7
TUPU nanguli ka i Musa, “Pariaramo! Iko Kupajadi mpo Yaku ka magau Mesir. Tuakamu i Harun Kupajadi topompapola tesamu. Ia mompasimbayu tesamu ka magau, nasimbayu mpo nabi nompasimbayu tesaKu ka todea. 2 Ulika i Harunmo pura-pura anu niparentaKu ka iko. Tudumo i Harun mangulika magau mombadekei toIsrael mompalaisi tana Mesir. 3 Tapi Yaku mompakakaa baga nu magau. Ia kana mombasapuaka tesamu, naupa madea tanda rapokumaaka Kupovia ri Mesir. 4 Sabana haitu, Yaku mombahuku toMesir ante pehuku mantamo, pade Kukeni pura-pura todeaKu toIsrael mesuvu lako ri ngata haitu. 5 Tempo Yaku mombahuku ira bo manggeni toIsrael mesuvu lako ri ngatara, rasani ntoMesirmo Yakumo TUPU.” 6 I Musa bo i Harun novia anu niuli nTUPU. 7 Tempo ira nantingayo magau Mesir, i Musa noumuru valupulu (80) mpae bo i Harun valupulu talu (83) mpae.Kayu nipotoko i Harun
8 TUPU notesa ka i Musa bo i Harun, 9 “Ane magau momperapi komiu mompopakita tanda kabaraka, tudumo i Harun mombatendeaka kayu nipotokona ri tana ri ngayo magau. Toko haitu mombali majadi ule.”
10 Jadi haumo i Musa bo i Harun nantingayo magau bo nipoviaramo anu niparenta nu Alatala ka ira. I Harun nombatendeaka tokona ri tana ri ngayo magau bo tomaogena. Toko haitu nombali najadi ule. 11 Jadi magau nompokio topangisani bo toposibali mata ri ngata haitu, bo ira nevali muni novia kabaraka ivehaitu nangoseaka pangisanira. 12 Ira nombatendeaka toko-tokora ri tana bo tokora gahaitu nombali najadi ule muni. Tapi ule i Harun nangomesi ule-ulera haitu. 13 Naupa ivesia, da nakaa baga magau bo ledo nipangalana tesa i Musa bo Harun, eva anu niuli nTUPU kana majadi.
TOMESIR NIKAVA SILAKA
Silaka paratama: Uve najadi raa
14 Naliu haitu nangulimo TUPU ka i Musa, “Magau haitu nakaa mpuu bagana; ledo nidekeina toIsrael malai. 15 Sabana haitu, maile mpadondo koi posinggavakamo magau tempo ia motua hau ri binangga Nil. Kenimo kayu nipotokomu tutu anu namala mombali majadi ule bo popeamo kakavana ri tinggi binangga. 16 Ulimo ka magau ivei: ‘TUPU, Alatala nisomba ntoIbrani, nombatudu yaku manguli ka komiu mombadekei todeaNa hau mombasomba Ia ri karava bai. Tapi sampe sii-sii komiu ledo nadota nantalingai tesaNa. 17 Sabana haitu, TUPU nanguli rapoviaNa kabaraka ngena ala musanimo Iamo TUPU. Peintamo. Toko hitu kubobataka ri uve binangga Nil hitu, bo uvena mombali majadi raa. 18 Bau-bau mamate, bo binangga hitu mavau soana, sampe uvena ledo mabelo rainumiu ntoMesir.’ ”
19 Notesa vai TUPU ka i Musa, “Tudumo i Harun mangala tokona bo ralaerakana ri bavo nu binangga, salu-salu kodi, bo uve-uve nolibo ri Mesir. Uvena majadi raa, bo ri njumangu ngata maria raa, nau uve niboli ri pomboli nipovia lako ri kayu bara vatu.”
20 I Musa bo i Harun novia anu niparenta nTUPU ka ira. I Harun nolaeraka tokona ri ngayo nu magau bo tomaogena pade nibobana uve binangga Nil. Jadi uvena nombali najadi raa. 21 Bau-bau ri binangga haitu namate, bo navau mpuu soana, sampe ledo namala niinu ntoMesir uvena. Ri njumangu tana Mesir naria raa.
22 Tapi toposibali mata ntoMesir nevali muni novia kabaraka ivehaitu ante pangisanira, sampe magau batena nakaa bagana. Evamo anu niuli nTUPU, ledo nipangala magau tesa i Musa bo i Harun. 23 Magau haitu nanjili ri banuana bo ledo ria sakidea nipangalana kajadia-kajadia haitu. 24 Pura-pura toMesir nokae buvu ri tinggi binangga nangelo uve rainu, sabana uve binangga haitu ledo nabelo niinu.
25 Ivesiamo naliu pitu eo naupu TUPU nombapindasi binangga Nil.