Yosua
Alatala nantudu i Yosua mangago Tana Kanaan
1
Namatepa i Musa, batua nTUPU, notesamo TUPU ka i Yosua ana i Nun, timali i Musa. 2 Nanguli Ia, “BatuaKu i Musa namatemo. Jadi hitupa pura-pura komiu todea Israel masadiamo mevote binangga Yordan, bo mesua ri ngata Kudekei ka komiu. 3 Njumangu ngata rakalaumiu Kudekei ka komiu, evamo nijanjiKu ka i Musa. 4 Ngata raponturomiu mompamula dako ri karava bai bagia puluna makava ri bulu Libanon bagia tasina bo lako ri binangga mbaso Efrat ri bagia mpandakena, mapola ri njumangu ngata ntoHet makava ri Tasi Tatanga bagia mpanauna. 5 Yosua! Mompamula eo hitu, savesia kasaena iko matuvu, ledo maria saitoa mompakule mombadagi iko. Yaku nomporoa i Musa nggaulu, ivesia muni Yaku momporoa iko. Yaku ledo mompalamba bo mompalaisi iko.6 Pakaroo bo pakaroso raramu, sabana ikomo manggeniaka todea hitu monturoka tana anu radekeika totuamiu nggaulu. Tana haitu nijanjiKu ka ira ante sumpa. 7 Aga pakaroo bo pakaroso mpuu raramu. Iko kana mangoseaka njuu pura-pura atura anu nidekei nu batuaKu i Musa ka iko. Nee ntoto muliunaka nau sangaya, ala nau da hau riumba mukalau kana moasele ri mpengaya-ngaya anu mupovia. 8 Buku atura haitu masaro mubaca ka todeaKu. Tora bo pekirikamo isi buku haitu eo-bongi, ala masaro mukainggunaka pura-pura anu nitulisi riarana. Ane mukainggunaka pura-pura haitu, katuvumu masana bo moasele. 9 Toramo! Apa niuliKumo ka iko, iko mpuu-mpuu kana mompakaroo bo mompakaroso raramu! Nee maeka bo makini raramu, Yaku TUPU Alatala nisombamu, momporoa iko nau ri umba mukalau.”
10 I Yosua nombadekei parenta ka pakeni-pakeni ntoIsrael 11 mompesayo njumangu potenda ntodea Israel bo mombadekei parenta ivei: “Pasadia bakumiu. Apa talu-eopa kita kana mombavote binangga Yordan hau monturo ri ngata nidekei nTUPU Alatala ka kita.”
12 I Yosua nanguli ka valaa i Ruben, valaa i Gad bo sabagia valaa i Manasye ivei, 13 “Toramo anu nipetevaika i Musa batua nTUPU ka komiu ivei: ‘TUPU Alatala nombadekei ngata sabingga mpandake binangga Yordan hitu ka komiu. 14 Pura-pura bereimiu ante ana-anamiu bo binata patuvuamiu mamala raboli ri ngata sambote binangga Yordan hitu, anu nidekei i Musa ka komiu. Tapi komiu anu naroso bo nabia, kana hau mombavote binangga Yordan momporoa sampesuvu-sampesuvumiu ntanina hau mosieva. 15 Komiu kana mombatulungi ira ala mamala ira monturo ri ngata sabingga mpanau binangga Yordan, anu nidekei nTUPU Alatala ka ira. Radekeipa nTUPU katinonto ka sampesuvu-sampesuvumiu pade mamala komiu manjili tumai ri ngatamiu mboto ri sabingga mpandake binangga Yordan, anu nidekei i Musa batua nTUPU haitu ka komiu.’ ”
16 Bo valaa i Ruben, valaa i Gad bo sabagia valaa i Manasye nesana ka i Yosua, “Pura-pura anu niparentamu ka kami, raoseaka kami pura. Nau damo mutudu hau ri umba kami, hau kami. 17 Evamo kami nangoseaka parenta i Musa ivesia muni kami mangoseaka parentamu. Damo TUPU Alatala momporoa iko evamo Ia nomporoa i Musa. 18 Isema-sema mombasapuaka parentamu bo ledo raepena tesamu, ia kana rahuku mate. Pakaroo bo pakarosomo raramu.”