Sapulu parenta
Ulangan 5:1-21
20
Pade notesamo Alatala, ivei: 2 “Yakumo TUPU, Alatala nisombamiu, anu nanggeni komiu nesuvu lako ri tana Mesir, ponturomiu tempo nipobatua.3 Nee mombasomba tupu ntanina, aga Yakumo rasomba.
4 Nee movia tau-tau molenje mpo nuapa-nuapa anu naria ri langi, ri tana, bara riara nu uve. 5 Nee mombasomba tau-tau eva haitu, sabana Yakumo TUPU, Alatala rasombamiu, bo ledo nipokonoKu rapasimbayuka ante nuapa-nuapa. Isema-sema nompovuu mata Yaku bo nesapuaka, Kuhuku sampe ri mulina katatalu-ntapina bara kapata-ntapina. 6 Tapi isema-sema nompotove bo nangoseaka parentaKu, Kupotove bo Kupovia belo ka ia bo muli nu mulina.a
7 Nee manguli sangaKu ante patuju ledo mabelo, sabana Yaku TUPU, Alatala nisombamiu, bo Yaku mombahuku isema-sema nanguli sangaKu ante patuju ledo mabelo.
8 Tora bo bilamo eo penonto, sabana eo haitu nitaniaka ka Yaku. 9 Ono eo nidekeiKu loga mokarajaa, 10 tapi eo kapapituna eo penonto nitaniaka ka Yaku, TUPU, Alatala nisombamiu. Ri eo haitu ledo ria saitoa mamala mokarajaa: komiu, bara anamiu, batua-batuamiu, binatamiu bara topesovo nonturo ri ngatamiu. 11 Ono eo kasaena, Yaku, TUPU nompajadi tana, langi, tasi bo mpengaya isina, tapi ri eo kapapituna nenontomo Yaku. Haitumo sabana Yaku, TUPU, nompakaoge eo penonto bo notaniaka eo haitu ka Yaku mboto.
12 Bilamo tina-tuamamiu, ala masana katuvumiu bo mandoe umurumiu ri ngata Kudekei ka komiu.
13 Nee mepatesi.
14 Nee mobualo.
15 Nee mangangga.
16 Nee mosabi dava.
17 Nee mario mata manggita anu ntona ntanina: banuana, bereina, batua-batuana, binatana, keledaina, bara nuapa-nuapa naria nte ia.”
ToIsrael naeka nompeinta kakava nTUPU
Ulangan 5:22-33
18 Tempo toIsrael nangepe guru bo moni ntabue, nikitara muni kila bo bulu nounu, noletemo ira bo neangga nggavao. 19 Nangulimo ira ka i Musa, “Kamba ikomo motesa ka kami, ratalingai kami. Tapi nee Alatala motesa ka kami, mamate ngena kami.”
20 Nesana i Musa, “Nee maeka. Alatala nakava mompopakita kuasaNa mombauji komiu, bo ala komiu meose nte Ia bo domo movia dosa.” 21 Tapi todea gahaitu, batena neangga nggavao, aga i Musa nanggaparai kulimu nalanda ri bulu nikakava nu Alatala.
Atura pesomba
22 TUPU nantudu i Musa manguli ka toIsrael, “Nipeintamiumo berimbana Yaku, TUPU, notesa lako ri langi ka komiu. 23 Jadi, nee rapoviamiu tupu-tupu ntanina rasombamiu nosinggani-nggani ante Yaku. Nee rapoviamiu tau-tau lako ri salaka bara lako ri bulava ka komiu bo rasombamiu.
24 Poviamo sangu lanta pesomba lako ri tana ka Yaku, pade dikamo bimba bo japimiu majadi pesomba rapalabu bo pesomba posinggabelob. Ri ponturo-ponturo Kupakatantu ka komiu mombasomba Yaku, Yaku makava mombadekei rasi bo belo ka komiu. 25 Ane komiu mompovia lanta pesomba lako ri vatu ka Yaku, nee rapovia lako ri vatu nipaa, apa ane komiu mompake paa mombabingga vatu, lanta pesomba haitu domo mamala rapake ka Yaku. 26 Nee malanga gaga lanta pesomba sampe kana rapene ante tangga, ala nee rapeinta bagia karomiu anu ledo masipato rakita.”