Alatala nantudu vai i Musa manggeniaka toIsrael mesuvu lako ri tana Mesir
6
Alatala notesa ka i Musa ivei, “Yakumo TUPU. 2 Yaku nompopaisani karoKu ka i Abraham, i Ishak bo i Yakub ante sanga ‘Alatala nambaso kakuasaNa’, tapi Yaku ledo nompopaisani karoKu ka ira ante sanga ‘TUPU.’ 3 Yaku muni novia pojanji nte ira. Yaku nojanji mombadekei tana Kanaan ka ira, ngata niponturora nggaulu natuvu mpo topesovo. 4 NiepeKumo pekakai bo tangi ntoIsrael nipobatua ntoMesir, bo nitoraKu pojanjiKu haitu.5 Jadi ulika toIsrael ivei: Yakumo TUPU, komiu Kukabasaka lako ri pepandasa ntoMesir. Yaku mompopakita kambaso kuasaKu mompakasalama komiu bo mombadekei pehuku ntamo ka toMesir. 6 Komiu Kupajadi todeaKu, bo Yaku majadi Alatalamiu. Jadi rasanimiumo Yakumo TUPU, Alatala nisombamiu, anu mombakabasaka komiu lako ri pepandasa ntoMesir. 7 Komiu Kukeni hau ri ngata nijanjiKu bo nosumpa nte i Abraham, i Ishak bo i Yakub. Tana haitu Kudekei ka komiu majadi tanamiu mboto. Yakumo TUPU.”
8 Pura-pura petevai nTUPU haitu niuli i Musa ka toIsrael, tapi ledo nadota ira nangoseaka tesa i Musa, sabana pokarajaa haitu mpuu-mpuu nandasa sampe naupu rarara.
9 TUPU nombatudu i Musa, 10 “Koi tingayomo magau Mesir bo ulika, kana radekeina toIsrael mompalaisi ngatana.”
11 Tapi nesana i Musa, “Pue, toIsrael mboto ledo nadota nangepe tesaku. Ledo kusarumaka magau madota mangepe yaku, apa yaku hii ledo natau notesa!” 12 Ivesiamo TUPU nombatudu i Musa bo i Harun manggeni petevaiNa ka toIsrael bo magau Mesir. Bo nipatava nTUPU ira mombakeniaka toIsrael mesuvu lako ri tana Mesir.
Sunju muli i Musa bo i Harun
13 Hitumo sunju ntotua i Musa bo i Harun:
I Ruben, ana lumbua i Yakub, nomulika ampa ngana langgai nosanga i Henokh, i Palu, i Hezron, bo i Karmi. Ira haitu totua nomulika valaa i Ruben.
14 I Simeon nomulika aono ngana langgai: i Yemuel, i Yamin, i Ohad, i Yakhin, i Zohar bo i Saul. I Saul saitona ana i Simeon nte bereina toKanaan. Ira haitu totua nomulika valaa i Simeon.
15 I Lewi nomulika tatalu ngana langgai: i Gerson, i Kehat bo i Merari; ira haitu totua valaa i Lewi. I Lewi natuvu sampe noumuru saatu talupulu pitu (137) mpae.
16 I Gerson nomulika randua ngana langgai: i Libni bo i Simei; ira nomuli nadea.
17 I Kehat nomulika ampa ngana langgai: i Amram, i Yizhar, i Hebron bo i Uziel. I Kehat natuvu sampe noumuru saatu talu pulu talu (133) mpae.
18 I Merari nomulika randua ngana langgai: i Mahli bo i Musi. Haitumo valaa-valaa i Lewi ante totua-totuara.
19 I Amram [ana langgai i Kehat] noberei nte i Yokhebed, tuei ntuama i Amram mombine, bo anara langgai nosanga i Harun bo i Musa. I Amram natuvu saatu talupulu pitu (137) mpae.
20 I Yizhar, tuei i Amram, nomulika tatalu ngana langgai: i Korah, i Nefeg bo i Zikhri.
21 I Uziel, tuei i Amram, nomulika muni tatalu ngana langgai: i Misael, i Elsafan bo i Sitri.
22 I Harun [ana i Amram] noberei ante i Eliseba, ana i Aminadab; i Eliseba nosampesuvu muni nte i Nahason. I Eliseba noanaka i Nadab, i Abihu, i Eleazar bo i Itamar.
23 I Korah [ana i Yizhar] nomulika tatalu ngana langgai, i Asir, i Elkana bo i Abiasaf. Ira haitu totua nomulika valaa i Korah.
24 I Eleazar ana langgai i Harun, nobereika saito mombine ana i Putiel, bo anara nosanga i Pinehas. Haitu pura totua ri valaa i Lewi.
25 I Harun bo i Musa haitumo anu niparenta nTUPU manggeni toIsrael mesuvu lako ri tana Mesir. 26 Ira randua haitumo mai hau mangulika magau Mesir mombakabasaka toIsrael.
TUPU nombadekei parenta ka i Musa bo i Harun
27 Tempo TUPU notesa ka i Musa ri tana Mesir, niuliNa, 28 “Yakumo TUPU. Uli ka magau pura-pura anu niuliKu ka iko.”
29 Tapi nesana i Musa, “Pue, nisaniMiu yaku ledo natau notesa. Ledo kusarumaka raepe nu magau tesaku!”