Alatala nombadekei kuasa ka i Musa movia kabaraka
4
Pade nesanamo i Musa ka TUPU, “Tapi berimba ane toIsrael ledo momparasaya bo ledo madota mangoseaka tesaku? Ane ledo rapasayara yaku bo aga raulira Komiu ledo nakava nte yaku, nuapa kupovia?”2 TUPU nompekutana i Musa, “Nuapa tutu ri palemu?”
Nesana i Musa, “Kayu nipotoko.”
3 TUPU nombatudu i Musa, “Tendeaka toko tutu ri tana.”
I Musa nombatendeaka toko haitu ri tana, toko haitu nombali najadi ule bo nalaimo i Musa nanggavaosina. Nangulimo TUPU ka i Musa, 4 “Kaparaimo ule tutu, bo sakamo lelona.” I Musa nombakaparai ule haitu bo nisakana. Bo ule haitu najadi toko mpanjili ri palena. 5 Nangulimo TUPU, “Poviamo tutu ri ngayo ntoIsrael ala rasanira Yakumo TUPU, Alatala nisomba ntotuara i Abraham, i Ishak bo i Yakub, Yakumo anu nakava nte iko.”
6 Nanguli vai TUPU ka i Musa, “Suaraka palemu riara bajumu.” Nisuaraka i Musa mpuumo palena hau riara bajuna. Tempo niosurakana palena, nikitana palena nabulamo nambela dua oge.
7 Pade nanguli TUPU, “Suaraka mpanjili palemu riara bajumu.” Nisuaraka i Musa vai palena, bo tempo nisuvurakana mpanjili, palena haitu nabelomo.
8 Nangulimo TUPU, “Ane ledo raparasayara iko, naupa nikitaramo tanda nabaraka pamulana, tantu ane rakitara tanda nabaraka karanduana hitu raparasayaramo. 9 Ane dopa muni madota ira momparasaya iko, naupa nikitaramo randua kabaraka hitu, bo ledo raoseakara tesamu, ala sakide uve lako ri binangga Nil bo toli ri tana. Uve haitu mabali majadi raa.”
10 Tapi nanguli i Musa, “Pue, yaku ledo tona natau notesa, lako baipiame sampe Komiu notesa ka yaku hitu-hitu. Nantamo dilaku, naente tesaku, bo ledo mpo tona natau notesa.”
11 Nanguli TUPU ka ia, “Isema nombadekei sumba ka manusia? Isema nompovia tona nabobo bara nabongo? Isema nompopekita tona bara nompakaburo ia? Natantumo Yaku, TUPU. 12 Koimo, Yaku mombatulungi iko motesa bo mompatuduki nuapa muuli.”
13 Tapi nesana i Musa, “Pue, tudumo tona ntanina.”
14 Jadipa naraumo TUPU ka i Musa bo nanguli, “Nuapa tano tuakamu i Harun! NisaniKu ia natau notesa. Ia da ranja mpolipa tumai, bo madamba rarana mosintomu nte iko. 15 Potesakamo bo ulika ia anu raulina. Yaku mombatulungi komiu randua bo mompatuduki anu raulimiu bo rapoviamiu. 16 I Harun muposumba motesa ri ngayo ntodea. Iko rasarumakana mpo Yaku mboto notesa ka ia manguli anu raulina. 17 Kenimo toko tutu, iko movia kabaraka-kabaraka ante toko tutu ngena.”
I Musa nanjili hau ri tana Mesir
18 Naliu haitu nanjilimo i Musa hau ri banua i Yitro, matuana, bo nanguli, “Dekeimo yaku manjili hau ri tana Mesir mompeinta sampesuvu-sampesuvuku bara da matuvu ira hamai.”
Nesanamo i Yitro, “Koimo, perapi doa masalama ri dala.”
19 Dopame i Musa nalai lako ri tana Midian, TUPU nanguli ka ia, “Panjili hau ri tana Mesirmo. Namate puramo tona madota mompatesi iko.” 20 Jadi niunaka i Musamo bereina bo ana-anana. Pade nisavirakana ira ri bengo nu keledai bo hau singganimo ira manjili ri tana Mesir. Nikeni i Musa munimo kayu nipotokona anu nitudu nTUPU ka ia rakeni.
21 Nangulimo TUPU ka i Musa, “NidekeiKumo kuasa ka iko mompovia kabaraka-kabaraka. Jadi ane manjili iko hau ri tana Mesir ngena, poviamo kabaraka-kabaraka haitu ri ngayo magau Mesir. Tapi Yaku mompakakaa bagana, sampe ia ledo madota mombadekei komiu toIsrael malai. 22 Pade ulimo petevaiKu ka magau ivei: ‘ToIsrael nipotoveKu mpo ana lumbuaKu. 23 NituduKu iko mombadekei todeaKu malai ala ira mamala mombasomba Yaku, tapi nipoaramu. Sabana haitu, Kupatesi anamu lumbua.’ ”
24 Ri potendara riara mpolipara haitu, TUPU nakava nte i Musa bo masadia mompatesi ia. 25 Bereina i Zipora nangala vatu natada bo nombasuna anana, bo kuli nilelakana haitu nitulakana kada i Musa. Nangulimo i Zipora, “Iko mpuu-mpuu berei raaa ka yaku.” 26 Anu haitu niulina nantesaki ada posuna. Jadipa ledo najadi i Musa nipatesi nTUPU.
27 Tempo haitu TUPU notesa ka i Harun, “Koimo hau ri karava bai mosintomuka i Musa.” Haumo i Harun nosinggavaka tueina ri bulu Sinai. Nakava hamai, niekinamo i Musa. 28 Pade i Musa notesa ka i Harun pura-pura anu nitudu nTUPU ka ia rapasimbayukana tona bo nitesana muni kabaraka-kabaraka nitudu nTUPU kana rapoviana.
29 Naliu haitu, haumo i Musa bo i Harun ri tana Mesir mompasiromu pakeni-pakeni ntoIsrael. 30 I Harun notesaki pura-pura anu niuli nTUPU ka i Musa, bo i Musa novia kabaraka-kabaraka ri ngayora haitu. 31 Jadi niparasayaramo, bo tempo nieperapa TUPU nomparantaika ira toIsrael bo nompeinta kandasara, ira nantaputu bo nesomba.