Silaka karanduana: Ntaraka
8
TUPU nanguli ka i Musa, “Koimo tingayo magau bo ulimo petevaiKu ka ia, ivei: ‘Dekeimo todeaKu hau mombasomba Yaku. 2 Ane mupoara, Kuhuku tupu ngata hitu bo ngatara Kupakabutu nte ntaraka. 3 Binangga Nil Kupakabutu muni ante ntaraka, sampe binata haitu mesuvu lako ri uve bo mesua ri banuamu, riara ntombimu bo ri paturumu, riara banua ntomaogemu bo todeamu, sampe mesua riara potunu roti bo ranggura. 4 Ntaraka-ntaraka gahaitu metempa bo mompene ri karomu, bo muni nte pura-pura tomaogemu bo todeamu.’ ”5 Notesa vai TUPU ka i Musa, “Tudumo i Harun mombalaeraka tokona ri binangga, ri salu-salu kodi, bo ri uve nolibo ala ntaraka-ntaraka mesuvu bo mompakabutu tana Mesir.”
6 Jadi, i Harun nombalaeraka tokona ri bavo nu pura-pura uve, pade nesuvu ntaraka dea nompakabutu njumangu tana Mesir. 7 Tapi toposibali mata nompajala pangisanira, bo nipoviara muni ntaraka neumba ri ngata haitu.
8 Magau nompokio i Musa bo i Harun, bo nanguli, “Posambayamo ala TUPU mombaropusi ntaraka gahitu, bo kupalogamo todeamu hau manggeni pesomba ka Ia.”
9 Nesana i Musa, “Pua, madamba yaku mosambaya ka komiu. Pakatantumo tempona bo kuposambayaka komiu, tomaogemiu, bo todeamiu, ala ntaraka-ntaraka maropu pura, ledo ria maboli ri kabatana, damo aga ri binangga Nil maria.”
10 Nangulimo magau haitu, “Posambayakamo tano yaku maile.”
Nesana i Musa, “Kupovia anu niperapimiu ala rasanimiu ledo ria Alatala santanina nasimbayu kakuasana mpo TUPU, Alatala nisomba kami. 11 Ia mombaropusi ntaraka gahaitu lako nte komiu, tomaogemiu, bo todeamiu. Domo maria ntaraka riara banua, damo aga ri binangga Nil.”
12 Naliu haitu, nalaimo i Musa bo i Harun lako ri banua nu magau. Pade nosambayamo i Musa ala TUPU mombaropusi ntaraka-ntaraka nipakatuNa ka magau haitu. 13 TUPU nompoiyo pomperapi i Musa, bo ntaraka-ntaraka naria ri banua, ri doyata, bo ri talua-talua namate puramo. 14 ToMesir nompasiromu ntaraka namate haitu sampe notambu-tambu, bo njumangu tana Mesir nesoa. 15 Nanggitapa ntaraka gahaitu namate puramo, nakaa vai baga nu magau. Bo eva anu niuli nTUPU bara ipia, ledo nipangala magau tesa i Musa bo i Harun.
Silaka katataluna: Sani
16 TUPU nanguli ka i Musa, “Tudumo i Harun mombabobataka tokona ri tana, ala avu ri njumangu tana Mesir majadi sani.”
17 Jadi nibobataka i Harunmo tokona ri tana, bo pura-pura avu ri tana Mesir najadi sani nombatamu manusia bo binata. 18 Toposibali mata nompasimbuku muni nompake pangisanira movia sani, tapi ledo nevali nipoviara. Riumba-umba naria sani, 19 sampe toposibali mata haitu nanguli ka magau, “Hitu povia nu Alatala.” Tapi magau haitu batena nakaa bagana, bo evamo anu niuli nTUPU, ledo nipangala magau tesa i Musa bo i Harun.
Silaka kaampana: Lale
20 TUPU nanguli ka i Musa, “Maile mpadondo mpisina, koimo posintomuka magau motua hau ri binangga Nil, bo ulimo tesaKu ka ia, ivei: ‘TUPU nomparenta komiu, dekeimo todeaNa hau mombasomba Ia. 21 Ane rapoaramiu, Ia mombaronde lale dea ka komiu, ka tomaogemiu bo todeamiu. Banua-banuamiu ntoMesir, sampe njumangu tana Mesir mabutu lale. 22 Tapi aga bagia Gosyen anu niponturo ntodeaNa ledo maria lale, ala rasanimiu, Iamo TUPU, anu novia kabaraka haitu. 23 TodeaNa bo todeamiu ledo rapakasimbayuNa. Kabaraka haitu majadi maile.’ ”
24 TUPU mpuu-mpuu nombadekei lale dea ri banua magau bo tomaogena sampe njumangu tana Mesir nandasa sabana lale haitu.
25 Naliu haitu, nipokio nu magaumo i Musa bo i Harun bo niulikana, “Koimo keni pesomba ka Alatala nisombamiu, tapi aga ri ngata hitu.”
26 Nesana i Musa, “Nabelopa nemo ri sii, pua. Mbelaka makei rara ntoMesira manggita pesomba kami, bo tantu mami kami rarempera vatu sampe mamate. 27 Kami kana hau ri karava bai, nitasere talu eo kasaena ri dala kami hau manggeni pesomba ka TUPU, Alatala nisomba kami, nangoseaka parentaNa ka kami.”
28 Magau nanguli, “Nabelomo, kudekei komiu hau ri karava bai manggeni pesombamiu ka TUPU, Alatala nisombamiu, asaa komiu ledo hau makavao. Tora posambayaka yaku!”
29 Nesana i Musa, “Malai ntani yaku, pade kuposambayaka komiu ala lale-lale haitu malai maile lako nte komiu, tomaogemiu, bo todeamiu. Tapi tumo rabagiu kami, bo tumo ratagi kami toIsrael hau manggeni pesomba ka TUPU.”
30 Nalaimo i Musa lako nte magau, bo hau nosambaya nerapi nte TUPU, 31 bo TUPU nompoiyo pomperapi i Musa. Lale-lale gahaitu nevoro nompalaisi magau, tomaogena, bo pura-pura todeana. Nau sambaa lale, ledo ria naboli. 32 Tapi naliu haitu muni, magau bate-batena nakaa bagana ledo nidekeina toIsrael malai.