Atura posambei karugi
22
“Isema mangangga sangu japi bara bimba bo rasambalena bara rapobaluna, ia kana mombasambei lima angu japi bara pata angu bimba. 2-4 Topangangga kana mosambei anu nipanganggana. Ane ledo maria anuna raposambeina, ia mboto kana rapobalu rapajadi batua mosambei anu nipanganggana. Ane binata nipangangga haitu bara japi, bara keledai, bara bimba, bo rakava da matuvu nte tona haitu, ia kana mombasambei sangu binata, roangu sambeina.Ane rakava konggo topangangga riara banua bongina, bo matepatesi, topompatesina haitu ledo nasala. Tapi ane kajadia haitu majadi eona, tona nepatesi nireke nasala.
5 Isema noevu binatana ri taluana mboto bo rapalambana binatana manjayo bo mangguku tuda-tuda ntona ntanina, tupu nu binata haitu kana mosambei karugi haitu ante asele tobelona lako ri taluana mboto. 6 Isema motinunju ri taluana mboto bo apu haitu mendai hau ri talua ntona ntanina bo mombapapusi gando dopa nisombe bara gando anu dako naupu nisombe bara nitambunaka, topotinunju haitu kana mombasambei karugi.
7 Rapana maria tona momboli mbara-mbara eva doi bara anu noali nte roana. Tapi mbara-mbarana haitu nipangangga ntona lako ri banua nu roana. Ane rakava topanganggana, topangangga haitu kana mombayari ronggani kadeana. 8 Tapi ane topanganggana ledo rakava, roa nipomboli mbara-mbara haitu kana rakeni hau ri ngayo ntopotangara ri banua petupu, bo hamai ia kana mosumpa ia ledo mpuu nangala anu niboli nte ia.
9 Ane maria tona mosisala ka mbara-mbara, bara japi, keledai, bimba, pakea, bara anu ntanina, bo ira simbo mangaku iamo tupuna, ira kana rakeni hau ri ngayo ntopotangara ri banua petupu ala rasani pobotusiKu. Tona nasala ri panggitaKu, kana mombasambei karugi ronggani kadeana ka tona anu nipakarugina.
10 Ane tona momparasayaka roana mompiara keledaina, japina, bimbana bara binatana ntanina, bo binata haitu mamate, malopu, bara rapopalai ntona sampe malipo, bo ledo ria sabina, 11 ia kana mosumpa ri ngayoKu ia ledo nompakadaa binata nipatava ka ia. Ane mpuu-mpuu ledo ia nompakadaana, tupu nu binata haitu mboto kana mombatanggu karugina haitu, bo topompiarana ledo paraluu mombasambei karugi haitu. 12 Tapi ane binata haitu nipangangga ntona ntanina, topompiarana kana mombasambei karugi ka tupu nu binata. 13 Ane binata haitu nisaka nu binata nasese, topompiarana kana mompopakita bukuna majadi tanda ka tupuna, topompiara ledo paraluu mombasambei karugi haitu.
14 Ane tona nompake binata ntona ntanina bo binata haitu malopu bara mamate tempo tupuna ledo naria ri sia, topompake binata haitu kana mosambei karugi haitu. 15 Tapi ane tupuna maria ri sia, topompakena ledo paraluu mombasambei karugi haitu. Ane binata haitu binata nisewa, karugina nitutui nu sewanamo.”
Atura pokainggu eo-eo
16 “Isema mompadidisi ngana randaa anu dopa nikeni ka sambulu bo mosampaturu nte ia, kana mombayari ada poberei bo mompobereina. 17 Tapi ane tuama nu mombine ledo mombadekei langgai haitu moberei nte anana, langgai haitu kana mombayari ada poberei haitu ka tuama nu mombine sakuya kadea ada poberei nu randaa.
20 Isema-sema mombadekei pesomba ka tupu ntanina kana raropusi. Aga Yaku Tupu masipato radekeikamiu pesomba.
21 Nemo mompandasa bara mokainggu matenggo nte topesovo. Toramo, komiu muni topesovo baipia ri tana Mesir.
22 Nemo mompovia anu ledo masipato ka timbala bara ngana pailu. 23 Ane komiu madaa nte ira, Yaku, TUPU mangepe ira mekitulungi nte Yaku. 24 Yaku marau bo mompatesi komiu riara mposieva, sampe bereimiu mboto majadi timbala, bo ana-anamiu mboto majadi ngana pailu.
25 Ane komiu mompopainda doi ka tona napakasi ri tatanga ntodeaKu, nemo mokainggu mpo topesingara inda anu nompopoana doina. 26 Ane raalamiu baju ndoe ntona anu nitagalakana indana nte komiu, baju haitu kana rapopanjilimiu dopame masolo eo, sabana baju haitu bajuna sangu-sanguna nipobuyana bongina. 27 Ane ledo rapopanjili ka tupuna, nuapa vai rapakena maturu? Ane ia merapi tulungi nte Yaku, Kuepe ia sabana naasi mataKu.
28 Nee manjalai Alatala bo nee mombapindasi pakeni-pakeni nu ngatamiu.
29 Ri tempo nipakatantu, dekeimo pesombamiu ka Yaku lako ri asele mpoviamiu. Nee aga rasoro tempona.
Dekeimo anamu langgai lumbua ka Yakub, 30 bo dekei muni ana japi lakina bo ana bimba lakina bo ana ntovau lakina nipoanaka pamulana. Palambamo ana nu binata haitu matuvu nte tinana pitu eo kasaena, pade dekeimo ka Yaku ri eo kauvaluna.
31 Ledo mamala rakandemiu bau binata anu nisaka nu binata nasese. Dekei ka asumo bau haitu. Sabana komiu todea nitaniaka ka Yaku.”