Alatala nantudu i Musa manggeniaka toIsrael mesuvu lako ri tana Mesir
3
Tempo haitu i Musa noevu bimba bo tovau nu matuana i Yitro. I Yitro haitu topanggeni pesomba ri tana Midian. I Musa nangiri binata hau ri sambote karava bai, sampe nakava ri bulu Sinaia, bulu nu Alatala. 2 Ri sia Malaeka nTUPU nompakita ka i Musa riara vaya nu apu ri sarimpu kayu nggarui. I Musa nompeinta kayu haitu navaya, tapi ledo napapu. 3 Nokumaa ia bo nanguli, “Nakuya kayu haitu ledo napapu? Mabelopa kupeinta nggapara.”4 TUPU nompeinta i Musa mombakaparai kayu navaya haitu, jadi Ia nombaronde i Musa lako ri kayu navaya haitu, “Musa! Musa!”
Nesana i Musa, “Sii yaku.”
5 Pade Alatala nanguli, “Nee mapara tumai. Vonju solopumu, sabana tana nipeanggamu tutu, tana nagasa [sabana Yaku naria ri sia]. 6 Yakumo Alatala nisomba ntotuamu i Abraham, i Ishak bo i Yakub.” Jadi niramu i Musamo lenjena, sabana naeka ia mompeinta Alatala.
7 Pade notesamo TUPU ka i Musa, “NipeintaKumo kandasa ntodeaKu ri Mesir, bo niepeKumo ira nekakai nerapi tulungi rakabasaka lako nte tona nompandasa ira. NiparantaiKuka mpuumo kasusara. 8 Sabana haitu, nakavamo Yaku mombakasaka ira lako ri kuasa ntoMesir bo manggeni ira mesuvu lako ri ngata haitu hau ri ngata naluo bo nabelo. Tana haitu nakalumana bo naboya, bo hitupa niponturo ntoKanaan, toHet, toAmori, toFeris, toHewi bo toYebus. 9 NiepeKumo pekakai ntoIsrael, bo nipeintaKu munimo berimbana ira nipandasa ntoMesir. 10 Jadi hitupa iko Kutudu mantingayo magau Mesir ala iko mamala manggeniaka todeaKu mesuvu lako ri ngata haitu.”
11 Tapi i Musa nanguli ka Alatala, “Isema yaku, sampe kupakule mantingayo magau bo manggeniaka toIsrael mesuvu lako ri tana Mesir?”
12 Alatala nanguli, “Yaku momporoa bo mombatulungi iko. Hitumo tandana Yaku nombatudu iko: ane mukenimo todeaKu lako ri Mesir, komiu mombasomba Yaku ri bulu hitu.”
13 Nesana i Musa, “Tapi ane yaku mosinggavaka toIsrael bo manguli ka ira, Komiu Alatala anu nisomba ntotuara, nombatudu yaku manggeniaka ira, tantu rapekutanara isema sangaMiu? Jadi nuapa kupesanaka ira?”
14 Nesana Alatala, “SangaKu ‘YAKU NARIA’b. Ane iko hau nte toIsrael, ulika ira sangaKu ‘YAKU NARIA’, bo ulika ira Yakumo nombatudu iko hau nte ira. 15 Yakumo TUPU, Alatala nisomba ntotuamiu i Abraham, i Ishak bo i Yakub. Yakumo nombatudu iko manggeni ira. SangaKu ‘YAKU NARIA’. Haitumo sangaKu sampe ri kasae-saena. Sanga haitumo rakasangai ntona sampe ri muli nu mulina.
16 Koimo bo pasiromu puramo pakeni ntoIsrael. Ulimo ka ira Yakumo TUPU, Alatala nisomba ntotuara i Abraham, i Ishak bo i Yakub, bo Yakumo nompakita ka iko. Ulimo ka ira niparantaiKukamo ira nipandasa ntoMesir. 17 Bo nipakatantuKumo manggeni ira mesuvu lako ri tana Mesir, lako ri ponturora nipandasa, bo manggeni ira hau ri ngata nakalumana bo naboya, ngata ntoKanaan, toHet, toAmori, toFeris, toHewi bo toYebus.
18 Pakeni-pakeni ntoIsrael mangepe tesamu. Maliu haitu, iko ante pakeni-pakeni haitu hau mantingayo magau Mesir bo manguli ka ia ivei: ‘TUPU, Alatala anu nisomba kami toIbrani, nakava nte kami [bo nombatudu kami manggeni pesomba ka Ia.] Jadi dekeimo kami hau ri karava bai nitasere talu eo kasaena ri dala manggeni pesomba kami ka Ia.’ ”
19 Pade nanguli vai TUPU, “NisaniKu magau Mesir ledo mombadekei komiu malai ane ledo Kubarusu ia. 20 Jadi Yaku mompake kakuasaKu, bo mombahuku toMesir ante mombadekei silaka-silaka nadaa ka ira. Maliu haitu radekeinamo komiu malai.
21 Yaku mompakaluu rara ntoMesir nte komiu, sampe tempo komiu malai, komiu ledo malai nte pale boa. 22 Mombine-mombine ntoIsrael kana merapi pakea, salaka poramba bo bulava lako nte toMesir ri sinjorira bara lako nte mombine Mesir anu nosambanua nte ira. Popakekamo anu haitu ka ana-anamiu. Ane rapoviamiu ivehaitu, komiu manggeni mpalai kakalumana ntoMesir.”