I Musa bo i Harun nantingayo magau Mesir
5
Naupu sia, i Musa bo i Harun hau nantingayo magau Mesir bo nanguli, “Ivei parenta nTUPU, Alatala nisomba kami toIsrael: ‘Dekeimo todeaKu malai, ala mamala ira movia posusa mombasomba Yaku ri karava bai.’ ”2 Nesana magau, “Isema tano TUPU? Kupokuya mompangala Ia bo mombadekei komiu toIsrael malai? Ledo nisaniku TUPU haitu, bo ledo kudekei komiu malai.”
3 I Musa bo i Harun nanguli, “Alatala nisomba kami toIbrania nakava nte kami. Dekeimo kami hau ri karava bai talu eo kasaena polipa ri dala ala mamala kami manggeni pesomba kami ka TUPU, Alatala nisomba kami. Ane ledo raoseaka kami parentaNa, rapatesiNa kami ante dua bara posieva.”
4 Nangulimo magau ka i Musa bo i Harun, “Nakuya komiu nompakabonto bagora? Koimo panjili bo tudumo batua-batua gahaitu mokarajaa! Nee aga mokambadu-mbadu. 5 Tona gahaitu nadea gagamo. Bo hitupa patujumiu tutu ala mompopetaa ira mokarajaa!” 6 Eo haitu muni magau nantudu toMesir anu najadi mandoro, bo toIsrael anu najadi topompasiayu pokarajaa roara. 7-8 “Tumo radekei jami rapoviara batu bata.b Tapi kadea batu bata rapoviara kana batena, ledo mamala makura. Dekeikamo raelora mboto jami. Ira netimau-mau, siamo sampe nongau-ngau ira ala radekei hau manggeni pesomba ka Alatala nisombara. 9 Barusu tona gahaitu mokarajaa ntamopa, ala ira mabago nte pokarajaara bo ledo maria tempora mangepe tesa-tesa dava.”
10 Mandoro bo topompasiayu pokarajaa haitu nesuvu bo nanguli ka todea toIsrael, “Panguli nu magau, domo radekei jami ka komiu. 11 Komiu kana mangelo mboto bara riumba rapanggavamiu, tapi tora, batu bata rapoviamiu ledo mamala makura kadeana.” 12 Jadi haumo toIsrael nompesayo ri njumangu tana Mesir mompasiromu jami. 13 Eo-eo mandoro nombasaravi ira ala batu bata rapoviara masimbayu kadeana tempo da nidekeira jami ka ira. 14 Mandoro haitu nombaboba topompasiayu pokarajaa ntoIsrael anu nipatavara mombapasiayu pokarajaa. Mandoro nekutana, “Nakuya todeamiu novia batu bata ledo nasimbayu kadeana eva biasana?”
15 Jadi haumo topompasiayu pokarajaa ntoIsrael mantingayo magau bo nongau, “Pua, nakuya nipoviakamiu ivehitu kami? 16 Kami domo nidekeika jami, tapi kami da nibarusu movia batu bata! Hitupa kamimo niboba, kakanana tona nitudumiu nomparenta nasala!”
17 Nesana magau, “Komiu tona namau mami bo ledo nadota nokarajaa. Tutumo sampe komiu nerapi nte yaku, hau manggeni pesomba ka Alatala nisombamiu. 18 Koimo pokarajaa, ledo radekei ka komiu jami, tapi komiu kana movia batu bata masimbayu kadeana.” 19 Tempo niepe ntopompasiayu pokarajaa gahaitu toIsrael kana movia batu bata masimbayu kadeana eva biasana, nisanira mandasamo ira. 20 Tempo ira nesuvu lako ri banua magau, ira nosintomuka i Musa bo i Harun nompopea ira. 21 Naraumo topompasiayu pokarajaa haitu bo nanguli, “Nisani nTUPUmo poviamiu! Ia mombahuku komiu! Komiumo sampe kami nipovuu mata nu magau bo timalina, komiumo sabana ira madota mompatesi kami.”
I Musa nongau ka TUPU
22 Pade haumo i Musa nantingayo TUPU mpanjili bo nanguli, “Pue, nakuya toIsrael nipandasaMiu ivehitu? Nakuya nitudukaMiu yaku tumai ri sii? 23 Nompamula yaku nantingayo magau bo nanguli anu nituduMiu ka yaku, magau nompamula nompandasa todea hitu. Bo Komiu ledo novia nuapa-nuapa mombatulungi ira.”
24 Pade nangulimo TUPU ka i Musa, “Hitupa mupeintamo ngena berimbana Yaku mompovia magau. Ia Kubarusu mombakabasaka todeaKu. Ia mpuu-mpuu Kubarusu mompopalai ira lako ri ngata hitu.”