Novia Peti Pojanji
37
I Bezaleel nte roana novia Peti Pojanji lako ri kayu akasia. Kandatena saatu sapulu (110) senti, kapekana bo kalangana simbo onopulu bo ono (66) senti. 2 Riarana bo ri savalikuna nitapiki ante bulava ledo ria galona, bo bivina nilili ante bulava. 3 Pade nipovia aampa ponto dako ri bulava raposuaraka kayu pokova. Nipataka randua ponto ri sulapa sabingga njidi bo randua ri sabingga nggana nu Peti Pojanji haitu. 4 Nipovia muni kayu pokova lako ri kayu akasia, bo nitapiki ante bulava, 5 pade nisuaraka kayu pokova haitu hau riara ponto.6 Pade nipovia potutui Peti lako ri bulava ledo ri galona, kandatena saatu sapulu (110) senti bo pekana onopulu bo ono (66) senti. 7 Nipovia muni randua anu nolenje mpo malaeka sangana kerub lako ri bulava nipempe. 8-9 Malaeka kerub haitu nidika ri bavo potutuina ri tampana ntimali. Randua malaeka kerub haitu nipovia nosintingayosi bo kapina nenggaka nosintomu nombataungo potutui Peti Pojanji. Nipovia nipakasangu nte potutui Peti Pojanji haitu.
Novia meja pomboli roti pesomba
10 I Bezaleel nte roana novia meja lako ri kayu akasia, kandatena valupulu bo valu (88) senti, pekana patapulu bo pata (44) senti, langana onopulu bo ono (66) senti. 11 Meja haitu nitapiki ante bulava ledo ria galona bo bivina nilili ante bulava. 12 Bo nipovia polava meja haitu kalangana pitu senti santanga (7,5). Bivi polava haitu nilili ante bulava. 13-14 Nipoviana bampa ponto dako ri bulava raposuaraka kayu pokova bo nipatakana ri pasuna pata-mpasu ri kada nu meja napara polavana. 15 Kayu pokova haitu nipovia lako ri kayu akasia bo nitapiki ante bulava. 16 Nipoviana muni dula, tubu, boda mbaso, bo jolo rapotoli uve anggur rapesomba. Pura-pura gana nu meja haitu nipovia lako ri bulava ledo ria galona.
Novia kada mpoindo
17 I Bezaleel nte roana novia kada mpoindo nolenje mpo bunga. Nipovia lako ri bulava ledo ria galona. Potandena bo batana nipovia lako ri bulava nipempe. Bunga-bunga poramba, sesena bo pantakana nipakasangu ante potandena bo batana.
18 Ri batana nipovia aono pangana, talu-talu mpanga sabingga. 19 Sampanga-sampanga nipovia poramba eva talu-njese bunga badam ante sesena bo pantakana. 20 Ri batana nipovia pata-njese bunga badam ante sesena bo pantakana. 21 Ri tambe sapasa pangana ntimali, nipataka sangu pantaka nu bunga. 22 Njumangu kada mpoindo ante pantaka-pantakana bo panga-pangana haitu nipovia lako ri sanggoto bulava ledo ria galona anu nipempe. 23 Nipoviara papitu poindo bo nipovia muni supi bo gumba. Anu gahaitu nipovia lako ri bulava ledo ria galona. 24 Nipakera talu pulu bo lima (35) kilo bulava ledo ria galona, novia kada mpoindo bo gana-ganana.
Novia lanta potunju dupa
25 I Bezaleel nte roana novia sangu lanta potunju dupa lako ri kayu akasia. Lanta potunju dupa haitu nosulapa, kandatena bo kapekana simbo patapulu bo alima (45) senti bo langana siopulu (90) senti. Ri pasuna pata-mpasu nipovia mpo tandu nipakasangu ante lanta potunju dupa haitu. 26 Sulapana pata-njulapa, bagia bavona, bo tandu-tanduna nitapiki ante bulava anu ledo ria galona, bo bivina muni nilili bulava. 27 Nipoviara muni ampa ponto raposuaraka kayu pokova. Randua ponto nidika ri sulapa sabingga njidi bo randuapa ri sabingga nggana ri tambe lilina nipovia dako ri bulava. 28 Kayu pokova haitu nipovia lako ri kayu akasia bo nitapiki ante bulava.
Novia lana ada bo dupa
29 I Bezaleel nte roana muni novia lana ada bo dupa vangi nitaniaka ka TUPU. Nipoviana mpo tona anu natau nompasigalo lana navangi soana anu nasuli alina.