Pesuvu
ToIsrael nipandasa ri tana Mesir
1
I Yakub anu nosanga muni i Israel, nosinggani-nggani ante ana-anana, mania-maniana bo tupu-tupuna hau ri tana Mesir. Ana-ana i Yakub haitumo: 2 i Ruben, i Simeon, i Lewi, 3 i Yehuda, i Isakhar, i Zebulon, i Benyamin, 4 i Dan, i Naftali, i Gad, bo i Asyer. 5 I Yusuf nokolu mamimo hau ri Mesir. Pura-pura muli i Yakub pitupulu kadeana.6 Bara sakuya kasaena naliu haitu, i Yusuf bo sampesuvu-sampesuvuna namatemo, ivesia muni tona nasintou nte ira. 7 Tapi mulira, haitumo toIsrael, nomuli nadea ntoto, bo kadeara nasalisa ntoto nantambai, sampe nadea mpuu ira ri ngata haitu.
8 Nasaepa kaliuna kamate i Yusuf, naria vai saito magau nabaru noparenta ri tana Mesir. Magau haitu ledo nisanina i Yusuf. 9 Ia nanguli ka todeana, “ToIsrael haitu nadea gagamo bo narosopa pade kita. 10 Ane rapana maria posieva, toIsrael bara mosimporoa nte balita mangeva kita, bo rapalaikaramo ngata hitu. Jadi kita kana mangelo dala ala domo mantambai kadeara.”
11 Jadi toMesir nompelisi bara sakondua tona majadi topoparenta toIsrael bo mompakakaja katuvura ante pokarajaa ntamo. Ira nipakasa mokarajaa mombabangu kota Pitom bo Raamses rapomboli gana. 12 Tapi nggosena nipandasara aga nantambai kadea ntoIsrael, bo tana niponturora nantambai kaluona, sampe toMesir naeka nte ira. 13 Nasoa mpuu ira nompandasa toIsrael, 14 bo nompakakaja katuvura. Ledo naasi matara nompakasa toIsrael nokarajaa ntamo notepe tana pulu rapovia batu bata bo mpengaya-ngaya pokarajaa ri talua.
15 Naliu haitu, magau Mesir nombadekei parenta ka i Sifra bo i Pua, haitumo randua mombine nombatulungi mombine ntoIbrani noana. 16 Nangulimo magau, “Tempo komiu mombatulungi mombine ntoIbrani moana, toramo hitu: ane ngana langgai mesuvu, patesimo ia! Ane ngana mombine mesuvu, dekeikamo ia matuvu.” 17 Tapi mombine randua haitu naeka nte Alatala. Ira ledo nadota nombaturusi parenta magau bo nipalambara pura-pura ngana langgai natuvu. 18 Jadi magau nompokio mombine randua haitu bo nipekutanana, “Nakuya nipalambakamiu ngana langgai natuvu?”
19 Nesana ira, “Mombine ntoIbrani ledo eva mombine ntoMesir. Mombine ntoIbrani naroso ledo nakaja noana. Dopame nakava topetulungi, nesuvumo anara.” 20-21 Jadi Alatala nombadekei rasi ka mombine randua haitu bo nombadekei muli ka ira, sabana ira nombabila Alatala. Bo toIsrael muni nantambai kadeana bo karosona.
22 Jadipa magau nombadekei parenta ka todeana pura-pura, ivei: “Pura-pura ngana langgai ntoIbrani anu dako nipoanaka kana ratedaka riara binangga Nil, tapi pura-pura anara mombine dekeikamo matuvu.”