ToIsrael ri Bulu Sinai
19
1-2 Naliu haitu, nalaimo toIsrael lako ri Rafidim, bo ri tanggala sangu ri bula katataluna naupu ira nompalaisi tana Mesir, nakavamo ira ri karava bai Sinai. Ira notenda ri kente bulu Sinai, 3 bo i Musa nendake bulu haitu mosinggavaka Alatala.TUPU notesa ka i Musa ri bulu haitu bo nombatudu ia mompatolele ka toIsrael, muli i Yakub ivei, 4 “Nikitamiumo anu nipoviaKu ka toMesir, bo berimbana Yaku nanggeni komiu tumai nte Yaku ri sii ante kuasa nambaso. Ivesiamo Yaku nombajagai komiu, mpo tonji rajawali nanggeni anana ri bavo nggapina. 5 Hitupa ane komiu mompariara tesaKu bo matutu mangoseaka parentaKu, komiu Kupajadi todea nipelisiKu. Njumangu isi dunia Yaku tupuna, tapi komiu majadi todea nipotoveKu. 6 Komiu Kutaniaka ka Yaku mboto, bo komiu sangata majadi topanggeni pesomba ka Yaku.” [Haitu puramo tesa rauli i Musa ka toIsrael.]
7 Jadi notuamo i Musa lako ri bulu haitu, bo nompokio pakeni-pakeni ntoIsrael, pade niulina ka ira pura-pura anu niparenta nTUPU ka ia. 8-9 Ira nesana singgani-nggani, “Kami madota movia pura-pura anu niuli nTUPU,” bo pesanara haitu niuli i Musa ka TUPU.
Pade nangulimo TUPU ka i Musa, “Yaku makava nte iko riara kulimu kumba. Todea mangepe Yaku motesa ka iko, bo mompamula tempo haitu ira kana momparasaya iko.
10 Jadi hitupa koimo posinggavakamo ira, bo tudumo ira, eo hitu bo maile ira mompasadia karora hau metupu. Ira kana motoposi pakeara. 11 Maipua ira kana masadiamo sabana Yaku manau ri bulu Sinai, bo ri sia pura-pura tona mamala manggita Yaku. 12 Poviamo vate ri ntiku-ntiku bulu hitu majadi tanda ledo mamala raliunaka ntodea. Isema-sema mombaliunakana, ia rahuku mate. 13 Tona nombaliunaka vate haitu ledo mamala rakangisi, ia aga rarempe vatu bara rapana. Nau manusia bara binata, pura-pura topoliunaka vate haitu kana rahuku mate. Tapi ane raepemo oni ntabue mandoe, pade mamalamo todea mantende hau ri bulu.”
14-15 Naliu haitu notuamo i Musa nombatudu toIsrael masadia-diamo metupu. Niulina, “Maipua komiu kana masadia, bo hitupa komiu ledo mamala mosampaturu nte bereimiu.” Jadi nasadia-diamo todea gahaitu bo nitoposiramo pakeara.
16 Mpadondona ri eo katataluna, nakila bo naguru kede. Kulimu kumba nombatutui bavo bulu bo niepemo moni ntabue namangga mpuu. Pura-pura tona ri potendana naeka bo nolete. 17 I Musa nanggeni ira hau mosinggava nte Alatala, bo ira neangga ri kente Bulu Sinai. 18 Njumangu bavo nu bulu haitu nibungusi unu nu apu, sabana TUPU nanau ri bavona riara apu. Unu haitu nompasiromu eva unu mpotinunju, bo njumangu bulu nogoya naroo. 19 Moni ntabue nantambai kamanggana. I Musa notesa bo Alatala nesana ante suara eva guru kede.
20 TUPU nanau ri bavo Bulu Sinai, bo nombaronde i Musa makava ri bavo bulu haitu. Pade nantendemo i Musa. 21 TUPU nanguli ka ia, “Koimo potua bo popatora ka toIsrael ira ledo mamala mombaliunaka vate mompeinta Yaku. Ane raliunakara, madea ira mamate. 22 Nau topanggeni pesomba madota manggaparai Yaku, kana rapakagasara ntani karora mboto; ane ledo, ira muni kana Kuhuku.”
23 Nangulimo i Musa ka TUPU, “Tona gahaitu ledo mamala mantende tumai, apa Komiu mbotomo nanguli ka kami, bulu hitu nagasa sabana Komiu naria ri sii, bo vate ntiku-ntiku ri bulu hitu ledo mamala raliunaka kami.”
24 TUPU nesana, “Potuamo, bo tumai vai mosinggani ante i Harun. Tapi topanggeni pesomba bo todea ledo mamala mombaliunaka vate, makava tumai nte Yaku. Ane raliunakara, Kuhuku ira.”
25 Naliu haitu, notuamo i Musa mosinggavaka todea haitu bo niulinamo petevai nTUPU ka ira.