئي آپرِي ما ݾون پُوڇي ڪھيو ڪہ، ”مھنَي پويتر سِنون ڏيوَڻ آݪَي يُوحنا رِي نَݾ ٿاݪ ۾ اَڻائي ڏي۔“ 9 اَي بات ݾُڻي ھيروديس تموم گھڻو پريشون ھويو، پڻ اُوئي ميموڻون آگھي ݾونݾ لي واعدو ڪيئو ھتو، اِيئي رَي ڪري اُوئي حُڪم ڏينو ڪہ، ”اِيئوج ڪيئو جاوَي۔“ 10 پَڇي اُوئي جيل ۾ يُوحنا رِي نَݾ بڍائي ڇوڙِي۔ 11 پَڇي اُوئي رِي نَݾ ٿاݪ ۾ گھاتي اُوئي ڇوڪرِي نَي ڏينِي ھانَ او آپرِي ما ڪڍي لي گئِي۔ 12 پَڇي يُوحنا را چيلا آيا ھانَ اُوئي رو لاش ليئو ھانَ جائي اُوئي نَي ٻُوريو۔ پَڇي اُوئون جائي ݾجِي بات پرڀُو يسُوع نَي ݾُڻائِي۔
پونچ ھزار مِنکون نَي ٻاٽِي کݪاوڻ
13 جڏي پرڀُو يسُوع اَي بات ݾُڻِي، تو او ٻيڙِي ۾ چڙھي ھيکلپائي جگھا ڏيݾا گيو۔ جڏي مِنکون نَي خبر پڙِي، تو او شھرون ݾون نڪري ݾُوڪَي مارگ پنڌ ڪري اُوئي لاري گيا۔ 14 جڏي پرڀُو يسُوع ٻيڙِي ݾون اُتريو، تو اُوئي تموم گھڻا مِنک ڏيٺا ھانَ اُوئون تي دايا آئِي ھانَ اُوئون ۾ جڪو بيمار ھتا اُوئون نَي ݾاجا ڪيئا۔
15 جڏي ڏِن آٿوئڻ آݪو ھتو، تو پرڀُو يسُوع را چيلا اُوئي ڪڍي آيا ھانَ ڪھيو ڪہ، ”ايٿ تو رڻ پَٽ ھَي ھانَ رات ڀِي ھوئڻ آݪِي ھَي، اِيئي رَي ڪري ٿي ݾجَي مِنکون نَي موڪل ڏيئو، تو او آݾَي پاݾَي رَي گون ۾ جائي آپرَي ݾارُو کاوڻ پيئڻ رو بندوبست ڪرَي۔“ 16 پڻ پرڀُو يسُوع اُوئون نَي ڪھيو ڪہ، ”اَي ڪيٿ ڀِي ڪونھي جاوَي، ٿي آپ اِيئون نَي کاوڻ رَي ݾارُو ڪئين ڏيئو۔“ 17 چيلون ڪھيو ڪہ، ”مھون ڪڍي تو پونچ ٻاٽَي ھانَ ٻي مڇَي ھَي، اِيئي ݾون ٽاݪ ٻيجو تو ڪئين ڪونھي۔“ 18 اِيئي تي پرڀُو يسُوع ڪھيو ڪہ، ”او مھَي ڪڍي لي آئو۔“ 19 پَڇي اُوئي ݾجَي مِنکون نَي گاݾ تي ٻيݾڻ رو ڪھيو۔ پَڇي اُوئي پونچ ٻاٽَي ھانَ ٻي مڇَي لي آڪاش ڏيݾا جويو ھانَ اُوئون رَي ݾارُو برڪت مونگِي۔ پَڇي اُوئي ٻاٽَي ڀونگي چيلون نَي ڏينَي ھانَ اُوئون مِنکون نَي ڏينَي۔ 20 ݾجَي مِنکون ڍئو ڪري ٻاٽِي کاڌِي ھانَ کاوڻ ݾون پَڇي چيلون بچوڙَي ٽُڪڙون را ٻارھَي ٽوڪرا ڀري کڻيا۔ 21 جڪون مِنکون ٻاٽِي کاڌِي، او لُگايون ھانَ ٻاݪون ݾون ٽاݪ اندازن پونچ ھزار رُگو آڏمي ھتا۔
پرڀُو يسُوع رو پوڻي تي بيوَڻ
22 پَڇي اُوئيج ٽيم پرڀُو يسُوع آپرَي چيلون نَي ٻيڙِي ۾ چاڙھي آپ ݾون پيل ڊنڍ رَي اُوئالَي پاݾَي ميليا ھانَ اُوئي مِنکون نَي ڀِي بَئير ڪيئا۔ 23 مِنکون رَي جاوڻ ݾون پَڇي آپ ھيکلو جبل تي پراٿنا ڪرڻ گيو۔ شام توڻي آپ اوٿ ھيکلو ھتو۔ 24 اُوئي ٽيم توڻي چيلا ٻيڙِي ۾ تموم گھڻا اݪگا گيا ھتا ھانَ بائيرَي رَي ڪري ڇوليون ݾون ٻيڙِي لُڏڻ لاگِي۔ 25 رات رو تينون ݾون پَڇي پرڀُو يسُوع پوڻي تي بيتو بيتو اُوئون ڪڍي آيو۔ 26 جڏي چيلون اُوئي نَي پوڻي تي آوتو ڏيٺو، تو او ٻيئاجا ھانَ رڙَي ڪري ڪيوَڻ لاگا ڪہ، ”ڀُوت، ڀُوت۔“ 27 اِيئي تي پرڀُو يسُوع اُوئون نَي ڪھيو ڪہ، ”ٻيئاجو نِي، دِلجا ڪرو، ھُون ھون۔“ 28 اَي ݾُڻي پطرس ڪھيو ڪہ، ”اي پرڀُو، جي ٿي مھنَي حُڪم ڏيئو، تو ھُون ڀِي پوڻي تي بَئي ٿون ڪڍي آئُون۔“ 29 اِيئي تي پرڀُو يسُوع اُوئي نَي ڪھيو ڪہ، ”ڀلي آ۔“ پطرس ٻيڙِي ݾون نڪري پوڻي تي بَئي پرڀُو يسُوع ڏيݾا جاوڻ لاگو۔ 30 پڻ جڏي اُوئي طُوفون ڏيݾا جويو، تو او ٻيئاجي ٻُوڏڻ لاگو ھانَ ٻِي ۾ رَڙ ڪري ڪھيو ڪہ، ”اي پرڀُو، مھنَي بچائو۔“ 31 پرڀُو يسُوع يڪدم آپرو ھاٿ ڏيگھو ڪري اُوئي نَي جھاليو ھانَ ڪھيو ڪہ، ”ٿَي شَڪ ڪيئون ڪيئو؟ ٿارو وِشواس ڪيٿ ھَي؟“ 32 پَڇي جڏي او ٻيڙِي ۾ چڙھيا، تو بائيرو يڪدم بند ھوئي گيو۔ 33 اِيئي تي ٻيڙِي ۾ ٻيٺوڙَي ݾجَي چيلون پرڀُو يسُوع آگھي آپرا شيش نِمايا ھانَ ڪھيو ڪہ، ”ݾاچيلي تُو ايشوَر رو ڏيڪرو ھَي۔“
پرڀُو يسُوع را گنيسرت ۾ پرچا
34 پَڇي او ڊنڍ پار ڪري گنيسرت رَي علائقَي ۾ پُگا۔ 35 اوٿ رَي مِنکون پرڀُو يسُوع نَي اوݪکيو ھانَ اُوئون آݾَي پاݾَي رَي ݾجَي مِنکون نَي ݾُڻايو، تو مِنک ݾجائِي بيمار پرڀُو يسُوع ڪڍي لي آيا۔ 36 او مِنٿ ڪري ڪيوَڻ لاگا ڪہ، ”پرڀُو مھونَي رُگو ٿونرَي گاڀون رَي پلَي نَي ھاٿ لگاوڻ ڏيئو۔“ اِيئي تي جڪَي ڀِي اِيئون ڪيئو، او ݾاجو ھوئي گيو۔