پونچ ھزار مِنکون نَي ٻاٽِي کݪاوڻ
6
پَڇي پرڀُو يسُوع تِبرياس رِي ڊنڍ يعني گليل ڊنڍ رَي پيلوڙَي پاݾَي گيو۔ 2 جڏي مِنکون نَي خبر پڙِي، تو او ٽولون ۾ پرڀُو يسُوع لاري آيا، ڪيونڪہ پرڀُو يسُوع تموم گھڻا پرچا بتاوتو ھانَ مِنک ڏيکتا ڪہ بيمار ڪيڪر ݾاجا ھووَي پڙيا۔ 3 پَڇي پرڀُو يسُوع آپرَي چيلون ڀيڙو ھيڪَي جبل تي چڙھي گيو ھانَ اوٿ جائي ٻيٺو۔ 4 اُوئون ڏِنون ۾ يھُوديون رو فَسح رو پَرٻ نيڙو ھتو۔5 جڏي پرڀُو يسُوع ڏيٺو ڪہ تموم گھڻا مِنک مھَي ڏيݾا آوَي پڙيا، تو اُوئي فِلپس نَي ڪھيو ڪہ، ”آپي اِيئون مِنکون رَي ݾارُو ٻاٽَي ڪيٿ ݾون مول لي آشون؟“ 6 پرڀُو يسُوع فِلپس رو آزمُوتو ليوَڻ رَي ݾارُو ڪھيو ھتو، پڻ اُوئي نَي خبر ھتِي ڪہ مھنَي ڪِي ڪرڻو ھَي۔ 7 فِلپس بݪتِي ڏينِي ڪہ، ”جي مھي جائي ٻي ݾئو چوندِي رَي ݾِڪون رَي ٻاٽَي مول لي آئُون ھانَ ٿوڙَي ٿوڙَي اِيئون نَي کݪائُون، تو ڀِي پُورائو ڪونھي ھووَي۔“ 8 اوٿ پرڀُو يسُوع رو ھيڪ ٻيجو چيلو ھتو جڪو شمعُون پطرس رو ڀائي اندرياس ھتو۔ اُوئي ڪھيو ڪہ، 9 ”ايٿ ھيڪ ڇوڪرو ھَي جڪَي ڪڍي جَئو رَي پونچ ٻاٽَي ھانَ ٻي مڇَي ھَي، پڻ اترَي گھڻَي مِنکون رَي ݾارُو اَي تو ڪئين ڪونھي۔“ 10 پرڀُو يسُوع آپرَي چيلون نَي ڪھيو ڪہ، ”ݾجَي مِنکون نَي ھيٺا ٻيݾاڙو۔“ ڪيونڪہ اوٿ تموم گھڻو گاݾ ھتو اِيئي رَي ڪري ݾجائِي مِنک ٻيݾي رھيا۔ او ٻاݪون ھانَ لُگايون ݾون ٽاݪ اندازن رُگو آڏمي پونچ ھزار ھتا۔ 11 پَڇي پرڀُو يسُوع او پونچ ٻاٽَي لي ايشوَر رو شُڪر ڪري ٻيٺوڙَي مِنکون نَي ڏينَي۔ پَڇي اُوئيج نمُونَي ٻي مڇَي ليئَي ھانَ مِنکون نَي ڏينَي ھانَ ھر ھيڪ نَي اِترو مِليو جِترو کَپتو۔ 12 ݾجون مِنکون ڍئو ڪري ٻاٽِي کاڌِي۔ پَڇي پرڀُو يسُوع آپرَي چيلون نَي ڪھيو ڪہ، ”بچوڙا ٽُڪڙا ڀيڙا ڪرو ڪہ او زِيئون نِي ھووَي۔“ 13 پَڇي مِنکون رو ٻاٽِي کاوڻ ݾون پَڇي چيلون جَئو رَي پونچ ٻاٽيون ݾون بچوڙَي ٽُڪڙون را ٻارھَي ٽوڪرا ڀريا۔ 14 جڏي مِنکون پرڀُو يسُوع رو اَي پرچو ڏيٺو، تو ڪيوَڻ لاگا ڪہ، ”بيشڪ، اَي اوج نبِي ھَي جڪو جگت ۾ آوڻ آݪو ھتو۔“ 15 پرڀُو يسُوع ݾمجھي گيو ڪہ مِنک مھنَي زورِي بادشاھ ٺاشَي، اِيئي رَي ڪري او ھيکلو جبل تي بُوئو گيو۔
پرڀُو يسُوع رو پوڻي تي بيوَڻ
16 جڏي شام ھوئِي، تو پرڀُو يسُوع را چيلا ڊنڍ رَي ڪپ تي گيا۔ 17 انڌارو ھوئي گيو ھتو ھانَ اَڃون توڻي پرڀُو يسُوع اُوئون ڪڍي پاڇو ڪونھي آيو ھتو۔ نيٺ او ٻيڙِي ۾ چڙھي ڊنڍ رَي پيلوڙَي پاݾَي ڪفرنَحُوم شھر ڏيݾا جاوڻ لاگا۔ 18 اوچتو تيز بائيرو کُليو ھانَ ڊنڍ ۾ موٽَي موٽَي ڇولَي ھوئڻ لاگَي۔ 19 اُوئون تموم گھڻِي ڪوشش ݾون ٻيڙِي ھلائي تين چار ميل رِي مُسافرِي ڪِي۔ جڏي اُوئون پرڀُو يسُوع نَي پوڻي تي بيتو ھانَ ٻيڙِي ڪڍي نيڙو آوتو ڏيٺو، تو او ٻيئاجڻ لاگا۔ 20 پڻ پرڀُو يسُوع اُوئون نَي ڪھيو ڪہ، ”ٻيئاجو نِي، ھُون ھون۔“ 21 پَڇي چيلون خُوشِي ݾون پرڀُو يسُوع نَي ٻيڙِي ۾ چاڙھيو ھانَ ٻيڙِي يڪدم اوٿ پُگِي جيٿ اُوئون نَي جاوڻو ھتو۔
22 ٻيجَي ڏِن ݾجائِي مِنک جڪو ڊنڍ رَي اُوئي پاݾَي ھتا، جڏي اُوئون نَي خبر پڙِي ڪہ اوٿ تو رُگو ھيڪ ٻيڙِي ھتِي جڪَي ۾ رُگو چيلا گيا ھتا، پڻ پرڀُو يسُوع اُوئون ڀيڙو ڪونھي گيو ھتو۔ 23 تو تِبرياس شھر ݾون ڪئينڪہ ٻيڙَي اوٿ آئَي، جيٿ پرڀُو يسُوع ٻاٽيون رَي ݾارُو ايشوَر رو شُڪر ڪيئو ھتو ھانَ مِنکون ٻاٽِي کاڌِي ھتِي۔ 24 پَڇي جڏي ݾجَي مِنکون ڏيٺو ڪہ ايٿ نَڪو تو پرڀُو يسُوع ھَي ھانَ نَڪو اُوئي را چيلا، تو او اُوئون ٻيڙيون ۾ چڙھي پرڀُو يسُوع نَي جوئڻ، ڪفرنَحُوم شھر ڏيݾا گيا۔
پرڀُو يسُوع زندگِي رِي ٻاٽِي
25 جڏي مِنکون ڊنڍ رَي پيلوڙَي پاݾَي پرڀُو يسُوع نَي جوئي ليئو، تو اُوئي ݾون پُوڇو ڪہ، ”گُرو جِي، ٿي ايٿ ڪڏي آيا؟“ 26 پرڀُو يسُوع اُوئون نَي بݪتِي ڏينِي ڪہ، ”ھُون ٿونَي ݾاچِي ڪونھ ھون ڪہ ٿي مھنَي اِيئي رَي ڪري ڪونھي جوتا ڪہ ٿون مھارا پرچا ڏيٺا ھَي، پڻ اِيئي رَي ڪري ڪيونڪہ ٿون ٻاٽِي کائي ڍئو ڪيئو ھتو۔ 27 اھڙِي ٻاٽِي رَي ݾارُو محنت نِي ڪرو جڪو خراب ھووَي ھَي، پڻ اُوئي ٻاٽِي رَي ݾارُو جڪو اَمر جيوَن توڻي رَي ھَي ھانَ او ھُون مُنش پُتر ٿونَي ڏئين، ڪيونڪہ ايشوَر پِتا مھارَي ھاٿ ۾ اَي حق ڏينو ھَي۔“ 28 اِيئي تي مِنکون پُوڇو ڪہ، ”مھي ڪھڙو ڪوم ڪرون جڪَي ݾون ايشوَر رِي مرضِي پُورِي ھووَي؟“ 29 پرڀُو يسُوع اُوئون نَي بݪتِي ڏينِي ڪہ، ”ايشوَر رِي مرضِي اَي ھَي ڪہ جڪَي نَي اُوئي ميليو ھَي، ٿي اُوئي تي وِشواس راکو۔“ 30 اُوئون ڪھيو ڪہ، ”ٿي ڪھڙو نِشون بتاشو جڪَي نَي ڏيکي مھي ٿَي تي وِشواس راکون؟ ٿي ڪھڙو ڪوم ڪرشو؟ 31 جڏي مھورا ٻاپ ڏاڏا رڻ پَٽ ۾ ھتا، تو اُوئون من نون رو آڪاشِي ڌون کاڌو۔ جون شاستر ۾ لِکيوڙو ھَي ڪہ،
’اُوئي، اُوئون نَي کاوڻ رَي ݾارُو آڪاشِي ڌون ڏينو ھتو۔‘“
32 پَڇي پرڀُو يسُوع اُوئون نَي ڪھيو ڪہ، ”ھُون ٿونَي ݾاچِي ڪونھ ھون ڪہ مُوسيٰ نا، پڻ ايشوَر ٿونَي او ٻاٽِي آڪاش ݾون ڏينِي ھتِي، پڻ ايشوَر اَڃون توڻي آڪاش ݾون حقيقي ٻاٽِي ڏَي ھَي، 33 ڪيونڪہ ايشوَر رِي ٻاٽِي او ھَي جڪو آڪاش ݾون آوَي ھَي ھانَ او دُنيا رَي مِنکون نَي زندگِي ڏَي ھَي۔“ 34 تو مِنکون پرڀُو يسُوع نَي ڪھيو ڪہ، ”اي پرڀُو، مھونَي اَي ٻاٽِي ھروز ڏيتا رو۔“ 35 پرڀُو يسُوع اُوئون نَي ڪھيو ڪہ، ”زندگِي رِي ٻاٽِي تو ھُون ھون۔ جڪو مھَي ڪڍي آوَي ھانَ مھَي تي وِشواس راکَي ھَي، تو اُوئي نَي نَڪو ڪڏي بُوک لاگَي ھانَ نَڪو ڪڏي تِرݾ لاگَي۔ 36 جون مھَي ٿونَي ڪھيو ھتو ڪہ ٿون مھنَي جويو تو ھَي، پڻ وِشواس ڪونھي راکتا، 37 پڻ پِتا جِترا مِنک مھنَي ڏينا ھَي، او مھَي ڪڍي آشَي ھانَ جڪو ڀِي مھَي ڪڍي آشَي، تو ھُون اُوئي نَي ڪڏي ڀِي پاڇو ڪونھي ميلون، 38 ڪيونڪہ ھُون آڪاش ݾون اِيئي رَي ڪري ڪونھي آيو ڪہ آپرِي مرضِي ڪرون، پڻ اِيئي رَي ڪري آيو ھون ڪہ آپرَي ميلڻ آݪَي رِي مرضِي پُورِي ڪرون۔ 39 مھارَي پِتا رِي مرضِي اَي ھَي ڪہ جِترا ڀِي مِنک اُوئي مھنَي ڏينا ھَي، اُوئون ۾ ھيڪ ڀِي گُمائُون نِي، پڻ جگت رِي پڇاڙِي توڻي اُوئون نَي ڀڙي جيتا ڪرون، 40 ڪيونڪہ مھارَي پِتا رِي مرضِي اَي ھَي ڪہ جڪو ڀِي ڏيڪرَي نَي ڏيکَي ھانَ اُوئي تي وِشواس راکَي، تو اُوئي نَي اَمر جيوَن ملَي ھانَ ھُون اُوئي نَي جگت رِي پڇاڙِي ۾ ڀڙي جيتو ڪرون۔“
41 اَي ݾُڻي يھُودي مِنک اُوئي تي ڪُرڪڻ لاگا، ڪيونڪہ پرڀُو يسُوع ڪھيو ھتو ڪہ، ”او ٻاٽِي ھُون ھون جڪو آڪاش ݾون آوَي ھَي۔“ 42 او ڪيوَڻ لاگا ڪہ، ”ڪِي اَي يُوسف رو ڏيڪرو يسُوع ڪونھي؟ مھي اِيئي رَي ما ٻاپ نَي ڀِي اوݪکون ھون۔ تو پَڇي اَي ڪيئون ڪَي ھَي ڪہ، ’ھُون آڪاش ݾون آيو ھون؟‘“ 43 پرڀُو يسُوع اُوئون نَي ڪھيو ڪہ، ”آپت ۾ ڪُرڪا نِي ڪرو۔ 44 مھَي ڪڍي ڪو ڀِي اُترِي توڻي ڪونھي آئي ݾگھتو، جترِي توڻي پِتا جڪَي مھنَي ميليو ھَي اُوئي نَي مھَي ڪڍي ڇِڪي نِي لي آوَي۔ ھُون اُوئي نَي جگت رِي پڇاڙِي ۾ ڀڙي جيتو ڪرين۔ 45 نبيون رَي شاستر ۾ لِکيوڙو ھَي ڪہ،
’ايشوَر آپرَي ݾجَي مِنکون نَي ݾيکاشَي۔‘
جِترا مِنک پِتا رَي باتون ݾُڻي اُوئون نَي ݾيکشَي، تو او ݾجائِي مھَي ڪڍي آشَي۔ 46 اِيئي رو مطلب اَي ڪونھي ڪہ ڪَي مِنک پِتا نَي ڏيٺو ھَي۔ پڻ جڪو ايشوَر ݾون آيوڙو ھَي رُگو اُوئي پِتا نَي ڏيٺو ھَي۔
47 ھُون ٿونَي ݾاچِي ڪونھ ھون ڪہ جڪو ڀِي وِشواس راکَي ھَي، تو اُوئي نَي اَمر جيوَن مِليو رو۔ 48 زندگِي رِي ٻاٽِي ھُون ھون۔ 49 ٿونرَي ٻاپ ڏاڏون رڻ پَٽ ۾ من نون رو آڪاشِي ڌون کاڌو، تو ڀِي او مري گيا۔ 50 پڻ جڪو ٻاٽِي آڪاش ݾون آئِي، او اھڙِي ھَي، جڪَي نَي کاوڻ ݾون ڪو ڀِي مرَي ڪونھي۔ 51 آڪاش ݾون آيوڙِي ٻاٽِي ھُون ھون، جڪو ڀِي اَي ٻاٽِي کاشَي، تو او ھميشا جيتو ريشَي۔ اَي ٻاٽِي مھارو موݾ ھَي، جڪو ھُون دُنيا رَي مِنکون نَي زندگِي ڏيوَڻ رَي ݾارُو ڏئين۔“ 52 اِيئي بات تي يھُودي آپت ۾ بَحث ڪرڻ لاگا ڪہ، ”اَي مِنک آپون نَي آپرو موݾ کاوڻ رَي ݾارُو ڪيڪر ڏي ݾگھَي ھَي؟“ 53 پرڀُو يسُوع اُوئون نَي ڪھيو ڪہ، ”ھُون ٿونَي ݾاچِي ڪونھ ھون ڪہ جي ٿي مھَي مُنش پُتر رو موݾ ڪونھي کائو ھانَ مھارو لوئِي ڪونھي پيئو، تو ٿون ۾ زندگِي ڪونھي۔ 54 جڪو مھارو موݾ کاوَي ھانَ مھارو لوئِي پيئَي ھَي، تو اَمر جيوَن اُوئي رَي ݾارُو ھَي ھانَ ھُون اُوئي نَي جگت رِي پڇاڙِي ۾ ڀڙي جيتو ڪرين، 55 ڪيونڪہ مھارو موݾ ھانَ مھارو لوئِي حقيقت ۾ کاوڻ ھانَ پيئڻ رِي شئي ھَي۔ 56 جڪو مھارو موݾ کاوَي ھَي ھانَ مھارو لوئِي پيئَي ھَي، تو او مھَي ۾ رَي ھَي ھانَ ھُون اُوئي ۾ رون ھون۔ 57 مھارَي پِتا جڪَي مھنَي ميليو ھَي، او جيتو ھَي ھانَ اُوئي رَي ڪري ھُون ڀِي جيتو ھون۔ اِيئي نمُونَي او ڀِي جيتو ريشَي، جڪو مھنَي اِيئون کاوَي ھَي۔ 58 اَي او ٻاٽِي ھَي جڪو آڪاش ݾون آيوڙِي ھَي۔ اَي ٻاٽِي او ڪونھي جڪو ٿونرَي ٻاپ ڏاڏون کاڌِي ھانَ مري گيا، پڻ جڪو اَي ٻاٽِي کاشَي، تو او ھميشا جيتو ريشَي۔“ 59 پرڀُو يسُوع اَي ݾجَي باتون ڪفرنَحُوم شھر رَي ھيڪَي ڀگتي گھر ۾ ݾيکاوتي ݾُڻائَي۔
اَمر جيوَن رَي باتون
60 پرڀُو يسُوع رَي اَي باتون ݾُڻي اُوئي رَي چيلون ۾ تموم گھڻا آپت ۾ ڪيوَڻ لاگا ڪہ، ”اَي باتون تموم گھڻَي ڏُکئي ھَي، اِيئون تي ڪُڻ بيشَي؟“ 61 پڻ پرڀُو يسُوع ݾمجھي گيو ڪہ چيلا اِيئي بات رَي بارَي ۾ ڪھڙا ڪُرڪا ڪرَي پڙيا۔ اِيئي رَي ڪري اُوئي چيلون نَي ڪھيو ڪہ، ”ڪِي مھارَي باتون ٿونَي ڏُکئي لاگَي ھَي؟ 62 جي ٿي مھَي مُنش پُتر نَي آڪاش تي جاوتو ڏيکشو جيٿ ھُون اَگي ھتو، تو پَڇي ڪِي ھوشَي؟ 63 زندگِي تو پويتر آتما ݾون ملَي ھَي، ݾَرير تو ڪئين ڪونھي۔ جڪو باتون مھَي ٿون ݾون ڪيئَي ھَي، اُوئي ݾون آتما ڀِي ملَي ھَي ھانَ زندگِي ڀِي۔ 64 پڻ ٿون ۾ گھڻا اھڙا ڀِي ھَي جڪو وِشواس ڪونھي راکتا۔“
پرڀُو يسُوع نَي پيل ݾون خبر ھتِي ڪہ او ڪيو ھَي جڪو وِشواس ڪونھي راکتو ھانَ او ڪيو ھَي جڪو مھنَي جھلاشَي۔ 65 پَڇي پرڀُو يسُوع ڪھيو ڪہ، ”اِيئي رَي ڪري مھَي ٿونَي ڪھيو ھتو ڪہ اُوئي ٽيم توڻي ڪو ڀِي مھَي ڪڍي آئي ڪونھي ݾگھَي، جترِي توڻي پِتا اُوئي نَي اِيئون ڪرڻ رِي ھِمت نِي ڏَي۔“
66 اَي بات ݾُڻي پرڀُو يسُوع را تموم گھڻا چيلا اُوئي نَي ڇوڙي بُوئا گيا ھانَ او پاڇا ڪونھي آيا۔ 67 پَڇي پرڀُو يسُوع اُوئون ٻارھون چيلون نَي ڪھيو ڪہ، ”ڪِي ٿي ڀِي مھنَي ڇوڙي جاشو؟“ 68 تو شمعُون پطرس بݪتِي ڏينِي ڪہ، ”اي پرڀُو، مھي ڪيئا جائُون، ڪيونڪہ اَمر جيوَن رَي باتون تو ٿَي ڪڍي ھَي۔ 69 اِيئي رَي ڪري مھون وِشواس راکيو ھَي ھانَ مھونَي خبر پڙِي ھَي ڪہ ٿي ايشوَر را ميليوڙا پويتر ھستِي ھو۔“ 70 پرڀُو يسُوع ڪھيو ڪہ، ”مھَي آپ ٿون ٻارھون نَي چُونڊيا ھَي پڻ ٿون ۾ ھيڪ ھَي جڪو شيطون ھَي۔“ 71 پرڀُو يسُوع اَي بات شمعُون اِسڪريُوتِي رَي ڏيڪرَي يھُودا رَي بارَي ۾ ڪِي ھتِي، ڪيونڪہ ٻارھون چيلون ۾ اوج ھتو جڪو پرڀُو يسُوع نَي جھلاوڻ آݪو ھتو۔