Atura anu masipato rapovia ka batua toIsrael
Ulangan 15:12-18
21
Naliu haitu, nangulimo TUPU ka i Musa, “Dekeimo atura-atura hitu ka toIsrael: 2 Ane komiu mangali batua lako nte komiu simbo toIbrani mboto, batua haitu mokarajaa ono mpae kasaena ka komiu. Mpae kapapituna ia kana rakabasaka bo ia ledo paraluu mombayaria. 3 Ane rapana batua haitu da naloa tempo najadi batuamu bo naupu nipobatua pade noberei, bereina haitu ledo mamala mantuntuni ia tempo rakabasaka. Tapi ane rapana ia nobereimo tempo najadi batuamu, bereina mamala mantuntuni ia tempo rakabasaka. 4 Ane rapana tona nompobatua ia mompopoberei ia ante saito mombine, bo maria anara, berei bo anara haitu bagia ntona nompobatua ia, bo ledo mamala mantuntuni batua haitu tempo ia rakabasaka.5 Tapi ane rapana batua haitu manguli, ia nompotove bereina, ana-anana, bo tona nompobatua ia, bo ledo madota rakabasaka, 6 jadi tona nompobatua ia kana manggeni ia hau ri ngayo ntopotangara ri banua petupu. Hamai batua haitu ratudu metidombo ri vamba bara ri tinja nu vamba, bo tona nompobatua ia kana motosu talinga nu batua haitu, bo ia majadi batuana sampe kasae-saena.
7 Ane saito mombine ntoIbrani nipobalu ntuamana majadi batua bo berei, mombine haitu ledo rakabasaka naupa ono mpae ia nokarajaa, jadi nosinjaa ante batua langgai.b 8 Ane domo masana rara ntona anu nangali mombine haitu rapobereina, mombine haitu mamala rapobalu mpanjili ka totuana. Tapi ia ledo mamala rapobalu ka topesovo apa tona nompobatua ia nireke ledo nompakadupa janji mpobereina. 9 Ane rapana tona mangali batua mombine rapopobereikana anana, batua mombine haitu kana rapoviana eva anana mboto. 10 Ane tona mangali mombine rapobereina, pade tona haitu moberei vai, ia kana batena mombadekei pangande bo pakea bo mosampaturu nte bereina paratama. 11 Ane anu talu ngaya haitu ledo rapoviana, ia kana mombakabasaka mombine nialina haitu bo mombine haitu ledo mombayari.”
Atura ka tona anu nompakadaa tona ntanina
12 TUPU nompapola tesaNa ka i Musa ivei: “Isema mombaboba tona ntanina sampe mamate, ia kana rahuku mate. 13 Ane ledo nitunggaina mepatesi, tapi aga dotaKu tona haitu mamate, topeboba mamala malai hau metalendu ri ngata Kupakatantu ka komiu ngena.c 14 Tapi ane tona nonia bo nitunggaina mompatesi tona ntanina, nau ia malai metalendu ri lanta pesomba ka Yaku, ia kana raala lako ri lanta pesomba haitu bo rahuku mate.
15 Isema mombaboba tinana bara tuamana, ia kana rahuku mate. 16 Isema mompangae tona, kana rahuku mate, nau tona nipangaena haitu nipobalunamo bara da naria ri banuana.
17 Isema nombapindasi tinana bara tuamana, ia kana rahuku mate.
18 Ane riara mposibaga, saito tona mombarutu tona ntanina ante vatu bara mombajaguru ia, tapi ledo sampe mamate, ia ledo rahuku mate. Ane tona haitu madua sampe rapaturusina, 19 bo naliu haitu da namalapa ia nolipa, naupa aga notoko, tona nombaduasi ia haitu kana mombajagaina sampe mabelo bo mombasambei karugi savesia kasaena ia nadua.
20 Isema mombaboba batuana langgai bara mombine, sampe batua haitu kaliu-liu mamate, kana rahuku. 21 Tapi ane batua haitu da matuvupa saeo roeo pade mamate, [batuana, ledo nitunggai nipatesi,] tona nompobatua batua haitu ledo rahuku. Karugia nikavana sabana nalipomo pokarajaa nu batuana, haitumo majadi pehuku ka ia.
22 Rapana randua langgai nosibaga, bo ri posibagara haitu, maria saito mombarumpa mombine da natiana sampe nalali.d Ane mombine haitu ledo madua ntamo, tona nombarumpa ia haitu kana mombayari sompona nau sakuya kadeana raperapi nu bereina, nangoseaka pobotusi ntopotangara sabana kamate ngana nikalalikana. 23 Tapi ane mantamo ntoto dua nu mombine haitu, pehuku ka tona nombarumpa ia haitu iamo; nyawa sambei nyawa, 24 mata sambei mata, ngisi sambei ngisi, pale sambei pale, kada sambei kada, 25 baka sambei baka, baka papu sambei baka papu, bangga sambei bangga.
26 Isema mombaboba mata nu batuana, sampe maburo, ia kana mombakabasaka batuana haitu. Pokabasaka haitumo majadi pombayari matana. 27 Ane tona mombaboba batuana sampe makoto ngisina, batua haitu kana rakabasakana. Pokabasaka haitu muni majadi pombayari ngisina.”
Atura ka topompatuvu binata
28 TUPU nompapola tesaNa: “Ane japi lakina, mombasanggu tona sampe mamate, japi haitu kana rarempe vatu sampe mamate, bo bauna ledo mamala rakande, tapi tupu nu japi ledo rahuku. 29 Ane japi lakina haitu nabiasamo nesanggu, bo nipopatoramo ka tupuna, tapi ledo nijagaina binatana haitu, bo ane japi haitu mombasanggu tona sampe mamate, japi haitu kana rarempe vatu sampe mamate, bo tupuna muni kana rahuku mate. 30 Tapi ane tupu nu japi haitu rapaloga mombatoloki nyawa ntona anu nisanggu nu japina, ia kana mombayari sakuya kadeana anu nipakatantu raposambei nyawa ntona nisanggu nu japina. 31 Ane japi haitu mombasanggu ngana langgai bara ngana mombine sampe mamate, atura haitu muni rapake. 32 Ane batua langgai bara batua mombine mamate nisanggu nu japi, tupu japi haitu kana mombayari talu pulu mpeka doi salaka ka tupu batua haitu, bo japi haitu kana rarempe vatu sampe mamate.
33 Ane tona mounggaraka potalodu buvu, bara mokae buvu ledo rataloduna, bo maria japi bara keledai manavu riarana [bo mamate], 34 tupu nu buvu haitu kana mombayari posambei karugi ka tupu binata haitu, tapi tupu nu buvu haitu mamala mangala binata namate haitu ka ia mboto. 35 Ane japi ntona mompatesi japi ntona ntanina, ira mompobalu japi anu da natuvu haitu bo doina rapobagira. Japi namate haitu rabagira muni. 36 Tapi ane nisanimo japi haitu nabiasamo nesanggu, tapi ledo nijagai ntupuna, tupu japi haitu kana mombasambei japi namate ante japi da natuvu, bo japi namate haitu ka iamo.”