Pompoanaka i Musa
2
Tempo haitu saito langgai lako ri valaa i Lewi, noberei ante mombine lako ri valaa i Lewi muni. 2 Mombine haitu noana saito ngana langgai, haitumo anana katataluna. Nikitana anana haitu nagaya mpuu, nitabuniakanamo talu mbula kasaena. 3 Tapi ngana haitu domo namala ratabuniakana pakasae. Jadipa tina nu ngana haitu nangala sangu karanji nipovia dako ri siroyo, bo nilapisina ante aspal bo pulu kayu ala ledo mamala rapesua nu uve. Ngana haitu nidulina riara karanji, pade nikenina hau ri binangga Nil bo nidikana ri tatanga siroyo ri tinggi binangga haitu. 4 Tuakana mombine neangga nakavao sakide lako nte ngana haitu, ia mompeintaka nuapa majadi ngena ante tueina.5 Napanga sakide, nakavamo ana mombine nu magau mandiu ri binangga bo batua-batuana mombine niporoana nolipa-lipa ri tinggi binangga. Sampesanika nikita nu ana magaumo karanji haitu ri tatanga siroyo, jadi nitudunamo saito batuana mangalana. 6 Tempo ana magau nombabuka karanji haitu, nikitana naria ngana kodi riarana, bo ngana haitu notumangi. Ana magau naasi matana nanggita ngana haitu bo nanguli, “[Hama! Napakasi mpuu ngana hitu!] Tantu mami hitu ana ntoIbrani.”
7 Pade nakavamo tuaka ngana haitu nompekutana ana magau, “Madota komiu kueloka saito totua mombine ntoIbrani mompatomi ngana haitu?”
8 Nesana ana magau, “Iyo, koi elomo.” Jadipa haumo tuaka nu ngana haitu mompokio tinana mboto. 9 [Nakavapa tina nu ngana haitu,] nanguli ana magau ka ia, “Ina, kenimo ngana hitu, bo patomi ka yaku; damo kudekei tambo ka komiu.” Jadi nikeninamo ngana haitu bo nipatomina. 10 Nambasopa ngana haitu, nidekei ntinanamo ka ana nu magau. Pade nipajadi nu ana magaumo ngana haitu majadi ana pailuna. Niulina, “Ia kupoposanga i Musa apa ia nisoreakaku lako ri uve.”a
I Musa nalai hau ri tana Midian
11 Naria saeo tempo i Musa nakabilasa rosomo, ia hau nosinggavaka sampesuvuna sangata. Ia nompeinta berimbana ira sangata nipakasa nokarajaa ntamo. Nikitana saito toMesir nombaboba saito toIbrani. 12 I Musa nengali-ngali, nipeintana ledoria tona ntanina ri sia, jadi nipatesinamo toMesir bo mboana nitaivuna bone ala ledo rasani ntona. 13 Kamailena hau vai i Musa, nikitana randua toIbrani ranja mposibaga. Jadi nipekutana i Musamo tona nasala haitu, “Nakuya nibagamuka roamu?”
14 Nesana tona haitu, “Isema nantuu iko majadi pakeni bo topotangara kami? Mupatesi muni yaku eva toMesir nipatesimu riavi?” Nangepe haitu, naekamo i Musa bo nompekiri, “Hama! Nisani ntonamo poviaku!”
15-16 Niepepa magau kajadia haitu, [naraumo ia bo] madota mombapatesi i Musa, tapi i Musa nalai bo naroo ri tana Midian.
Nakavapa hamai, nonturomo i Musa napara buvu. Ri ngata haitu naria saito topanggeni pesomba [nosanga i Yitro]. Ia noana papitu ngana mombine. Tempo i Musa nonturo napara buvu, nakavamo papitu ana i Yitro manambu uve bo mangisi uve ri panginu bimba bo tovau ntuamara. 17 Nakava bara sakondua topoevu ntanina bo nipopalaira ngana randaa gahaitu. Tapi haumo i Musa nombasaliku ngana mombine bo nompainu binatara.
18 Tempo ira nanjili ri banuara, nekutanamo tuamarab, “Nakuya komiu nasalisa nanjili eo hitu?”
19 Nesana ira, “Naria saito toMesir nombasaliku kami nibato ntopoevu ntanina. Nitambuna uve ka kami, bo nipainuna binatata.”
20 Nipekutana i Yitromo anana, “Riumba ia hitu-hitu? Nakuya nipalaisikamiu ia? Koimo pokio ia tumai mangande singgani nte kita.” [Bo niturusiramo parenta ntuamara mangulika i Musa.]
21 [Niulikaramo i Musa monturo nte ira bo] nadotamo i Musa. Naupu sia, i Yitro nompopoberei anana i Zipora nte i Musa. 22 I Zipora noana saito ngana langgai. I Musa nompoposanga ngana haitu i Gersomc, sabana niulina, “Yaku aga topesovo ri sii.”
23 Nompae-mpaepa naliu, namatemo magau ri Mesir. Tapi toIsrael da nongau sabana ira nipobatua, sampe ira nekakai nerapi tulungi nte Alatala. 24 Pekakaira bo pongaura haitu niepe nu Alatala, bo ledo nalinga raraNa nte pojanjiNa ka i Abraham, i Ishak bo i Yakub. 25 NipeintaNa toIsrael nipobatua, jadi nibotusiNamo mombatulungi ira.